DIPESALEME 82

Modimo o eme

mo phuthegong ya medimo;

o atlhola fa gare ga medimo.

₂Lo tla atlhola ka tshiamololo

goleele go le kae,

lo ntse lo gobelelela baikepi? Sela.

₃Siamisetsang ba babotlana

le dikhutsana;

nayang batlalelwi le batlhoki

se se ba tshwanetseng.

₄Pholosang ba babotlana

le bahumanegi;

lo ba golole mo diatleng

tsa baikepi.

₅Medimo eo ga e na temogo,

ga e na tlhaloganyo;

e kgarakgatshega mo lefifing;

metheo yotlhe ya lefatshe

e a tshikinyega.

₆Nna ka nosi ke rile, lo medimo;

mme lotlhe lo bomorwa

Mogodimodimo.

₇Mme ruri, lo tla swa jaaka batho,

lo tla wa jaaka mongwe wa ditona.

₈Tloga o eme, Modimo,

o atlhole lefatshe;

gonne o tla rua ditšhaba tsotlhe.