DIPESALEME 138

Ke tla go galaletsa

ka pelo yotlhe, ke go opelela pako

fa pele ga medimo.

₂Ke tla obamela ke lebile Tempele

e e Boitshepo ya gago,

ke galaletsa leina la gago

ka ntlha ya bopelontle jwa gago

le boikanyego jwa gago;

gonne o godisitse leina la gago

bogolo go tsotlhe.

₃O nkutlwile mo letsatsing

le ke go biditseng ka lone,

wa nnaya bopelokgale le thata

mo moweng.

₄Morena, dikgosi tsotlhe

tsa lefatshe di tla go galaletsa,

fa di utlwile mafoko

a molomo wa gago.

₅Di tla opela

ka ga ditsela tsa Morena,

ka kgalalelo ya Morena e le kgolo.

₆Gonne Morena o godimo,

mme o leba yo o boikokobetso;

mme yo o ikgodisang

ena o mo itse a sa le kgakala.

₇Fa ke tsamaya

ke le mo pitlaganong,

ke wena yo o mphedisang;

kgakalo ya baba ba me

o e ntshetsa seatla,

mme letsogo le le jang la gago

le a nthusa.

₈Morena o tla di nkgonela.

Bopelontle jwa gago, Morena,

ga bo na bokhutlo;

se tlogele ditiro tsa diatla tsa gago!