DIPESALEME 141

Morena, ke a go bitsa;

itlhaganele, o tle go nna;

utlwa lentswe la me,

fa ke goela go wena.

₂A thapelo ya me e nne

jaaka maswalo fa pele ga gago;

a tsholetso ya me ya mabogo

e nne jaaka tshupelo ya maitsiboa.

₃Morena,

beela molomo wa me tiso;

lebelela mojako wa molomo wa me.

₄Se sokololele pelo ya me

kwa selong se se bosula

go dira ditiro tsa boikepo

le banna ba ba dirang bosula,

mme a ke se je monate o ba o jang.

₅Mosiami a ka ntitaya, ke ka lorato,

a ka nkwatlhaya,

ke lookwane lwa tlhogo;

tlhogo ya me ga e kitla e lo gana.

Le fa go ntse jalo ke rapela

ka ntlha ya masula a bona.

₆Fa baatlhodi ba bona

ba digwa mo makgotlhong,

ba tla utlwa mafoko a me,

fa e le a a monate.

₇Marapo a rona a gasagasegile

fa mojakong wa felo ga baswi

jaaka fa motho a lema,

a gagola lefatshe.

₈Gonne matlho a me a lebile wena

Modimo Morena;

ke batla botshabelo fa go wena;

se ntshe mowa wa me mo nameng.

₉Mphemele mo thateng ya segole

se ba nthaisitseng ka sona,

le mo dirung

tsa ba ba dirang bosula.

₁₀A baikepi ba wele mo lemeneng

la bona botlhe mmogo,

mogang nna ke fetang ke falola.