DIPESALEME 149

₁Haleluya! Opelelang

Morena sefela se sešwa

le pako ya gagwe mo phuthegong

ya baratwi!

₂A Iseraele a itumelele

Modiri wa gagwe;

a bana ba Sione ba dudueletse

kgosi ya bona!

₃A ba bake leina la gagwe ka dipina,

ba mo leletse moropa le harepa.

₄Gonne Morena o natefelwa

ke batho ba gagwe;

o kgabisa ba ba pelonolo

ka pholoso.

₅A baratwi ba letse megolokwane

ka tlotlo;

ba duduetse ba le mo malaong

a bona,

₆dipôkô tsa Modimo

di le mo melomong ya bona

le tšhaka e e magale mabedi

mo diatleng tsa bona,

₇go dirafatsa pusoloso

mo ditšhabeng

le dipetso mo merafeng

₈go golega dikgosi tsa yona

ka dikeetane

le batlotlegi ba yona

ka mefiri ya tshipi

₉go dirafatsa mo go bona

katlholo e e kwadilweng.

Seo ke tlotlo ya baratwi

ba gagwe.

Haleluya!