DIANE 12

₁Yo o ratang kotlo o rata kitso. Yo o ilang kgalemelo ke seeleele.

₂Morena o kgatlhwa ke yo o molemo, mme o latlha mologa-maano-a-bosula.

₃Motho ga a kitla a tlhomama ka boikepo, mme medi ya basiami ga e nke e kumolwa.

₄Mosadi yo o maatlametlo ke serwalo sa monna wa gagwe; mme yo o tlhabisang ditlhong o tshwana le go tlhotlhona ga marapo a gagwe.

₅Megopolo ya basiami e batla tshiamo, mme maano a baikepi ke a tsietso.

₆Mafoko a baikepi ke a go lalela madi a basiami, mme melomo ya ba nnete e a ba pholosa.

₇Baikepi ba tla ribegediwa ba tlosiwa; mme matlo a basiami a ntse a eme.

₈Monna o bokwa go lekana le kitso ya gagwe, mme yo o pelo e kgopo o tla nyatsega.

₉Yo mmotlana, fa a itirela, o phala yo o ikgodisang, mme a tlhoka bogobe.

₁₀Mosiami o na le pelo le mo diruiweng tsa gagwe, mme maikutlo a baikepi a setlhogo.

₁₁Yo o lemang tshimo ya gagwe o tla kgora bogobe; mme yo o latelang tse di se nang mosola ga a na tlhaloganyo.

₁₂Moikepi o eletsa go tsoma dilo tse di bosula, mme medi ya basiami e tla ntsha maungo.

₁₃Boleo jwa molomo ke seru se se kotsi; mme mosiami o falola mo tlalelong.

₁₄Motho o tla kgora tse di molemo tsa leungo la molomo wa gagwe; tiro ya diatla tsa motho e tla boela kwa go ene.

₁₅Tsela ya lesilo e lolame mo matlhong a lone, mme go botlhale yo o amogelang kgakololo.

₁₆Lesilo le bontsha go ngala ga lone ka pele, mme yo o itshwereng pila o fitlha kgopisego.

₁₇Yo o bolelang tse e leng tsona o bua tse di tlhomameng; mme mosupi wa maaka o bua tsa tsietso.

₁₈Go na le ba ba buabuang mafoko a a tlhabang jaaka tšhaka, mme diteme tsa ba ba botlhale di a fodisa.

₁₉Molomo wa boammaaruri o tla tlhomama ka bosakhutleng, mme loleme lwa maaka ke lwa ponyo ya leitlho fela.

₂₀Tsietso e mo pelong tsa ba ba akanyang bosula, mme ba ba rerang kagiso ba na le boitumelo.

₂₁Mosiami ga a welwe ke tatlhego epe, mme ba ditlalelo di ba welang ka bontsi ke baikepi.

₂₂Melomo e e akang e tena Morena, mme ba ba dirang ka boammaaruri ba a mo kgatlha.

₂₃Motho yo o itshwereng sentle o loba kitso, mme pelo tsa masilo di kua tsa bosilo.

₂₄Diatla tsa batlhoafadi di tla laola, mme botlapa bo isa botlhankeng.

₂₅Tshwenyego mo pelong ya monna e a e imela; mme lefoko la lorato le a e thabisa.

₂₆Mosiami o itse se se mo phedisang, mme tsela ya baikepi e a ba timetsa.

₂₇Setshwakga ga se bone se se se tsomang, mme khumo e kgolo ke ya monna wa motlhoafadi.

₂₈Bophelo bo mo tseleng ya tshiamo, mme tsela e e sokameng e isa losong.