DIPESALEME 47

₂Lona merafe yotlhe, opang diatla,

dudueletsang Modimo

ka kopelo ya maipelo!

₃Gonne Morena Mogodimodimo

o a boitshega;

ke kgosi e kgolo

mo lefatsheng lotlhe.

₄O digela merafe fa tlase ga rona

le ditšhaba fa tlase

ga dinao tsa rona.

₅O re tlhophela boswa jwa rona,

boipelafalelo jwa ga Jakobe

yo a mo ratileng. Sela.

₆Modimo o tlhatloga ka tuduetso,

Morena o tlhatloga

ka tumo ya phala.

₇Opelelang Modimo pako,

o opeleleng;

opelelang kgosi ya rona pako,

opelang!

₈Gonne Modimo

ke kgosi ya lefatshe lotlhe;

opelang sefela se se utlwalang.

₉Modimo o busa merafe;

Modimo o ntse mo sedulong

sa bogosi sa ona se se boitshepo.

₁₀Batlotlegi ba merafe ba phuthegile,

e bong batho

ba Modimo wa ga Aborahame;

gonne dithebe tsa lefatshe

ke tsa Modimo,

o mogolo bogolo.