NUMERI 3

₁Boora Arone le Moše mo sebakeng se Morena o buileng le Moše kwa thabeng ya Sinai ka sona ke ba: ₂Maina a bomorwa Arone ke a: Ke Natabe, morwawe wa ntlha le Abihu le Eleasare le Ithamare. ₃Ke ona maina a bomorwa Arone baperesiti ba ba tloditsweng, ba tlhomiwa gore ba dire tsa boperesiti. ₄Mme Natabe le Abihu ba ne ba swa fa pele ga Morena, ka ba ne ba tlisitse molelo o sele fa pele ga Morena kwa sekakeng sa Sinai. Ba ne ba se na bomorwa. Mme Eleasare le Ithamare ba sala ba dira tsa boperesiti, ba okametswe ke Arone rraabo.

₅Morena o ne a bua le Moše a re: ₆“Atametsa ba lotso lwa ga Lefi, o ba bee fa pele ga Arone moperesiti gore ba mo direle, ₇ba tlhokomele tsa tirelo ya gagwe le ya phuthego yotlhe fa pele ga Tente ya Boipontsho, ba dire tsa tirelo ya Taberenakele. ₈Ba tlhokomele didiri tsotlhe tsa Tente ya Boipontsho le tsa tirelo ya Baiseraele go dira tsa tirelo ya Taberenakele. ₉Balefi o ba neele Arone le bomorwawe; o ba abetswe ke Baiseraele. ₁₀Mme Arone le bomorwawe o ba tlhome gore ba tlhokomele boperesiti jwa bone. Fa o sele a ka atamela boperesiting, a a bolawe.”

₁₁Morena a ba a raya Moše a re: ₁₂“Bona, nna ka nosi ke tsere Balefi, ka ba ntsha mo Baiseraeleng mo boemong jwa maitibolo otlhe a a tsalwang pele ke Baiseraele gore Balefi e nne ba me. ₁₃Gonne maitibolo otlhe ke a me; ka letsatsi le ke bolaileng maitibolo otlhe kwa lefatsheng la Egepeto ka lone ke iitshepiseditse maitibolo otlhe mo Iseraeleng a batho le a diruiwa gore e nne a me, nna Morena.”

₁₄Morena a ba a raya Moše kwa sekakeng sa Sinai a re: ₁₅“Bala Balefi ka fa dikgotleng tsa bone le ka fa ditshikeng tsa bone; ba batonanyana botlhe go simolola ka ba kgwedi e le nngwe le bomogoloa-bone o ba bale.” ₁₆Moše a ba bala ka fa taelong ya Morena, jaaka a laetswe. ₁₇Bomorwa Lefi ka maina a bone e ne e le Geresone le Kahathe le Merari. ₁₈Maina a bomorwa Geresone ka fa ditshikeng tsa bone ke Lebeni le Simei. ₁₉Bomorwa Kahathe ka fa ditshikeng tsa bone ke Amerame le Isehare le Heberone le Usiele. ₂₀Bomorwa Merari ka fa ditshikeng tsa bone ka Magedi le Muši. Ke tsona ditshika tsa ga Lefi ka fa dikgotleng tsa bone.

₂₁Boora Geresone ke losika lwa Balebeni le losika lwa Basimei. Ke tsona ditshika tsa Bageresone. ₂₂Ba ba badilweng ba bone ka fa palong ya ba batonanyana botlhe go simolola ka ba kgwedi e le nngwe le bomogoloa-bone, fa palo e kopana, ke ba le 7 500. ₂₃A ba ditshika tsa Bageresone ba thibelele ka fa morago ga Taberenakele ntlheng ya bophirimatsatsi. ₂₄Kgosana ya kgotla ya Bageresone ke Eliasafe morwa Laele. ₂₅Tshwanelo ya boora Geresone kwa Tenteng ya Boipontsho ke go tlhokomela Taberenakele le tente le thulelo le sebipo sa mojako wa Tente ya Boipontsho ₂₆le masela a a lepeletseng a logora lwa lelapa le sebipo sa kgoro ya lelapa le le mo tikologong ya Taberenakele le aletare le megala ya lone le tiro yotlhe ya teng.

₂₇Boora Kahathe ke losika lwa Baamerame le losika lwa Baisehare le losika lwa Baheberone le losika lwa Bausiele. Ke tsona ditshika tsa Bakahathe. ₂₈Ba ba badilweng ba bone ka fa palong ya ba batonanyana botlhe go simolola ka ba kgwedi e le nngwe le bomogoloa-bone ke ba le 8 600. Ba tlhokomela tirelo ya Felo-ga-Boitshepo. ₂₉A ba ditshika tsa Bakahathe ba thibelele ka fa lotlhakoreng lwa borwa lwa Taberenakele. ₃₀Kgosana ya kgotla ya ditshika tsa Bakahathe ke Elisafane morwa Usiele. ₃₁Tshwanelo ya bone ke go tlhokomela Letlole le tafole le setlhomo le dialetare le didiri tsa Felo-ga-Boitshepo tse ba direlang ka tsona le lesire la Felo-ga-Boitshepotshepo le tiro yotlhe ya teng.

₃₂Tlhogo ya dikgosana tsa Balefi ke Eleasare morwa Arone, moperesiti; ke ene mookamedi wa ba ba tlhokomelang tirelo ya Felo-ga-Boitshepo.

₃₃Boora Merari ke losika lwa Bamagedi le losika lwa Bamuši. Ke tsona ditshika tsa Bamerari. ₃₄Ba ba badilweng ba bone ka fa palong ya ba batonanyana botlhe go simolola ka ba kgwedi e le nngwe le bomogoloa-bone ke ba le 6 200. ₃₅Kgosana ya kgotla ya ditshika tsa Bamerari ke Suriele morwa Abigaile; a ba thibelele ka fa lotlhakoreng lwa bokone lwa Taberenakele. ₃₆Boora Merari ba ne ba laetswe go tlhokomela dipati tsa Taberenakele le mephakarego ya yona le maotwana a yona le ditlhako tsa yona le didiri tsotlhe tsa teng le tiro yotlhe ya teng ₃₇le maotwana a lelapa tikologong le ditlhako tsa ona le dimapo tsa ona le megala ya ona.

₃₈Ba ba thibelelang fa pele ga Tente ya Boipontsho ntlheng ya botlhabatsatsi ke Moše le Arone le bomorwawe ba ba tlhokomelang tirelo ya Felo-ga-Boitshepo, e bong tirelo e e tshwanetseng Baiseraele. Mme fa o sele a atamela a a bolawe. ₃₉Botlhe ba ba badilweng ba Balefi ba ba badilweng ke Moše le Arone ka fa taelong ya Morena, ba batonanyana botlhe go simolola ka ba kgwedi e le nngwe le bomogoloa-bone ke ba le 22 000.

₄₀Mme Morena a raya Moše a re: “Bala ba batonanyana botlhe ba e leng batsalwapele ba Baiseraele go simolola ka ba kgwedi e le nngwe le bomogoloa-bone, o tsee palo ya maina a bone. ₄₁Mme nna Morena o ntseele Balefi mo boemong jwa bomorwa Baiseraele botlhe ba ba tsetsweng pele le diruiwa tsa Balefi mo boemong jwa maitibolo otlhe a diruiwa tsa Baiseraele.” ₄₂Ke fa Moše a bala bomorwa Baiseraele botlhe ba ba tsetsweng pele jaaka Morena a mo laetse. ₄₃Jaanong ba batonanyana botlhe ba ba tsetsweng pele ka fa palong ya maina go simolola ka ba kgwedi e le nngwe le bomogoloa-bone, ka fa ba badilweng ka teng ba ne ba le 22 273.

₄₄Morena a ba a raya Moše a re: ₄₅“Tsaya Balefi mo boemong jwa bomorwa Baiseraele botlhe ba ba tsetsweng pele le diruiwa tsa Balefi mo boemong jwa diruiwa tsa bone gore Balefi e nne ba me; ke nna Morena. ₄₆Fa e le tlhwatlhwa ya kgololo ya ba le 273 ba batsalwapele ba Baiseraele ba ba fetang palo ya Balefi, ₄₇o tsee dišekele di le tlhano boemong jwa tlhogo ya motho, o tsee dišekele tsa Felo-ga-Boitshepo: šekele ke digera di le 20. ₄₈Mme madi ao o a nee Arone le bomorwawe e le a kgololo ya ba ba fetileng palo ya Balefi mo go bone.” ₄₉Ke fa Moše a tsaya madi a kgololo mo go ba ba fetang palo ya ba ba golotsweng ke Balefi ka go ba emela. ₅₀A tsaya madi a dišekele di le 1 365 tsa Felo-ga-Boitshepo mo go bomorwa Baiseraele ba ba tsetsweng pele. ₅₁Mme madi ao a kgololo Moše a a naya Arone le bomorwawe ka fa Morena a mo laetseng ka teng.