DIPESALEME 114

₁E rile Iseraele a huduga

kwa Egepeto,

le ba lapa la ga Jakobe

mo morafeng wa puo e sele,

₂Juta a nna felo ga boitshepo

ga gagwe,

le Iseraele ga puso ya gagwe.

₃Lewatle le bonye jalo, la tshaba;

Joretane a boa ka morago.

₄Dithaba di ne tsa ja mokaragana

jaaka diphelehu le makgabana

jaaka dikwana.

₅Ke eng, wena lewatle, fa o tshaba,

le wena Joretane,

fa o kata ka morago?

₆Ke eng lona dithaba,

fa lo ja mokaragana

jaaka diphelehu,

le lona makgabana,

fa lo etsa dikwana?

₇Wena lefatshe,

roroma fa pele ga Morena,

fa pele ga Modimo wa ga Jakobe,

₈o o fetotseng lefika letsha la metsi

le legakwa motswedi wa metsi.