NUMERI 26

₁Morago ga petso Morena a raya Moše le Eleasare morwa moperesiti Arone, a re: ₂“Tsayang palo e e tletseng ya phuthego yotlhe ya Baiseraele go simolola ka ba ba dinyaga di le 20 le bomogoloa-bone ka fa dikgotleng tsa bone, e bong botlhe ba ba ka bololang ka mephato ya Baiseraele.” ₃Ke fa Moše le Eleasare, moperesiti, ba ba laela kwa mabaleng a Moabe fa nokeng ya Joretane go lebagana le Jerigo gore ba balwe ₄go simolola ka ba ba dinyaga di le 20 le bomogoloa-bone jaaka Morena a laetse Moše. Baiseraele ba ba tswang kwa Egepeto ke ba:

₅Ke Rubene morwa Iseraele wa ntlha. Bomorwa Rubene ka fa ditshikeng tsa bone ke losika lwa ga Henoge lwa boora Henoge le losika lwa ga Phalo lwa boora Phalo ₆le losika lwa ga Heserone lwa boora Heserone le losika lwa ga Karemi lwa boora Karemi. ₇Ke tsona ditshika tsa Barubene. Ba ba badilweng ba bone ba ne ba le 43 730. ₈Oora Phalo ke Eliabe. ₉Bomorwa Eliabe ke Nemuele le Dathane le Abirame. Ke bone Dathane le Abirame ba ba neng ba bileditswe mo lekgotleng la phuthego, ba ba neng ba rukhutlhegela Moše le Arone ba le mo lekokong la ga Kora, jale fa ba rukhutlhegela Morena. ₁₀Mme lefatshe la atlhamisa molomo wa lone, la ba metsa mmogo le Kora, jale fa lekoko leo le swa, ka molelo o ne o ja banna ba le 250, ba nna sekao se se tlhagisang. ₁₁Mme bomorwa Kora ba se ka ba swa nabo.

₁₂Bomorwa Simeone ka fa ditshikeng tsa bone ke losika lwa ga Nemuele lwa boora Nemuele le losika lwa ga Jamine lwa boora Jamine le losika lwa ga Jagine lwa boora Jagine ₁₃le losika lwa ga Sera lwa boora Sera le losika lwa ga Saule lwa boora Saule. ₁₄Ke tsona ditshika tsa Basimeone. Ba ba badilweng ba bone ba ne ba le 22 200.

₁₅Bomorwa Gate ka fa ditshikeng tsa bone ke losika lwa ga Sefone lwa boora Sefone le losika lwa ga Haki lwa boora Haki le losika lwa ga Suni lwa boora Suni, ₁₆le losika lwa ga Oseni lwa boora Oseni le losika lwa ga Eri lwa boora Eri ₁₇le losika lwa ga Arote lwa boora Arote le losika lwa ga Aredi lwa boora Aredi. ₁₈Ke tsona ditshika tsa Bagate. Ba ba badilweng ba bone ba ne ba le 40 500.

₁₉Bomorwa Juta ke Ere le Onane. Mme Ere le Onane ba sa le ba swela kwa lefatsheng la Kanana. ₂₀Bomorwa Juta ka fa ditshikeng tsa bone ke losika lwa ga Sela lwa boora Sela le losika lwa ga Pherese lwa boora Pherese le losika lwa ga Sera lwa boora Sera. ₂₁Boora Pherese ke losika lwa ga Heserone lwa boora Heserone le losika lwa ga Hamule lwa boora Hamule. ₂₂Ke tsona ditshika tsa Bajuta. Ba ba badilweng ba bone ba ne ba le 76 500.

₂₃Bomorwa Isašare ka fa ditshikeng tsa bone ke losika lwa ga Thola lwa boora Thola le losika lwa ga Phuwa lwa boora Phuwa ₂₄le losika lwa ga Jašube lwa boora Jašube le losika lwa ga Simerone lwa boora Simerone. ₂₅Ke tsona ditshika tsa Baisašare. Ba ba badilweng ba bone ba ne ba le 64 300.

₂₆Bomorwa Sebulone ka fa ditshikeng tsa bone ke losika lwa ga Serete lwa boora Serete le losika lwa ga Elone lwa boora Elone le losika lwa ga Jahalele lwa boora Jahalele. ₂₇Ke tsona ditshika tsa Basebulone. Ba ba badilweng ba bone ba ne ba le 60 500.

₂₈Bomorwa Josefa ke Manase le Eferaime.

₂₉Bomorwa Manase ka fa ditshikeng tsa bone ke losika lwa ga Magire lwa boora Magire. Magire a tsala Gileate. Gape ke losika lwa ga Gileate lwa boora Gileate. ₃₀Boora Gileate ke ba: Ke losika lwa ga Jesere lwa boora Jesere le losika lwa ga Heleke lwa boora Heleke ₃₁le losika lwa ga Aseriele lwa boora Aseriele le losika lwa ga Šegeme lwa boora Šegeme ₃₂le losika lwa ga Semita lwa boora Semita le losika lwa ga Hefere lwa boora Hefere. ₃₃Mme Selofehate morwa Hefere o ne a se na bomorwa, fa e se bomorwadi fela. Maina a bomorwadia Selofehate e ne e le Magala le Noa le Hogola le Mileka le Thiresa. ₃₄Ke tsona ditshika tsa Bamanase. Ba ba badilweng ba bone ba ne ba le 52 700.

₃₅Bomorwa Eferaime ka fa ditshikeng tsa bone ke ba: Ke losika lwa ga Suthela lwa boora Suthela le losika lwa ga Begere lwa boora Begere le losika lwa ga Thahane lwa boora Thahane. ₃₆Boora Suthela ke ba: Ke losika lwa ga Erane lwa boora Erane. ₃₇Ke tsona ditshika tsa Baeferaime. Ba ba badilweng ba bone ba ne ba le 32 500. Ke bone bomorwa Josefa ka fa ditshikeng tsa bone.

₃₈Bomorwa Benyamene ka fa ditshikeng tsa bone ke losika lwa ga Bela lwa boora Bela le losika lwa ga Asebele lwa boora Asebele le losika lwa ga Ahirame lwa boora Ahirame ₃₉le losika lwa ga Sefufame lwa boora Sefufame le losika lwa ga Hufame lwa boora Hufame. ₄₀Bomorwa Bela e ne e le Arete le Naamane. Losika lwa ga Arete ke boora Arete. Losika lwa ga Naamane ke boora Naamane. ₄₁Ke bone bomorwa Benyamene ka fa ditshikeng tsa bone. Ba ba badilweng ba bone ba ne ba le 45 600.

₄₂Bomorwa Dane ka fa ditshikeng tsa bone ke ba: Ke losika lwa ga Suhame lwa boora Suhame. Ke tsona ditshika tsa Badane ka fa ditshikeng tsa bone. ₄₃Ditshika tsotlhe tsa boora Suhame – ba ba badilweng ba bone ba ne ba le 64 400.

₄₄Bomorwa Asere ka fa ditshikeng tsa bone ke losika lwa ga Imena lwa boora Imena le losika lwa ga Iswi lwa boora Iswi le losika lwa ga Beria lwa boora Beria. ₄₅Ba bomorwa Beria ke losika lwa ga Hebere lwa boora Hebere le losika lwa ga Malekhiele lwa boora Malekhiele. ₄₆Leina la morwadia Asere e ne e le Sera. ₄₇Ke tsona ditshika tsa Baasere. Ba ba badilweng ba bone ba ne ba le 53 400.

₄₈Bomorwa Nafetale ka fa ditshikeng tsa bone ke losika lwa ga Jahaseele lwa boora Jahaseele le losika lwa ga Guni lwa boora Guni ₄₉le losika lwa ga Jesere lwa boora Jesere le losika lwa ga Sileme lwa boora Sileme. ₅₀Ke tsona ditshika tsa Banafetale ka fa ditshikeng tsa bone. Ba ba badilweng ba bone ba ne ba le 45 400.

₅₁Ba ba badilweng ba Baiseraele ke ba le 601 400.

₅₂Morena a ba a raya Moše a re: ₅₃“Ke bao ba tshwanetsweng go kgaoganngwa lefatshe go nna boswa ka fa palong ya maina. ₅₄Ba bantsi o ba nee naga e kgolo, ba ba seng bantsi o ba nee naga e nnye. Lotso longwe le longwe lo newe boswa jwa lone ka fa palong ya ba ba badilweng ba lone. ₅₅Fela a lefatshe le kgaoganngwe ka tengwa. A ba rue ka fa maineng a ditso tsa borraabo. ₅₆A boswa jwa bone bo kgaoganngwe ka tengwa fa gare ga ba bantsi le ba ba seng bantsi.”

₅₇Ba ba badilweng ba Balefi ka fa ditshikeng tsa bone ke ba: Ke losika lwa ga Geresone lwa boora Geresone le losika lwa ga Kahathe lwa boora Kahathe le losika lwa ga Merari lwa boora Merari. ₅₈Ditshika tsa Balefi ke tse: Ke losika lwa ga Lebeni le losika lwa ga Heberone le losika lwa ga Magedi le losika lwa ga Muši le losika lwa ga Kora. Kahathe a tsala Amerame. ₅₉Leina la mosadi wa ga Amerame ke Jogebete oora Lefi, yo mmaagwe a mo tsholetseng Lefi kwa Egepeto; ene a tshola le Amerame Arone le Moše le Miriame, kgaitsadia-bone. ₆₀Bomorwa Arone ke Natabe le Abihu le Eleasare le Ithamare. ₆₁Mme Natabe le Abihu ba ne ba swa, fa ba tlisa molelo o sele fa pele ga Morena. ₆₂Ba ba badilweng ba bone ba ne ba le 23 000, e le ba batonanyana botlhe go simolola ka ba kgwedi le bomogoloa-bone. Gonne ba ne ba sa balelwa mmogo le Baiseraele ba bangwe, ka ba se ka ba newa boswa mo gare ga Baiseraele.

₆₃Ke bone ba ba badilweng ke Moše le Eleasare moperesiti ba ba badileng Baiseraele kwa mabaleng a Moabe gaufi le Joretane go lebagana le Jerigo. ₆₄Mo go bao go ne go se ope wa Baiseraele ba ba badilweng ke Moše le Arone moperesiti kwa sekakeng sa Sinai. ₆₅Gonne Morena o ne a ba reile a re, ba tshwanetse go swela mo sekakeng. Ga se ka ga sala ope wa bone fa e se Kalebe morwa Jefune le Jošua morwa Nune.