1 SAMUELE 1

₁Go no go le monna mongwe wa kwa Rama wa losika lwa ga Sufe lwa kwa dithabeng tsa Eferaime. Leina la gagwe e ne e le Elekana morwa Jerohame morwa Elihu morwa Thohu morwa Sufe wa Moeferaime. ₂O ne a na le basadi ba le babedi, leina la mongwe e le Hana, leina la yo mongwe e le Phenina. Phenina o ne a na le bana, mme Hana a se na bana. ₃Monna yoo o ne a tloga ka ngwaga le ngwaga mo motseng wa ga gabo go ya go obamela Morena wa masomosomo le go mo tlhabela ditlhabelo kwa Silo. Teng go ne go le bomorwa Eli ba babedi, Hofeni le Phinehase, e le baperesiti ba Morena. ₄Jaanong e ne ya re ka letsatsi le Elekana a dirang setlhabelo ka lone, a nee Phenina mosadi wa gagwe le bana botlhe ba gagwe ba basimane le ba basetsana dikabelo, ₅mme a nee Hana kabelo e le nngwe e e kana ka tse pedi; gonne o ne a rata Hana bogolo, le fa Morena a mo timile bana. ₆Mme mogadikae a bo a mo tlhoafaditse ka dikgobo gore a mo utlwise botlhoko, ka Morena a mo timile bana. ₇Go ne go dirafala jalo ka ngwaga le ngwaga, fa go iwa kwa Ntlong ya Morena, Phenina a mo rumole, Hana a lele, a se ke a je. ₈Mme Elekana monna wa gagwe a mo ree a re: “Hana, o lelelang? Ke eng fa o sa je? O utlwisitswe ke eng botlhoko? A ga ke molemo mo go wena go feta basimane ba le some?”

₉E kile ya re ba sena go ja le go nwa kwa Silo, Hana a nanoga. Moperesiti Eli a ntse a dutse fa mojakong wa Tempelana ya Morena.

₁₀Hana a lela thata, a rapela Morena ka pelo e e galakang, ₁₁a ikana maikano a re: “Morena wa masomosomo, fa o ka leba pogisego ya lelata la gago, wa nkgopola, wa se ka wa lebala lelata la gago, wa naya lelata la gago ngwana wa mosimane, foo ke tla mo neela Morena ka malatsi otlhe a bophelo jwa gagwe, mme ga a kitla a angwa ke logare mo tlhogong.”

₁₂Jaanong ya re a ntse a rapela ka boleele fa pele ga Morena, Eli a ela molomo wa gagwe tlhoko. ₁₃Gonne Hana o ne a bua ka pelo, go tshikinyega molomo fela, lentswe la gagwe le sa utlwale. Eli a gopola gore mosadi yo, o tagilwe. ₁₄Jaanong Eli a mo raya a re: “O tla itshola jaaka letagwa go fitlha leng? Tlogela botagwa.”

₁₅Mme Hana a fetola a re: “Nnyaya, morena wa me, ke mosadi yo o pelo e botlhoko. Weine le bojalwa ga ke a di nwa, mme ke tsholotse tsa pelo ya me fa pele ga Morena. ₁₆O se ka wa kaya lelata la gago mosadi yo e seng wa sepe; gonne ke ntse ke buisiwa ke botlhoko jwa me le masetlapelo a magolo a me go fitlha jaanong.”

₁₇Eli a mo fetola a re: “Tsamaya ka kagiso! Modimo wa Iseraele o tla go naya se o se kopileng mo go ona.”

₁₈Hana a re: “A lelata la gago le bone bopelotlhomogi mo matlhong a gago.” Jaanong mosadi yoo a tsamaya, a feta a ja; sefatlhego sa gagwe sa bo se sa tlhole se tlhontse.

₁₉Ka moso ba phakela, ba obamela fa pele ga Morena; jaanong ba tsamaya ba boela kwa ga bone kwa Rama. Elekana a itse Hana mosadi wa gagwe, mme Morena a mo gopola. ₂₀Hana a ithwala, a belega ngwana wa mosimane ka bofelo jwa ngwaga, a mo taya leina la Samuele; gonne a re: “Ke mo kopile Moreneng.”

₂₁Jaanong ya re isago Elekana, monna yoo, a tlhatloga le botlhe ba lelapa la gagwe go tlhabela Morena ditlhabelo tsa ngwaga le tsa maikano a gagwe, ₂₂Hana a se ka a tlhatloga, a raya monna wa gagwe a re: “Ke tla ya teng mosimane a sena go kgwa gore ke tle ke mo supe fa pele ga Morena, a nne teng ka bosakhutleng.”

₂₃Elekana, monna wa gagwe, a mo raya a re: “Dira ka fa o bonang go siame ka teng. Sala mo gae go tsamaya o be o mo kgwise. Fela a Morena a dirafatse lefoko la gago.” Mosadi a sala mo gae, a amusa morwawe ga tsamaya a mo kgwisa.

₂₄Mme e rile a sena go mo kgwisa, a tlhatloga ka ene, a na le poo ya dinyaga tse tharo le efa ya bupe e le nngwe le lekuka la weine; a mo isa jalo kwa Ntlong ya Morena kwa Silo, mme ngwana a bo a sa le monnye. ₂₅Jaanong ba tlhaba poo, ba isa mosimane kwa go Eli. ₂₆Hana a re: “Ka thapelo, morena wa me! Ka bophelo jwa gago, morena wa me! Ke nna mosadi yole yo o kileng a ema fano go wena go rapela Morena. ₂₇Ke kopile mosimane yo, mme Morena o nneile se ke se kopileng mo go ene. ₂₈Ka moo le nna ke mo neela Morena ka malatsi aotlhe a bophelo jwa gagwe. Kana o kopilwe mo Moreneng.” Mme Hana a mo tlogela teng fa pele ga Morena.