2 DITIRAFALO 26

₁Jaanong morafe otlhe wa Juta wa tsaya Usia, a le dinyaga di le 16, wa mo dira kgosi mo boemong jwa ga Amasia rraagwe. ₂Ene a agelela Elothe, a mmusetsa go Juta, jale fa kgosi rraagwe e sena go robala le borraa-yona.

₃Usia o ne a le dinyaga di le 16 fa a nna kgosi, a busa dinyaga di le 52 kwa Jerusalema; leina la ga mmaagwe e le Jegolea wa Jerusalema. ₄A dira tse di siameng mo matlhong a Morena fela jaaka go ne ga dira Amasia rraagwe. ₅A ineela Modimo ka malatsi a ga Sagaria yo o neng a mo ruta go boifa Modimo; mme malatsing ao, fa a ntse a ineela Morena, Modimo wa mo naya letlhogonolo.

₆A bolola a tlhabana le Bafelesita, a diga lobota lwa Gathe le lwa Jabene le lwa Ašetote; a ba a aga metse ntlheng ya Ašetote le mo nageng yotlhe ya Bafelesita. ₇Modimo wa mo thusa go fenya Bafelesita le go fenya Baarabia ba ba neng ba agile kwa Gure-Baale le Bameuni. ₈Le Baamone ba ntshetsa Usia lekgetho, mme leina la gagwe la tuma go fitlha kwa Egepeto, ka a ne a tiela pele.

₉A ba a aga dinaka tsa phemelo mo Jerusalema fa Kgorong ya Sekhutlo le fa Kgorong ya Molapo le fa Sekhutlong, a di tiisa. ₁₀A ba a aga difata tsa go disa kwa nageng ya mafulo, a epa mekwele e mentsi; gonne o ne a na le diruiwa tse dintsi mo nageng e e kwa tlase le mo leboeng le balemi ba masimo le ba masimo a meweine kwa dithabeng le kwa motseng wa Karemele, ka a rata tiro ya masimo.

₁₁Le gona Usia o ne a na le mephato ya batlhabani ba ba ka bololang ntwa, e le ditlhopha ka fa palong e Jehiele mokwaledi le Maaseya mookamedi ba e badileng, ba le mo taolong ya ga Hananya mongwe wa balaodi ba kgosi. ₁₂Palo yotlhe ya beng ba dikgoro mo gare ga bagale ba mephato e ne e le 2 600. ₁₃Ke bone ba ba neng ba laola mephato ya batlhabani ba le 307 500, ba ba ka bololang ntwa ka thata e kgolo go thusa kgosi ka go lwa le mmaba. ₁₄Bone Usia a ba direla dithebe le marumo le difutshe tsa tshipi le diaparo tsa phemelo tsa tshipi le mara le majwe a diragamajwe, tsa neelwa batlhabani botlhe. ₁₅A ba a dira didiri tsa ntwa tsa go konopa kwa Jerusalema e le ka temogo ya setswerere, tsa bewa mo dinakeng tsa phemelo le mo dikhutlong tsa lobota go hula metswi le majwe a magolo ka tsona. Leina la gagwe la tuma kwa kgakala, ka a thusiwa mo go gakgamatsang, ga tsamaya a tia thata.

₁₆Fela ya re a nna thata, pelo ya gagwe ya ikgogomosa, a ba a senya, a direla Morena, Modimo wa gagwe, ka boikanyologo, a tsena mo Tempeleng ya Morena go tshuba maswalo mo aletareng ya maswalo. ₁₇Mme Asaria moperesiti yo mogolo a tsena a mo setse morago, a na le baperesiti ba Morena ba le 80 ba ba sa tshabeng motho, ₁₈ba emelana le kgosi Usia ba mo raya ba re: “Usia, ga se tshwanelo ya gago go tshubela Morena maswalo, mme ke ya baperesiti bomorwa Arone ba ba itshepisitsweng go a tshuba. Tswaya mo Felong ga Boitshepo, gonne o dirile ka boikanyologo, wa itlotlolola fa pele ga Morena, Modimo.”

₁₉Ke fa Usia a galefa a ntse a tshotse leiswana la go tshuba maswalo; mme ya re a ntse a galefetse baperesiti, a duwa ke lepero mo phatleng a le fa pele ga baperesiti mo Ntlong ya Morena fa thoko ga aletare ya maswalo. ₂₀Jaanong ya re Asaria moperesiti yo mogolo le baperesiti botlhe ba mo leba, ba fitlhela a dulwe ke lepero mo phatleng. Ke fa ba mo ntsha gona ka pele, mme le ene ka esi a itlhaganela go tswa, ka Morena a mo iteile.

₂₁Go tloga foo kgosi Usia e ne e le molepero go ya letsatsing la loso lwa gagwe, a nna mo ntlong e e kwa thoko e le molepero; gonne o ne a kgaotswe mo Ntlong ya Morena. Mme Jothame morwawe a tshwarelela kgosi, a busa batho ba lefatshe.

₂₂Ditirafalo tse dingwe tsa ga Usia tsa pele le tsa morago di kwadilwe ke Jesaya moporofeti morwa Amotse. ₂₃Mme Usia a robala le borraagwe, a fitlhwa fa go borraagwe mo nageng ya mabitla a dikgosi; gonne ba ne ba re: “Ke molepero.” Mme Jothame morwawe a nna kgosi mo boemong jwa gagwe.