1 MAKABISE 7

₁E rile ka ngwaga wa 150 Demeteriuse, morwa Seleukuse, a falola kwa Roma, mme a fitlha le banna ba se kaee kwa motseng mongwe o o bapileng le lewatle. A feta a busa koo. ₂Ya re a tsena mo mafatsheng a puso ya bagologolo ba gagwe, batlhabani ba lekoko la ntwa la gagwe ba tšhwara Antiokuse le Lisiase, ba ikaeletse go mo lere kwa go ene. ₃Fela e rile a utlwa selo se a re, “Ke se ka ka bo ka ba bona.” ₄Ke fa batlhabani ba lekoko ba ba bolaya; Demeteriuse a ba a tsaya setilo sa puso ya gagwe.

₅Baitimokanyi le baikepi botlhe ba Iseraele ba bo ba tla kwa go ene, ba eteletšwe pele ke Alekimuse, yo o neng a ntse a eletsa thata go nna moprista yo mogolo. ₆Ba bua batho mašwe mo kgosing. Ba re, “Judase le bomorwarraagwe ba bolaile ditsala tsa gago tsotlhe, a bo a re ntsha mo lefatsheng la rona. ₇Roma mongwe fela yo O mo ikanyang. A ye go bona fela ka mo Judase a re senyeditseng mo go mašwe ka teng le lefatshe la kgosi, mme a otlhaye balotsananyana ba, le botlhe ba ba ba thusang.”

₈Kgosi ya bo e tlhopha Bakitese, yo e neng e le mongwe wa ditsala tsa kgosi, molaodi wa lefatshe le le ka kwa ga noka, yo e neng e le monna yo o tlotlegileng, yo o ikanyegang mo kgosing. ₉A mo roma le Alekimuse wa moikepi, yo o neng a mo tlhoma moprista yo mogolo, a bo a mo laela go otlhaya Baiseraele. ₁₀Ba bolola, he, ka namane e tona ya mophato. Ya re ba fitlha kwa lefatsheng la Juta ba laetsa batho kwa go Judase le bomorwarragwe go ba bolelela mafoko a kagiso, fela a a tletseng bolotsana. ₁₁Fela bone ba se ka ba ikanya batho ba, ka gore ba ne ba tsile ka batlhabani ba bantsi.

₁₂Le fa go ntse jalo setlhopha sa bakwadi se ne sa ya go itlhagisa fa pele ga bo-Alekimuse le Bakitese go kopa tumalano e e nang le tshiamo. ₁₃Bahasidea e ne ya nna bone ba ntlha mo Baiseraeleng go kopa tumalano ya kagiso. ₁₄Ka gore ba ne ba akanya jaana, ba re, “Yo ke moprista wa lotso lwa ga Arone, yo o tsileng ka mephato e e tlhometseng. Ga a na go re utlwisa botlhoko.” ₁₅Mme tota o ne a bo a rerisana nabo kaga tumalano ya kagiso a bo a ikana fa pele ga bone a re, “Ga re kitla re be re lo utlwisa botlhoko lona kgotsa ditsala tsa lona.” ₁₆Ba mo dumela. Fela ene a tšhwara ba le 60 ba bone, a ba bolaya ka letsatsi le le lengwefela, fela jaaka mafoko a Lokwalo a re,

₁₇“Ba gasagasitse nama ya baitshepi ba gago, ba tshololela madi a bone gongwe le gongwe mo Jerusalema, mme ga bo go se na ope go epa lebitla!”

₁₈Batho botlhe ya re ba bona se, ba tshoga mo go mašwe. Ba bua ba re, “Ga go na boammaaruri le tshiamo mo go bone. Ba tlhanogetse tumalano ya bone le maikano a bone.” ₁₉Ke fa Bakitese a tswa mo Jerusalema, a ya go thibelela kwa Bethesaithe. Mme ya re a le koo a romela batho go ya go tšhwara ba le bantsi ba banna ba ba neng ba mo tlhanogetse ba mo tlogela, le batho ba bangwe. A ba bolaya, a ba latlhela mo ledibeleng le legolo. ₂₀A bo a tlhoma Alekimuse mmusi wa kgaolo eo, a mo tlogelela lekoko la ntwa gore le nne le mo thuse. Bakitese ene a boela kwa kgosing.

₂₁Alekimuse a nna a kgaratlhela go nna moprista yo mogolo. ₂₂Mme botlhe ba ba neng ba kgobera kagiso ya batho ba ne ba tsena mo lesomong la gagwe. Ba laola lefatshe la Juta. Ba dira tshenyo e ntsi mo Iseraele. ₂₃E rile Judase a bona gore Alekimuse le bathusi ba gagwe ba diretse Baiseraele dilo tse di mašwe go feta baheitane, ₂₄a ya le lefatshe lotlhe la Juta, a ikotlhaela botlhe ba ba neng ba mo tlhanogetse, a bo a ba itsa go tsamaya jaaka ba rata mo lefatsheng. ₂₅Ya re Alekimuse a bona ka mo Judase le bathusi ba gagwe ba neng ba nonofile ka teng a lemoga gore o ne a ka se ka a bo a emelana nabo. A bo a boela kwa kgosing kwa a neng a feta a ba bua mašwe teng.

₂₆Kgosi e ne ya roma Nikanore, mongwe wa magosana a gagwe yo e neng e le Motlotlegi le motlhoi yo mogolo wa Iseraele, a mo laela go fetsa batho ka go ba bolaya. ₂₇Ya re a fitlha kwa Jerusalema ka namane e tona ya palo ya batlhabani, a romela batho kwa go Judase le bomorwaraagwe ka ditherisano tsa kagiso mme e le tsa bolotsana. ₂₈A re, “A nna le lona re se ka ra lwa. Ke tlaa tla le setlhotšwana sa batho go tla go lebagana le lona ka kagiso.” ₂₉A tla kwa go Judase mme ba dumedisana sentle fela ka kagiso. Fela mmaba o ne a setse a ipaakanyeditse go phamola Judase. ₃₀Ya re Judase a tla go lemoga gore Nikanore o tla mo go ene ka maikaelelo a bolotsana, a mmoifa mme a gana go tlhola a kopana nae. ₃₁Ke fa Nikanore a lemoga gore maanonyana a gagwe a senogile. A bo a ya go thulana le Judase ka ntwa gaufi le Kafaresalama. ₃₂Ga wa banna ba le 500 ba ga Nikanore. Ba bangwe ba tshabela mo motseng wa ga Dafita.

₃₃Morago ga ditiragalo tse Nikanore a tlhatlogela kwa Thabeng ya Sione. Bangwe ba baprista ba tšwa mo Felong mo go Boitshepo ba na le bagolwane bangwe, go tla go mo amogela ka kagiso le go mmontsha tshupelo ya phiso e e neng e ntshediwa kgosi. ₃₄Fela ene a ba sotla a ba tshega ka lonyatso. A ba lešwefatsa. A bua ka makgakga. ₃₅Ya re a ikana mo bogaleng jwa gagwe, a re, “Fa nka se ka ka neelwa Judase jaanong jaana le lekoko la gagwe la ntwa, ke a lo tlhomamisetsa: e tlaa re fela jaaka ke boa ke bolokesegile ke fete ke tshube ntlo e.” A bo a tsamaya a galefile.

₃₆Ke fa baprista ba boela mo teng, ba feta ba ema fa pele ga aletare le Felo ga Boitshepo, ba lela, ba re, ₃₇“O tlhophile ntlo e gore e bidiwe ka leina la gago, e bo e nne ntlo e batho ba gago ba rapelelang, ba bo ba kopela mo go yone. ₃₈A ko O ikotlhaele motho yo le lekoko la gagwe la ntwa. A ba bolawe ka tšhaka. Gakologelwa ditlontlololo tsa bone, mme O se ka wa bo wa naya nakonyana O ise O ba otlhaye.”

₃₉Nikanore o ne a tšwa mo Jerusalema mme a ya go thibelela kwa Bethehorone. Koo, lekoko la ntwa la Maasiria la feta la tsena mo lesomong la gagwe. ₄₀Fa tse di ntse di diragala Judase ene o ne a thibilela kwa Adasa le banna ba le 3 000. Mme a rapela jaana a re, ₄₁“E kile ya re barongwa ba kgosi ya Maasiria ba tlontlolola, moengele wa gago a ya go bolaya banna ba le 185 000 ba yone. ₄₂Ka mokgwa o o ntseng jalo, a re ke re go bone O pitla lekoko le la ntwa gompijeno, gore ba bangwe ba tle ba itse fa monna yo a tlhapaditse felo ga gago ga Boitshepo. A ko O mo atlhole ka mo bosula jwa gagwe bo tšhwanelang ka teng.”

₄₃Makoko a ntwa a thulana ka ntwa mo kgweding ya Adara e tlhola malatsi a le 13. Lekoko la ga Nikanore la fenngwa, mme ya nna ene wa ntlha go wa mo ntweng. ₄₄Ya re batlhabani ba mephato ya ga Nikanore ba bona gore o ole, ba latlhaganya dibetsa tsa bone ba inaya naga. ₄₅Bajuta ba ba alola nako ya loeto lwa letsatsi, go tšwa mo Adasa go fitlhelela ba atamela Gesere. Ba ntse ba letsa diphala tsa bone ba ba setse morago go tlhagisa batho. ₄₆Mme batho ba betsega mo metseng e e gaufi ya Juta, ba ba thibela, mo e leng gore ba ne ba bo ba boela kwa balaoding ba bone. Botlhe ba kgemethiwa ka tšhaka, ga se ka ga bo ga sala le fa a le mongwe-fela a tshela.

₄₇Ke fa ba itseela dikgapo le dithopo. Ba putla tlhogo ya ga Nikanore le letsogo la gagwe la moja le a neng a le tsholeditse go supa makgakga a gagwe. Dilo tse tsa tsisiwa, mme tsa beiwa fela ka fa ntle ga Jerusalema gore di bonwe ke mongwe le mongwe. ₄₈Batho ba itumela fela mo go mašwe mme ba tshegetsa letsatsi leo, e le letsatsi la boikhutso. ₄₉Mme ba dumalana gore ba le je moletlo ngwaga nngwe le nngwe fa Adara a tlhola malatsi a le 13. ₅₀Lefatshe la Juta la nna le kagiso nako e khutšhwane.