NUMERI 8

₁Morena a ba a bua le Moše a re: ₂“Bua le Arone o mo ree o re: ‘Fa o tlhoma dipone, a dipone tse supa di bonegele felo fa go fa pele ga setlhomo.’ ” ₃Arone a dira jalo, a tlhoma dipone di lebile felo fa go fa pele ga setlhomo jaaka Morena a laetse Moše. ₄Setlhomo se ne se dirilwe jaana: E ne e le sa gouta e e batotsweng; le matshwaro a sona le dithunya tsa sone e ne e le tsa gouta e e batotsweng. Moše o ne a dirile setlhomo ka fa setshwantshong se Morena a se mmontshitseng.

₅Morena a ba a raya Moše a re: ₆“Tsaya Balefi mo Baiseraeleng, o ba itshekise. ₇O ba direle jaana go ba itshekisa: Ba kgatshe ka metsi a phepafatso, mme a ba ipeole mmele otlhe ka logare, ba tlhatswe diaparo tsa bone, ba iitshekise jalo. ₈Ba be ba tsee poana le tshupelo ya dijo ya teng ya bupe jo bo boleta jo bo dubilweng ka lookwane; o be o tsee poana ya bobedi ya setlhabelo sa boleo. ₉O be o atametse Balefi fa pele ga Tente ya Boipontsho, o phuthe phuthego yotlhe ya Baiseraele. ₁₀O be o atametse Balefi fa pele ga Morena, mme a Baiseraele ba bee diatla mo Balefing. ₁₁Jaanong Arone a kgadikanye Balefi gore ba nne tshupelo ya kgadikanyo fa pele ga Morena e e tswang mo Baiseraeleng gore e nne ba ba dirang tsa tirelo ya Morena. ₁₂Jaanong Balefi ba bee diatla mo ditlhogong tsa dipoana, o be o direle Morena nngwe go nna setlhabelo sa boleo le ya bobedi go nna setlhabelo sa phiso go batlela Balefi boitshwarelo.

₁₃“O be o emise Balefi fa pele ga Arone le fa pele ga bomorwawe, o ba kgadikanye go nna tshupelo ya kgadikanyo ya Morena. ₁₄O ntshe Balefi jalo mo Baiseraeleng gore Balefi e nne ba me. ₁₅Morago ga moo Balefi ba ka tsena go direla mo Tenteng ya Boipontsho. Jaanong he, ba itshekise jalo, o ba kgadikanye go nna tshupelo ya kgadikanyo. ₁₆Gonne ke ba filwe gotlhe ba tswa mo Baiseraeleng, ke ba itseetse boemong jwa botlhe ba bommaabo ba itibolang ka bone, e bong bana ba ntlha botlhe ba Baiseraele. ₁₇Gonne maitibolo otlhe mo Baiseraeleng ke a me a batho le a diruiwa; ke ne ka a iitshepisetsa ka letsatsi le ke bolaileng maitibolo otlhe a lefatshe la Egepeto ka lone. ₁₈Ka amogela Balefi mo boemong jwa batsalwapele botlhe mo Baiseraeleng. ₁₉Jaanong Balefi ka ba neela Arone le bomorwawe go nna ba bone ba tswa mo Baiseraeleng gore ba dire tsa tirelo-Modimo ya Baiseraele kwa Tenteng ya Boipontsho le go batlela Baiseraele boitshwarelo gore go se nne petso mo Baiseraeleng, fa ba atamela Felo-ga-Boitshepo.”

₂₀Ke fa Moše le Arone le phuthego yotlhe ya Baiseraele ba dira ka Balefi fela jaaka Morena a laetse Moše ka ga Balefi; Baiseraele ba dira jalo ka bone. ₂₁Mme Balefi ba iitshekisa boleo, ba tlhatswa diaparo tsa bone, mme Arone a ba kgadikanya go nna tshupelo ya kgadikanyo fa pele ga Morena; a ba a ba ruanya go ba itshekisa. ₂₂Morago ga moo Balefi ba tsena go dira tsa tirelo ya bone kwa Tenteng ya Boipontsho, ba okametswe ke Arone le bomorwawe. Ba direla Balefi jaaka Morena a laetse Moše ka ga bone.

₂₃Morena a ba a raya Moše a re: ₂₄“Ke ona molao o o tshwanetseng Balefi: Go simolola ka yo o dinyaga di le 25 le yo o fetileng foo o tshwanetse go tsena tirong kwa tirelong ya Tente ya Boipontsho. ₂₅Mme a e re a le dinyaga di le 50, a ikhutsisiwe mo tirelong ya Tempelana, a se tlhole a dira. ₂₆A ka nna a thusa ba ga gabo kwa Tenteng ya Boipontsho ka go tlhokomela ditshwanelo, fela tiro a se ka a e dira. O dire jalo ka Balefi mabapi le ditshwanelo tsa bone.”