1 DIKGOSI 22

₁Ba ne ba nna kagisong dinyaga di le tharo go se na ntwa fa gare ga Basiria le Baiseraele. ₂Ka ngwaga wa boraro kgosi ya Iseraele ya etelwa ke Josafate kgosi ya Juta.

₃Ke fa kgosi ya Iseraele e raya batlhanka ba yona e re: “A lo a itse gore, motse wa Ramothe kwa Gileate ke wa rona? Mme re ituletse fela, ga re o gape mo diatleng tsa kgosi ya Siria.” ₄Ya ba ya botsa Josafate ya re: “A o tla ya le nna kwa tlhabanong kwa Ramothe mo Gileate?” Josafate a araba kgosi ya Iseraele a re: “Re tla ya mmogo, morafe wa me le wa gago, dipitse tsa me le tsa gago.” ₅Josafate a ba a raya kgosi ya Iseraele a re: “A ko o botse lefoko la Morena pele.”

₆Ke fa kgosi ya Iseraele e kgobokanya baporofeti, e ka ne e le banna ba le 400, e ba botsa e re: “A ke ke ye go lwela Ramothe kwa Gileate, kampo ke lese?” Ba araba ba re: “Bolola, Morena o tla mo neela mo diatleng tsa kgosi.”

₇Mme Josafate a re: “A ga go na moporofeti yo mongwe wa Morena mono yo re ka mmotsang?”

₈Kgosi ya Iseraele ya araba Josafate ya re: “Go sa ntse go le monna a le mongwe yo re ka botsang Morena ka ene, mme ke mo tlhoile, gonne ga a bolelele pele tse di molemo ka ga me, fa e se tse di bosula fela. Ke Miga morwa Imela.” Mme Josafate a re: “A kgosi e se re jalo.”

₉Ke fa kgosi ya Iseraele e bitsa modiredi mongwe wa lapa la yona e re: “Akofa o bitse Miga morwa Imela.”

₁₀Mme kgosi ya Iseraele le Josafate kgosi ya Juta tsa bo di dutse nngwe le nngwe mo sedulong sa yona sa bogosi, di apere tsa bogosi, e le mo seboaneng fa mojakong wa kgoro ya Samaria, baporofeti botlhe ba ntse ba bolela pele fa pele ga tsona. ₁₁Mme Setekia morwa Kenana o ne a itiretse dinaka tsa tshipi, a tla natso a re: “Morena o bua jaana a re: ‘O tla tlhaba Basiria ka dinaka tse go fitlhelela ba felelele.’ ” ₁₂Le baporofeti botlhe ba bolelela pele jalo ba re: “Bololela motse wa Ramothe kwa Gileate. O tla nna tlhogonolo, mme Morena o tla o neela mo diatleng tsa kgosi.”

₁₃Mme morongwi yo o neng a ile go bitsa Miga a mo raya a re: “A ko o bone, mafoko a baporofeti a a utlwana, a molemo mo kgosing. Ka thapelo a lefoko la gago le tshwane le lefoko la mongwe wa bone, o bue tse di molemo.”

₁₄Mme Miga a re: “Ka bophelo jwa Morena! Ke tla bua tse Morena o di ntaelang.”

₁₅Ya re a fitlha kwa kgosing, kgosi ya mmotsa ya re: “Miga, a ke re ye kwa Ramothe kwa Gileate go tlhabana kampo re lese?” A e araba a re: “Bolola, o tla nna tlhogonolo, mme Morena o tla o neela mo diatleng tsa kgosi.”

₁₆Mme kgosi ya mo raya ya re: “Ke go ikanisega kae gore o se ka wa mpolelela sepe fa e se boammaaruri fela mo leineng la Morena?”

₁₇A fetola a re: “Ke bonye Baiseraele botlhe ba phatlaletse kwa dithabeng jaaka dinku tse di se nang modisa. Mme Morena a re: ‘Ga ba na morena. A mongwe le mongwe a boele kwa gae ka kagiso!’ ”

₁₈Ke fa kgosi ya Iseraele e raya Josafate e re: “A ga ke a go bolelela gore ga a bolele pele tse di molemo ka ga me fa e se tse di bosula fela.”

₁₉Miga a ba a re: “Ka moo utlwa lefoko la Morena. Ke bonye Morena a dutse mo sedulong sa gagwe sa bogosi le mephato yotlhe ya legodimo e eme fa go ene mo ntlheng ya le le jang la gagwe le mo ntlheng ya la molema. ₂₀Morena o rile: ‘Ke mang yo o tla tsietsang Ahabe gore a bolole, a tle a swele kwa Ramothe kwa Gileate?’ Mongwe a bua jaana, yo mongwe a bua kago sele. ₂₁Ga tlhagelela mowa wa ema fa pele ga Morena wa re: ‘Ke nna ke tla mo tsietsang.’ ₂₂Mme Morena a o botsa a re: ‘Ka eng?’ Wa re: ‘Ke tla bolola go ya go nna mowa wa maaka mo melomong ya baporofeti botlhe ba gagwe.’ Morena a re: ‘O tla mo tsietsa, le gona o tla mo kgona. Tsamaya o dire jalo.’

₂₃“Jaanong he, bona, Morena o tsentse mowa wa maaka mo melomong ya baporofeti botlhe ba ba gago, mme tota Morena o buile tsa tatlhego ka ga gago.”

₂₄Ke fa Setekia morwa Kenana a atamela a faphola Miga mo lesameng a re: “Mowa wa Morena o ntlogetse jang, wa bua nao?”

₂₅Miga a araba a re: “O tla bona ka letsatsi leo o tla tsenang ntlo le ntlwana ka lone go ya go iphitlha.”

₂₆Mme kgosi ya Iseraele ya re: “Tshwara Miga, o mo ise kwa go Amone molaodi wa motse le kwa go Joase morwa kgosi, ₂₇o re: ‘Kgosi e buile jaana ya re: Tsenyang yo mo ntlong ya kgolegelo, a jele bogobe tlase, le metsi a se ka a mo lekana go fitlhelela ke boe ka kagiso.’ ”

₂₈Mme Miga a re: “Fa o boa tota ka kagiso, Morena o tla bo a sa bua ka nna.” A ba a re: “Utlwang, lona merafe yotlhe!”

₂₉Jaanong kgosi ya Iseraele le Josafate kgosi ya Juta tsa bololela Ramothe kwa Gileate. ₃₀Mme kgosi ya Iseraele ya raya Josafate ya re: “Ke tla ba ikgakisa, ke tsena jalo mo tlhabanong, wena o nne o ntse o apere diaparo tsa gago tsa bogosi.” Kgosi ya Iseraele ya apara diaparo di sele, ya tsena jalo mo tlhabanong.

₃₁Mme kgosi ya Siria e ne e laetse balaodi ba dikoloi tsa ntwa di le 32 tsa yona ya re: “Lo se ka lwa tlhabana le ope yo monnye gongwe yo mogolo fa e se le kgosi ya Iseraele e le yosi fela.” ₃₂Mme e rile balaodi ba dikoloi ba bona Josafate, ba re: “Ahee, ke ene kgosi ya Iseraele!” mme ba fapogela kwa go ene go tlhabana nae. Ke fa Josafate a goa. ₃₃Mme ya re balaodi ba dikoloi ba lemoga gore ga se ene kgosi ya Iseraele, ba boa, ba mo tlogela. ₃₄Mme monna mongwe a gagamatsa bora, a hula fela ka phopholetso, a tlhaba kgosi ya Iseraele fa makopanong a diaparo tsa tshipi. Mme kgosi ya raya mokgweeletsi wa yona ya re: “Sokolola koloi o nntshe mo tlhabanong, gonne ke khutlegile.”

₃₅Jaanong ya re tlhabano e gakala ka letsatsi leo, kgosi ya bo e eme ka go itshoka mo koloing e lebaganye le Basiria. Mme mantsiboa ya swa, koloi e tletse madi a ntho ya yona. ₃₆Mme ya re letsatsi le phirima, ga utlwala mokgosi mo bothibelelong o o reng: “A mongwe le mongwe a boele kwa motseng wa ga gabo le kwa nageng ya ga gabo.”

₃₇Kgosi ya swa jalo, ya isiwa kwa Samaria, ya fitlhwa teng. ₃₈Mme ya re ba tlhatswa koloi fa letsheng la Samaria, dintšwa tsa latswa madi a yona, mme diaka tsa tlhapa teng ka fa lefokong la Morena le o le buileng.

₃₉Ditirafalo tse dingwe tsa ga Ahabe le tsotlhe tse o neng a di dira le ntlo ya dinaka tsa tlou e o neng a e aga le metse yotlhe e o e agileng kana di kwadilwe mo lokwalong lwa ditirafalo tsa sebaka sa dikgosi tsa Iseraele. ₄₀Mme Ahabe a robala le borraagwe, mme Ahasia morwawe a nna kgosi mo boemong jwa gagwe.

₄₁Josafate morwa Asa o ne a simolola go busa Juta ka ngwaga wa bone wa puso ya ga Ahabe kgosi ya Iseraele. ₄₂E rile Josafate a simolola go busa, a bo a le dinyaga di le 35; a busa dinyaga di le 25 kwa Jerusalema; leina la ga mmaagwe e le Asuba morwadia Silegi. ₄₃O ne a sepela gotlhe mo tseleng ya ga Asa rraagwe a sa fapoge mo go yona; a dira tse di siameng mo matlhong a Morena. ₄₄Fela dithota tsa tlhabelo ga di a ka tsa tlosiwa. Batho ba ne ba sa ntse ba dira ditlhabelo le go tshuba maswalo mo dithoteng tsa tlhabelo.

₄₅Josafate o ne a agisanya le kgosi ya Iseraele. ₄₆Ditirafalo tse dingwe tsa ga Josafate le ditiro tsa bopelokgale tsa gagwe tse o neng a di dira le ka fa a tlhabanyeng ka teng kana di kwadilwe mo lokwalong lwa ditirafalo tsa sebaka sa dikgosi tsa Juta.

₄₇Le masalela a banna ba ba direlang medimo ka boaka a a neng a setse mo malatsing a ga Asa rraagwe, Josafate a a nyeletsa mo lefatsheng.

₄₈Mme ga bo go se na kgosi kwa Etomo ka sebaka seo; go busa monna yo o beilweng. ₄₉Le gona Josafate o ne a dira dikepe tsa Tharesise go ya go tsaya gouta kwa Ofire, mme tsa se ka tsa ya, ka di ne di robega kwa Esione-Gebere.

₅₀Ka sebaka sele Ahasia morwa Ahabe a raya Josafate a re: “A batlhanka ba me ba tsamae le batlhanka ba gago mo dikepeng;” mme Josafate a gana.

₅₁Mme Josafate a robala le borraagwe, a fitlhwa fa go borraagwe mo motseng wa ga Dafita rraagwe, mme Jorame morwawe a nna kgosi mo boemong jwa gagwe.

₅₂Ahasia morwa Ahabe a nna kgosi ya Baiseraele kwa Samaria ka ngwaga wa 17 wa puso ya ga Josafate kgosi ya Juta; a busa Iseraele dinyaga di le pedi. ₅₃A dira tse di bosula mo matlhong a Morena, a sepela mo tseleng ya ga rraagwe le mo tseleng ya ga mmaagwe le mo tseleng ya ga Jerobeame morwa Nebate yo o neng a leofisa Baiseraele. ₅₄A direla Baale, a mo obamela, a galefisa Morena Modimo wa Iseraele, fela jaaka rraagwe a ne a dira.