1 SAMUELE 5

₁Bafelesita ba ne ba tsaya Letlole la Modimo kwa Ebenesere, ba le isa kwa Ašetote. ₂Jaanong Bafelesita ba tsaya Letlole la Modimo, ba le isa kwa ntlong ya Dagone, ba le baya fa thoko ga Dagone. ₃Mme ya re ba Ašetote ba phakela kamoso, ba fitlhela Dagone a ole, a patlame fa pele ga Letlole la Morena. Ke fa ba tsaya Dagone, ba mmaya gape mo felong ga gagwe. ₄Jaanong ya re ba phakela ka moso o mongwe, ba fitlhela Dagone gape a ole, a patlame fa pele ga Letlole la Morena, a kgaotswe tlhogo le diatla di le fa serepoding; go setse mmele wa gagwe fela. ₅Ke ka moo baperesiti ba Dagone le botlhe ba ba tsenang mo ntlong ya Dagone ba sa gateng mo serepoding sa Dagone kwa Ašetote go fitlha letsatsing la kajeno.

₆Seatla sa Morena sa nna sa imela ba Ašetote jalo, a ba senya, a ba otla ka ditlhagala, ba Ašetote le ba dinaga tsa teng. ₇Ya re banna ba Ašetote ba bona go le jalo, ba re: “A Letlole la Modimo wa Iseraele le se ka la nna mo go rona; gonne seatla sa ona se re imela le Dagone modimo wa rona.”

₈Jaanong ba roma, ba phuthela dikgosana tsotlhe tsa Bafelesita kwa go bone ba re: “Re ka dira eng ka Letlole la Modimo wa Iseraele?” Tsa re: “A Letlole la Modimo wa Iseraele le isiwe kwa Gathe.” Ke fa ba le isa teng. ₉Mme ya re ba sena go le isa teng, seatla sa Morena sa lwa le motse oo ka tlhakatlhakanyo e kgolo thata, a otla banna ba motse oo ba bagolo le ba bannye, ba duwa ke ditlhagala. ₁₀Ke fa ba romela Letlole la Modimo kwa Ekerone. Mme ya re Letlole la Modimo le fitlha kwa Ekerone, ba Ekerone ba goa ba re: “Ba tlisitse Letlole la Modimo wa Iseraele kwa go rona go re bolaya le morafe wa rona.” ₁₁Ke fa ba roma ba phutha dikgosana tsotlhe tsa Bafelesita ba re: “Romelang Letlole la Modimo wa Iseraele kwa gongwe, a le boele kwa felong ga lone gore le se ka la re bolaya le morafe wa rona.” Motse otlhe o ne o tshogile lwa go swa. Seatla sa Modimo sa ba imela thata gona. ₁₂Batho ba ba se kang ba swa ba bediwa ka ditlhagala; go lela ga motse ga tlhatlogela kwa legodimong.