2 DIKGOSI 18

₁Hesekia morwa Ahase kgosi ya Juta o ne a simolola go busa ka ngwaga wa boraro wa puso ya ga Hosea morwa Ela, kgosi ya Iseraele. ₂Ya re a simolola go busa, a bo a le dinyaga di le 25; a busa dinyaga di le 29 kwa Jerusalema. Leina la ga mmaagwe e ne e le Abi morwadia Sagaria. ₃A dira tse di siameng mo matlhong a Morena fela jaaka go dirile Dafita rraagwe mogolwagolwane. ₄Ke ene yo o neng a tlosa dithota tsa tlhabelo, a thubaganya majwe a a motloutlo, a rema medimako ya Ašera, a pšhwetlakanya noga ya kgotlho e Moše o kileng a e dira; gonne go fitlha metlheng ele Baiseraele ba nna ba e tshubela maswalo, mme e ne e bidiwa Nehušethane. ₅O ne a ikanya Morena, Modimo wa Iseraele, mme go se na ope mo dikgosing tsotlhe tsa Juta yo o tshwanang nae, le fa e le tse di mo latetseng gongwe tse di neng di le teng pele ga gagwe. ₆O ne a ineela Moreneng, a sa fapoge mo go ene, a tshegetsa ditaolo tsa gagwe tse Morena o di laetseng Moše. ₇Mme Morena o ne a na nae; mo go tsotlhe tse o neng a ya go di dira a nna tlhogonolo; a tswa mo kgosing ya Asiria, a se ka a e direla. ₈A fenya Bafelesita go fitlha kwa Gasa le dinageng tsa teng; a simolola ka dinaka tsa balebedi, a khutla ka motse o o femetsweng.

₉Ka ngwaga wa bone wa puso ya kgosi Hesekia o e leng ngwaga wa bosupa wa puso ya ga Hosea morwa Ela kgosi ya Iseraele Salemanesere kgosi ya Asiria ya bololela Samaria, ya mo dikanyetsa ka ntwa, ₁₀ya mo thopa morago ga dinyaga di le tharo. E ne e le ka ngwaga wa borataro wa puso ya ga Hesekia o e leng ngwaga wa robongwe wa puso ya ga Hosea kgosi ya Iseraele fa Samaria a thopiwa. ₁₁Jaanong kgosi ya Asiria ya isa Baiseraele botshwarong kwa Asiria, ya ba baya kwa Hala le fa Habore, noka ya Gosane, le kwa metseng ya Media.

₁₂E ne e le ka gore ga ba a ka ba utlwa lentswe la Morena, Modimo wa bone, mme ba tlola kgolagano ya gagwe, e bong tsotlhe tse Moše motlhanka wa Morena o neng a di ba laetse. Ba se ka ba di utlwa le e seng go di dirisa.

₁₃Ka ngwaga wa 14 wa puso ya kgosi Hesekia Saneheribe kgosi ya Asiria a bololela metse yotlhe e e femetsweng ya Juta, a ba a e thopa. ₁₄Ke fa Hesekia kgosi ya Juta a romela lefoko kwa kgosing ya Asiria kwa Lagiše a re: “Ke leofile. Boa o ntlogele. Se o se nthwesang ke tla se rwala.” Mme kgosi ya Asiria ya lefisa Hesekia kgosi ya Juta ditalente di le 300 tsa selefera le ditalente di le 30 tsa gouta. ₁₅Jaanong Hesekia a ntsha selefera yotlhe e e mo Ntlong ya Morena le mo mahumong a ntlo ya bogosi. ₁₆Ka sebaka seo Hesekia a kgakgamolola gouta mo ditswalong tsa Tempele ya Morena le mo maotwaneng a tsona a Hesekia kgosi ya Juta o neng a a manegile, a e neela kgosi ya Asiria. ₁₇Kgosi ya Asiria e kile ya roma molaodi yo mogolo wa mephato le mookamedi wa badiredi ba lapa la kgosi le mothoki yo mogolo kwa go kgosi Hesekia kwa Jerusalema, ba na le mephato e megolo ya batlhabani ba tswa kwa Lagiše; ba tlhaga ba fitlha kwa Jerusalema; ya re ba tlhaga ba fitlha, ba ema fa moseleng wa letsha le le kwa godimo fa tseleng ya tshimo ya motlhatswi wa masela, ₁₈ba bitsa kgosi. Ke fa Eliakime morwa Hilekia yo e leng mookamedi wa lelapa la kgosi le Sebena mokwaledi le Joa morwa Asafe letsogo la kgosi ba tswela kwa go bone. ₁₉Mme mothoki yo mogolo a ba raya a re: “A ko lo botse Hesekia lo re: ‘Kgosi e kgolo kgosi ya Asiria e bua jaana e a re: Ke eng se o se ikanyang se se ikanyegang? ₂₀A wena o a re: Go bua mafoko fela ke one maano le thata ya ntwa? Jaanong he, o ikanya mang, fa o ntsogetse? ₂₁Bona he, o ikanya seikokotlelo seo sa lotlhaka lo lo pšhwetlegileng sa Egepeto, lo e ka reng fa motho a ikaega ka lone, lwa mo tsena mo seatleng lwa se phunya: Farao, kgosi ya Egepeto e direla botlhe jalo ba ba e ikanyang.

₂₂“ ‘Mme fa lo ka nthaya lo a re: “Re ikanya Morena, Modimo wa rona” – a ga se ona o Hesekia o tlositseng dithota tsa tlhabelo tsa ona le dialetare tsa ona, a raya Juta le Jerusalema a re: “Obamelang fela fa pele ga aletare e mono Jerusalema”? ₂₃Mme jaanong a ko o dire peelano le morena wa me kgosi ya Asiria: Ke tla go naya dipitse di le dikete tse pedi fa o ka kgona go ntsha bapalami ba tsona. ₂₄Mme o ka leleka jang batlhasedi ba molaodi a le mongwe fela wa batlhanka ba babotlana ba morena wa me? Kampo a o ikanya Egepeto ka ntlha ya dikoloi tsa ntwa le ka ntlha ya bapalami ba dipitse? ₂₅Jaanong a o a re, ke bololetse go senya golo mono ke sa laelwa ke Morena? Nnyaya! Morena o ntheile a re: Bololela lefatshe leo, o le senye!’ ”

₂₆Ke fa Eliakime morwa Hilekia le Sebena le Joa ba raya mothoki yo mogolo ba re: “A ko o bue le batlhanka ba gago ka Sesiria, gonne re a se utlwa. Se bue le rona ka Sejuta mo ditsebeng tsa batho ba ba mo loboteng.”

₂₇Mme mothoki yo mogolo a ba fetola a re: “A morena wa me o nthomile kwa moreneng wa gago le kwano go wena go bua mafoko a? A ga a nthoma kwa banneng ba ba ntseng mo loboteng gore ba je mantle a bone, ba nwe moroto wa bone mmogo le lona?”

₂₈Mothoki yo mogolo a ba a ema fa gaufi, a kua ka kodu e e kwa godimo ka Sejuta, a bua a re: “Utlwang lefoko la kgosi e kgolo la kgosi ya Asiria! ₂₉Kgosi e buile jaana ya re: ‘A Hesekia a se ka a lo tsietsa! Gonne ga a kgone go lo pholosa mo seatleng sa yona. ₃₀Le gona a Hesekia a se ka a lo ikanyisa Morena ka go re: Ruri, Morena o tla re pholosa. Motse o ga o nke o neelwa mo seatleng sa kgosi ya Asiria.’ ₃₁Lo se ka lwa utlwa Hesekia! Gonne kgosi ya Asiria e bua jaana e a re: ‘Agisanyang le nna, lo tswele kwano go nna. Foo mongwe le mongwe wa lona o tla ja moweine wa gagwe le mofeie wa gagwe le go nwa metsi a sediba sa gagwe ₃₂go fitlhelela ke tle ke lo tseele kwa lefatsheng le le tshwanang le lefatshe la lona; kwa lefatsheng la mabele le matute a moweine, kwa lefatsheng la bogobe le masimo a moweine, kwa lefatsheng la lookwane lwa ditlhare tsa olefa le mafura a dinotshe. Foo lo tla phela, mme lo sa swe. Lo se ka lwa utlwa Hesekia; gonne o lo aketsa ka go re: Morena o tla re pholosa. ₃₃A tota mongwe wa medimo ya ditšhaba o kile wa pholosa lefatshe la ona mo seatleng sa kgosi ya Asiria? ₃₄E kae medimo ya Hamathe le ya Arephate? E kae medimo ya Sefarwaime le ya Hena le ya Iwa? A e ne ya pholosa Samaria mo seatleng sa me? ₃₅Ke efe medimo mo medimong yotlhe ya mafatshe e e kileng ya pholosa mafatshe a yona mo seatleng sa me, fa lo re: Morena o tla pholosa Jerusalema mo seatleng sa me’?”

₃₆Mme banna ba didimala fela, ba se ka ba mo fetola ka lefoko lepe. Gonne taelo ya kgosi e ne e re: “Lo se ka lwa mo araba!” ₃₇Ke fa Eliakime morwa Hilekia yo e leng mookamedi wa lelapa la kgosi le Sebena mokwaledi le Joa morwa Asafe letsogo la kgosi ba tla kwa go Hesekia ba ikgagotse diaparo, ba mo itsise mafoko a mothoki yo mogolo.