DIANE 21

₁Pelo ya kgosi e tshwana le mesele ya metsi mo diatleng tsa Morena; o e isa gongwe le gongwe kwa a ratang teng.

₂Tsela nngwe le nngwe ya motho e tlhamaletse mo matlhong a gagwe, mme Morena ene o sekaseka dipelo.

₃Go dira ka tshiamo le ka tshwanelo go kgatlha Morena bogolo go setlhabelo.

₄Sefatlhego sa boikgodiso le pelo ya boikgantsho tse e leng go ikgatlha ga baikepi ke boleo fela.

₅Dikakanyo tsa yo o tlhaga di tsweletsa pele; mme yo o potlakang o itlhokisa fela.

₆Go batla mahumo ka loleme lwa maaka ke go latela boithamako jo bo isang losong.

₇Go gatelela ga baikepi go a ba golafatsa, gonne ba gana go dira tse di siameng.

₈Tsamao ya monna yo o molato e masokasoke, mme yo o phepa tiro ya gagwe e siame.

₉Go nna mo sekhutlong godimo ga ntlo go phala go nna mo ntlong mmogo le mosadi yo o omanang.

₁₀Pelo ya moikepi e eletsa bosula; ga a tlhomogele mongwe-ka-ene pelo.

₁₁Go otla mosotli ke go tlhalefisa yo o iseng a tlhalefe; mme letlhale le amogela kitso, fa le rutwa fela.

₁₂Yo o leng tshiamo o tlhokomela ntlo ya moikepi; o digela baikepi mo tatlhegong.

₁₃Yo o thibang tsebe gore a se utlwe go goa ga yo mmotlana, le ene e tla re a goa, a se ke a utlwiwe.

₁₄Mpho ya sephiri e tima bogale; thelesetso kobong e tima kgakalo e kgolo.

₁₅Ke boitumelo jwa mosiami, fa go dirwa ka tshiamo; mme mo go ba ba dirang tsa bolotsana ke therego.

₁₆Motho yo o fapogang mo tseleng ya tlhaloganyo o tla akofa a lala mo phuthegong ya baswi.

₁₇Yo o ratang botlhapelwa o tla tlhoka; yo o ratang weine le setlolo ga a nke a huma.

₁₈Serekololo sa mosiami ke moikepi; mo boemong jwa ba nnete go tla molotsana.

₁₉Go botoka go nna mo lefatsheng la sekaka bogolo go go nna le mosadi yo o omanang yo o ngongoregang ka metlha.

₂₀Khumo e ntlentle le lookwane di mo lapeng la yo o botlhale, mme motho yo o bosilo o a di senya.

₂₁Yo o latelang tshiamo le lorato o tla bona bophelo le pholoso le tlotlego.

₂₂Letlhale le fenya motse wa bagale; le diga phemelo e ba neng ba e ikanya.

₂₃Yo o disang molomo wa gagwe le loleme lwa gagwe o iphemela gore a se tsene mo ditlalelong.

₂₄Yo o ikgantshang, yo o ikgogomosang, leina la gagwe ke mosotli; o dira ka boikgantsho jo bo se nang tekanyo.

₂₅Keletso ya setshwakga e a se bolaya gonne diatla tsa sona di gana go dira.

₂₆Yo o pelotshetlha o eletsa letsatsi lotlhe, mme mosiami o a fa, ga a timane.

₂₇Setlhabelo sa moikepi ke maila Moreneng; bogolo fa a se tlisa ka maano a a bosula.

₂₈Mosupi wa maaka o tla latlhega; mme motho yo o utlwileng mafoko o tla bua tse di tlhomameng.

₂₉Moikepi o sefatlhego se matepe, mme wa nnete o siamisa tsamao ya gagwe.

₃₀Ga go na botlhale le e seng tlhaloganyo le e seng maano tse Morena a ka kgonwang ka tsona.

₃₁Pitse e etleeleditswe letsatsi la tlhabano; mme phenyo yona e tswa mo Moreneng.