DIANE 16

₁Sa motho ke go ikakanya, mme loleme lo tla fiwa karabo ke Morena.

₂Motho a re, ditsela tsotlhe tsa gagwe di itshekile, mme yo o tlhatlhobang mewa ke Morena.

₃Neela Morena ditiro tsa gago, foo maikaelelo a gago a tla dirafala.

₄Morena o bopetse dilo tsotlhe maikaelelo a gagwe; ee, le moikepi o mmopetse letsatsi la tatlhego.

₅Mongwe le mongwe yo o pelo e ikgodisang ke maila mo Moreneng; ruri, ga a kitla a tlhoka petso.

₆Molato o bipiwa ka bopelotlhomogi le ka boammaaruri; motho o tila bosula ka go boifa Morena.

₇Fa ditsela tsa monna di kgatlha Morena, le baba ba gagwe o tla ba agisanya nae.

₈Leruonyana la tshiamo le phala le legolo la tshiamololo.

₉Pelo ya motho e akanya tsela ya gagwe, mme Morena ke ene a tsamaisang dikgato tsa gagwe.

₁₀Katlholo e mo molomong wa kgosi; a molomo wa yona o se ka wa atlhola ka boikanyologo!

₁₁Seelo le selekanyetso tse di siameng ke tsa Morena; majwe otlhe a kgetsana a a supang bokete ke tiro ya gagwe.

₁₂Go dira tsa boikepo ke maila dikgosing; gonne sedulo sa kgosi se tlhomamisiwa ka tshiamo.

₁₃Melomo e e siameng e kgatlha dikgosi; di rata yo o bolelang tsa nnete.

₁₄Kgalefo ya kgosi e tshwana le barongwi ba loso; monna yo o botlhale o tla e tima.

₁₅Sefatlhego sa kgosi se se supang lorato se a phedisa; bopelontle jwa yona bo tshwana le leru la pula ya tlhakola-modula.

₁₆Go huma botlhale go phala gouta jang ne! Go huma tlhaloganyo go gaisa selefera.

₁₇Tsela e e katilweng ya batho ba nnete ke go tila bosula; yo o disang tsamao ya gagwe o boloka bophelo jwa gagwe.

₁₈Boikgodiso bo latelwa ke tatlhego; mowa o o ikgantshang o etelela go wa pele.

₁₉Go ikokobetsa le ba ba ikokobetsang go gaisa go abelana thopo le ba ba ikgodisang.

₂₀Yo o elang Lefoko la Modimo tlhoko o tla bona tlhogonolo. Go sego yo o ikanyang Morena.

₂₁Yo o pelo e botlhale o tla bidiwa motlhalefi; mafoko a a bonolo a tsweledisa thuto pele.

₂₂Tlhaloganyo ke motswedi wa bophelo mo go mong wa yona; mme masilo a otlwa ka bosilo jwa ona.

₂₃Pelo ya letlhale e ruta loleme lwa lone; le gona e godisa thuto mo molomong wa lone.

₂₄Mafoko a a monate ke mafura a dinotshe, a natefela pelo, a alafa le marapo.

₂₅Go na le tsela e e siameng mo matlhong a motho, mme bokhutlo jwa yona ke tsela ya loso.

₂₆Tlala ya modiri e a mo dirisa, gonne molomo wa gagwe o a mo kgweetsa.

₂₇Sekebeke se epela ba bangwe gopo ya tatlhego; e kete molelo o o fisang o mo molomong wa sona.

₂₈Molotsana o lotlhanya batho; mosenya-leina o kgaoganya ditsala.

₂₉Mosiamolodi o raela mongwe-ka-ene, o mo gogela mo tseleng e e seng molemo.

₃₀Yo o budulatsang matlho go loga maano a bolotsana, a ba a moma molomo o setse a dirile bosula.

₃₁Moriri o mmududu ke serwalo se sentlentle; se bonwa ka tsamao e e siameng.

₃₂Yo o pelotelele o phala seganka; yo o itseng go itshwara o gaisa mothopi wa motse.

₃₃Tengwa e kgotlokgodiwa mo pataneng ya seaparo, mme katlholo ya yona e tswa mo Moreneng.