2 DITIRAFALO 32

₁Morago ga dilo tseo le boikanyo joo ga tla Saneheribe kgosi ya Asiria, a tsena mo nageng ya Juta, a dikanyetsa metse e e femetsweng ka ntwa, a re o a e ithopela. ₂Jaanong ya re Hesekia a bona Saneheribe a tla a ikaeletse go tlhasela Jerusalema, ₃a utlwana le dikgosana tsa gagwe le bagale ba gagwe go katela metswedi e e neng e le ka fa ntle ga motse, mme ba mo thusa. ₄Ga phuthega batho ba bantsi, ba katela metswedi yotlhe le nokana e e elang e ralala lefatshe ba re: “Dikgosi tsa Asiria di tla bo di fitlhelelang metsi a mantsi?” ₅Hesekia a ba a nna pelokgale a aga lobota lotlhe lo lo neng lo thubilwe, a aga dinaka tsa phemelo mo godimo ga lone le lobota lo longwe ka kwa ntle, a tiisa kago ya phemelo ya Milo mo motseng wa ga Dafita, a dira dibolai ka bontsi le dithebe. ₆A ba a baya balaodi ba ntwa ba ba laolang batlhabani, a ba phuthela kwa go ene kwa patlelong ya kgoro ya motse, a bua nabo, a tiisa dipelo tsa bone a re: ₇“Tiang lo nne pelokgale se boifeng, se tshogeng kgosi ya Asiria le bontsi jotlhe jo bo nang nayo. Gonne yo o nang le rona o mogolo bogolo go yo o nang nayo. ₈Yona e na le letsogo la nama fela, mme yo o nang le rona ke Morena, Modimo wa rona, go re thusa le go re tlhabanela ditlhabano tsa rona.” Mme batlhabani ba ikanya mafoko a ga Hesekia kgosi ya Juta.

₉Morago ga moo Saneheribe, kgosi ya Asiria, a roma batlhanka ba gagwe kwa Jerusalema, ene a ntse a le kwa Lagiše a na le mephato yotlhe ya gagwe. Ba fitlha kwa go Hesekia, kgosi ya Juta, le kwa go Bajuta botlhe ba Jerusalema ba re: ₁₀“Saneheribe, kgosi ya Asiria, e bua jaana e a re: ‘Lo ikantse eng, fa lo ntse mo Jerusalema yo o dikanyeditsweng ka ntwa? ₁₁Ruri Hesekia o a lo aketsa, o lo bolaya ka tlala le lenyora, mme o ntse a re: Morena, Modimo wa rona, o tla re namolela mo diatleng tsa kgosi ya Asiria. ₁₂A ga se ene Hesekia yo o tlositseng dithota tsa tlhabelo tsa ona le dialetare tsa ona, a raya batho ba Juta le ba Jerusalema a re: Obamelang fa pele ga aletare e le nngwe fela, lo tshube maswalo mo go yona? ₁₃A ga lo itse se nna le borre re se diretseng merafe yotlhe ya mafatshe? A tota medimo ya ditšhaba tsa mafatshe e kgonne go namolela mafatshe a tsona mo diatleng tsa me? ₁₄Ke ofe modimo mo medimong yotlhe ya ditšhaba tseo tse borre ba di bolaileng ka khutso ya Modimo, o o kgonneng go pholosa morafe wa ona mo diatleng tsa me, mo Modimo wa lona o ka bong o kgona go lo pholosa mo diatleng tsa me? ₁₅Jaanong he, a Hesekia a se lo tsietse le e seng go lo timetsa ka mokgwa o o ntseng jalo, se mo dumeleng; gonne ga go na modimo ope wa setšhaba sepe le wa bogosi bope o o kileng wa kgona go golola morafe wa ona mo diatleng tsa me le mo diatleng tsa borre. Mme Modimo wa lona ona o tla tlhaela bogolo jang go ka lo pholosa mo diatleng tsa me!’ ”

₁₆Mme batlhanka ba gagwe ba bua tse dingwe gape tsa go kgala Morena, Modimo, le tsa go nyatsa Hesekia, motlhanka wa gagwe. ₁₇Le gona Saneheribe o na a kwadile lokwalo lwa go kgoba Morena, Modimo wa Iseraele, le lwa go o roga a re: “Modimo wa ga Hesekia ga o kitla o pholosa morafe wa ona mo diatleng tsa me fela jaaka medimo ya ditšhaba tsa mafatshe e se ka ya pholosa merafe ya yona mo diatleng tsa me.” ₁₈Ba bile ba tlhatlosa mantswe, ba tlhaeletsa batho ba Jerusalema ka Sejuta ba ba neng ba le mo loboteng, e le go ba boifisa le go ba nyemisa moko gore ba tle ba thope motse. ₁₉Ba bua tsa go kgala Modimo wa Jerusalema jaaka ba kgala medimo ya merafe ya lefatshe e e leng dibopiwa tsa diatla tsa batho fela.

₂₀Mme e rile kgosi Hesekia le moporofeti Jesaya, morwa Amotse, ba rapela ka ntlha ya tseo ba goela legodimong. ₂₁Morena a roma moengele, ene a nyeletsa bagale botlhe le bagogi le balaodi mo bothibelelong jwa kgosi ya Asiria, mo e bileng ya boela kwa lefatsheng la yona ka ditlhong. Jaanong ya re e tsena mo tempeleng ya modimo wa yona, bana ba yona, ba e ba tsetseng, ba e bolaela teng ka tšhaka.

₂₂Ka mokgwa oo Morena a pholosa Hesekia le baagi ba Jerusalema mo diatleng tsa ga Saneheribe, kgosi ya Asiria, le mo diatleng tsa baba botlhe, a ba naya boikhutso ntlheng tsotlhe. ₂₃Ba bantsi ba nna ba isetsa Morena dineo kwa Jerusalema le Hesekia kgosi ya Juta, ba e ntshetsa dilo tsa botlhokwa mo e bileng ya godisiwa morago ga tseo mo matlhong a ditšhaba tsotlhe.

₂₄E rile mo metlheng eo Hesekia a lwala lwa go swa a rapela Morena, mme ene a mo utlwa, a mo naya sesupo se se gakgamatsang. ₂₅Mme Hesekia a se ka a lebogela se a se diretsweng, a ikgodisa; ka moo a tukelwa bogale le ba Juta le ba Jerusalema. ₂₆Le gale Hesekia a ikwatlhaela boikgodiso jwa pelo ya gagwe mmogo le baagi ba Jerusalema; ka moo bogale jwa Morena jwa se ka jwa ba wela mo metlheng ya ga Hesekia.

₂₇Hesekia o ne a na le khumo le tlotlo mo gogolo thata, a ba a itirela matlwana a polokelo ya selefera le gouta le majwana a a tlhokegang le makga le dithebe le dilwana tsa mefutafuta tse di eletsegang ₂₈le matlo a polokelo a kotulo ya mabele le matute a moweine le lookwane le maraka a diruiwa tsa mefutafuta le meraka ya matlhape. ₂₉A ba a itirela metse le leruo le legolo la difutshane le dikgomo; gonne Modimo o ne o mo tshegofaditse ka dithoto tse dintsi thata. ₃₀Ke ene Hesekia yo o neng a thiba kelelo e e kwa godimo ya metsi a noka ya Kihone, a a folosa a a tsamaisa ntlheng ya bophirima ya motse wa ga Dafita. Hesekia o ne a tlhogonolofala mo tirong nngwe le nngwe ya gagwe. ₃₁Le gona o ne a ntse jalo, fa barongwi ba babusi ba Babele ba tla ba romilwe kwa go ene go botsolotsa ka ga sesupo se se gakgamatsang se se dirafetseng mo lefatsheng; ke fa Modimo o mo tlogela fela go mo leka gore o itse tsotlhe tse di leng mo pelong ya gagwe.

₃₂Ditirafalo tse dingwe tsa ga Hesekia le ditiro tsa gagwe tsa tumelo-Modimong kana di kwadilwe mo ponong ya moporofeti Jesaya morwa Amotse le mo lokwalong lwa dikgosi tsa Juta le Iseraele. ₃₃Mme Hesekia a robala le borraagwe, a fitlhwa fa thotaneng ya diphupu tsa boora Dafita. Batho botlhe ba Juta le baagi ba Jerusalema ba mo direla ka tlotlo mo losong lwa gagwe. Mme Manase morwawe a nna kgosi mo boemong jwa gagwe.