DIANE 13

₁Ngwana yo o botlhale o laiwa ke rraagwe, mme mosotli ga a rate kgalemelo.

₂Motho o tla ja tse di monate tsa leungo la molomo wa gagwe, mme balotsana ba eletsa kgatelelo fela.

₃Yo o disang molomo wa gagwe o ipolokela bophelo; mmalabadi o tla wela theregong.

₄Motlapa o eletsa tse dintsi, mme ga a bone sepe; tse batlhoafadi ba di eletsang ba di bona ka botlalo.

₅Mosiami o tlhoa puo ya maaka, mme moikepi o nyefola ba bangwe, a itlhabisa ditlhong.

₆Tshiamo e boloka wa tsamao e e molemo, mme boleo bo diga baikepi.

₇Go na le yo o ipayang mohumi, le fa a se na sepe, le yo o ipayang mohumanegi, le fa a na le leruo le legolo.

₈Serekololo sa bophelo jwa motho ke khumo ya gagwe; mme motlhoki ga a utlwe go bôpêlwa.

₉Lesedi la mosiami le tuka sentle, mme dipone tsa baikepi di tla tima.

₁₀Ka boikgodiso go tsosiwa kgang fela, mme ba ba amogelang kgakololo ba botlhale.

₁₁Leruo le le bonwang ka boithamako le tla ngotlega, mme yo o le kgobokanyang ka tiro ya diatla o tla le ntsifatsa.

₁₂Tsholofelo e e diegang e lwatsa pelo, mme keletso e e dirafetseng ke setlhare sa bophelo.

₁₃Yo o nyatsang lefoko la Modimo, dipetso tsa lone di tla mo wela, mme yo o boifang taolo o tla fiwa tuelo.

₁₄Thuto ya letlhale ke motswedi wa bophelo gore motho a falole mo dirung tsa loso.

₁₅Kelelelo e e molemo e a kgatlhisa, mme tsela ya balotsana e ba isa mo tatlhegong.

₁₆Motlhalefi o dira tsotlhe ka kitso, mme seeleele se phatlalatsa bosilo.

₁₇Morongwi wa boikepo o tlhokisa boikhutso, mme morongwi yo o ikanyegang o tlisa namatshego.

₁₈Khumanego le nyatsego ke tsa yo o nyatsang thuto, mme yo o tlhokomelang kgalemelo o tla tlotlega.

₁₉Keletso e e dirafetseng e monate mo pelong mme go tshaba bosula go tena masilo.

₂₀Kopana le matlhale gore o tlhalefe; mme yo o tlwaelanang le masilo o tla nna bosula.

₂₁Tatlhego e latelela baleofi, mme Modimo o duela basiami ka tse di molemo.

₂₂Yo o molemo o tlogelela bana ba bana boswa, mme dithoto tsa moleofi di bolokelwa mosiami.

₂₃Tshimo e badidi ba e kgathileng e ntsha dijo tse dintsi; mme go na le ba ba latlhegang ka tshiamololo.

₂₄Yo o rekegelang thupa o tlhoile morwawe; yo o mo ratang o a tle a mo otle.

₂₅Mosiami o a ja a ba a kgore mme dimpa tsa baikepi di tla tlhoka di nna logaba.