1 MAKABISE 14

₁Mo ngwageng ya 172 Kgosi Demeteriuse o ne a kokoanya mephato ya gagwe ya ntwa, mme a ya Media go ya go kopa thuso, gore a tle a lwe le Terifo. ₂Ya re Aresakese, Kgosi ya Peresia le Media, a utlwa gore Demeteriuse o tsenye mo kgaolong ya gagwe, a romela mongwe wa balaodi ba batlhabani ba gagwe go ya go mo tshwara a ntse a tshela. ₃Molaodi yo a ya a feta a fenya lekoko la ga Demeteriuse la ntwa, a tsaya ene Demeteriuse a mo isa kwa go Aresakese, mme ene a mo tlhatlhela mo kgolegelong.

₄Mo malatsing otlhe a ga Simone, lefatshe la nna le kagiso. O ne a batlela batho ba gagwe dilo tse di ba siametseng fela, mme botlhe ba ne ba itumelela taolo ya gagwe le maatlametlo a gagwe mo botshelong jotlhe jwa gagwe. ₅Mme go feleletsa maatlametlo otlhe a gagwe o ne a gapa motse wa Joppa mme a o dira boemela-dikepe jwa gagwe. Mme a nna le gone gore a fitlhe kwa ditlhaketlhakeng tsa lewatle. ₆O ne a atolosa melelwane ya setšhaba sa gagwe mme a nna le taolo e e tletseng mo lefatsheng. ₇O ne a abela magolegwa a le mantsi manno. A fenya Gesere Bethesure, le Motsana wa Phemelo mme a ntsha dilo tsotlhe tse di sa itshekang mo go one; ga bo go se na ope yo o neng a ka emelana nae.

₈Ba lema lefatshe la bone ka kagiso, lefatshe la tlhagisa dijalo tse dintsi, ditlhare tsa ungwa maungo. ₉Bagolwane ba nna ba thubile kobo segole mo mebileng, ba ipuela ka letlhogonolo la bone fela; makawana a kgabile, a ikaparetse diaparo tsa ntwa. ₁₀A naya metse dijo ka metlha yotlhe, a ntse a tlhokometse gore e nne le diphemelo, go fitlhelela go tuma ga gagwe go utlwala kwa mafelong a lefatshe. ₁₁O ne a tsisetsa lefatshe kagiso, mme Iseraele a itumela thata. ₁₂Mongwe le mongwe o ne a nna ka fa tlase ga setlhare sa gagwe sa mofine le sa feige, mme go se na ope yo o ba tshosang. ₁₃Go ne go se na mmaba ope mo lefatsheng go ba tlhasela, mme dikgosi di ne di pitlilwe mo malatsing ao. ₁₄O ne a thatafatsa baikokobetsi botlhe ba batho ba gagwe, mme a leleka baitimokanyi le baikepi botlhe. A leka thata go tshegetsa Molao. ₁₅O ne a galaletsa Tempele seša, a e tlatsa dijana tse di boitshepo.

₁₆E rile batho kwa Roma le kwa Separta ba utlwa gore Jonathane o sule ba utlwa botlhoko thata. ₁₇Mme ya re fela ba utlwa gore Simone morwarraagwe o tsere maemo a gagwe e le moprista yo mogolo le gore ke morena wa lefatshe le metse e e mo go lone, ₁₈ba mo kwalela mo dikwalelong tsa kgotlho go ntšhafatsa kgolagano ya botsala le tshwaragano e ba neng ba kile ba e dira le bomorwarraagwe bo-Judase le Jonathane, ₁₉mme lokwalo lo lo ne lwa balwa fa pele ga phuthego kwa Jerusalema. ₂₀Mafoko a lokwalo lo lo neng lwa romelwa ke Maseparta ke a:

₂₄Morago ga mo Simone o ne a roma Numeniuse kwa Roma a tshotse thebe ya gouta e tona, ya bokete jwa dimina di le 1 000 go ya go tiisa tshwaragano le Baroma.

₂₅E rile ditiragalo tse di bolelelwa batho, ba re, “Re a bo re ka bontsha Simone le bomorwawe jang gore re itumetse? ₂₆O ne a tlhomame, ene le bomorwarraagwe le ba-ntlo ya ga rraagwe, a lwa le baba ba lefatshe la Iseraele, mme a le bapalela kgololesego.” Jalo he, ba ne ba kwala mo dikwalong tsa kgotlho mme ba baya mokwalo o mo maotwaneng mo godimo ga Thaba ya Sione. ₂₇Mafoko a se ba neng ba se kwala ke a: “Ka letsatsi la bo-18 la kgwedi ya ga Elule mo ngwageng wa 172 e leng ngwaga wa boraro wa ga Simone moprista yo mogolo yo o tlotlegang kwa Asaramele, ₂₈mo phuthegong e kgolo ya baprista le batho, baeteledipele ba setšhaba le bagolwane ba lefatshe, re ne ra bolelelwa selo se: ₂₉Fa go ne go ntse go lowa gantsi mo lefatshing, Simone morwa Mathatia, letlhogela la lotso lwa ga Joaribe, le bomorwarraagwe ba ne ba nna ba ipaya mo diphatseng mme ba emelana le baba ba setšhaba sa bone go sireletsa felo ga bone ga boitshepo le Molao, mme ka mokgwa oo, ba dira gore setšhaba sa bone se galalediwe thata. ₃₀Jonathane o ne a bopaganya setšhaba, mme a nna moprista yo mogolo mo go sone, a bo tseelwa kwa bagologolong ba gagwe. ₃₁Baba ba bone ba ne ba loga maano a go tlhasela lefatshe la bone, gore ba senyake kgaolo ya bone, mme ba gape Felo ga bone ga Boitshepo. ₃₂Ke fa Simone a ema ka dinao a lwela setšhaba sa ga gabo. O ne a dirisa khumo ya gagwe go rekela batlhabani ba setšhaba ditlhomelo le go ba duela. ₃₃A thatafatsa metse ya Juta le Bethesure mo molelwaneng wa Juta, kwa polokelo ya dibetsa tsa baba e ne e kile ya nna teng, mme a baya teng batlhabani-maleta-motse ba masole a Bajuta. ₃₄O ne a thatafatsa motse wa Joppa gaufi le lewatle, le Gasere mo melelwaneng ya Asotuse, kwa go kileng ga bo go nna baba teng. A dira motsana wa Bajuta teng mme a ba naya tsotlhe tse ba neng ba di tlhoka gore a ke a ba etleetse. ₃₅Batho ba ne ba bona boikanyego jwa ga Simone, le gore o ikaeletse go tsisetsa setšhaba sa ga gagwe kgalalelo. Ba ne ba mo dira moeteledipele wa bone le moprista yo mogolo ka ntlha ya ditiro tse tsotlhe tse a neng a kgonne go di dira le tshiamo le boikanyego jo a neng a bo bontshitse setšhaba sa gagwe, le ka ntlha ya gore o ne a leka ka bojotlhe jwa gagwe go nna a oketsa tlotlo ya batho ba ga gabo.”

₃₆Mo nakong le mo tsamaisong ya gagwe ba ne ba kgona go ntsha baheitane mo lefatshing le la bone, mmogo le botlhe ba ba neng ba le mo Motsaneng wa ga Dafita kwa Jerusalema, ba ba neng ba o fetotse motsana wa phemelo o ba neng ba a tle ba betsege mo go one go ya go lešwefatsa malwapa a felo ga Boitshepo le go nna ba kgotlela go itshepa ga one. ₃₇O ne a baya masole a Bajuta teng a bo a o thatafatsa gore o tle o sireletse lefatshe le motse, a godisa dipotana tsa Jerusalema. ₃₈Ka ntlha ya selo se Demeteriuse o ne a mo tlhomamisa mo tirong ya gagwe ya go nna moprista yo mogolo. ₃₉A mo dira mongwe wa ditsala tsa gagwe, mme a mo naya ditlotla tse di kwa godimo. ₄₀O ne a utlwile gore Baroma ba ne ba biditse Bajuta ditsala, batshwaragani, le bakaulengwe, le gore ba ne ba amogetse baemedi ba ga Simone ka tlotlo e kgolo, ₄₁le gore, go feta moo, Bajuta le baprista ba ne ba dumalanye gore Simone a nnele ruri moeteledipele le moprista yo mogolo wa bone, go fitlhelela go tlhaga moprofeta yo o ikanyegang, ₄₂le gore o tshwanetse go nna molaodi wa bone, le go tlhokomela Felo ga Boitshepo le go tlhopha badiri ba ba neng ba tlaa tsamaisa ditiro tsa gone, go tsamaisa lefatshe, le go laola polokelo ya dibetsa le matlo e leng a phemelo, le gore a nne mookamedi wa felo ga boitshepo, ₄₃mme mongwe le mongwe a mo ikobele; le gore makwalo otlhe a semmuso mo lefatsheng a kwalwe ka leina la gagwe, le gore o tshwanetse go apara bohibidu jo bo mokgona, a bo a kgabe ka diaparo tsa gouta.

₄₄“Go ne go se na motho kgotsa moprista ope yo o neng a dumeletswe go tlhokomologa ditaelo tse le go nna kgatlhanong le se a se buang, kgotsa a epa pitso kae kgotsa kae mo lefatshing a sa letlelelwa ke ene, kgotsa a apara bohibidu jo bo mokgona kgotsa a kopela ka kgokelo ya gouta. ₄₅Mongwe le mongwe yo o neng a ya kgatlhanong le ditaelo tse kgotsa a di gana o ne a tshwanetse go otlhaiwa.

₄₆“Batho botlhe ba ne ba dumalana le go naya Simone tshwanelo ya go laolwa ke ditshwetso tse mo ditirong tsa gagwe. ₄₇Mme Simone o ne a dumalana le go nna moprista yo mogolo le go dira tiro ya motsamisi wa batlhabani le moeteledipele wa Bajuta le baprista ba bone, le go okama botlhe.”

₄₈Ba laela gore taelo e kwalwe mo dikwalelong tsa kgotlho mme e bewe mo pontsheng mo lolwapeng lwa Temepele, ₄₉le gore mafoko a yone a bewe mo letloleng la dikhumo, mme kwalololo ya yone e newe Simone le bomorwawe.