JOBE 21

₂“Utlwang lo reetse

se ke se bolelang!

A go re jalo

e nne dikgomotso tsa lona!

₃Ntumeleleng, le nna ke bue.

Fa ke sena go bua, o ka sotla.

₄A nna ke lebisa selelo sa me

mo bathong?

Gongwe ke ka ntlha ya eng,

fa ke sa tshwanela go fela pelo?

₅Ntebeng lo rerege!

Bayang diatla melomong.

₆Fa ke gopola tseo, ke a tshoga;

mmele wa me o a sisimoga.

₇Ke ka ntlha ya eng,

fa baikepi ba ka phela,

ba be ba tsofala

le go tia nonofong?

₈Ba bona bana ba bone,

ba tiile ba na nabo

mmogo le bana ba bana.

₉Matlo a bone a mo kagisong,

ga go na se se ba tshosang;

thupa ya Modimo ga e ba otle.

₁₀Poo ya gagwe e a gwela,

ga e fose;

kgomo ya gagwe e a tsala,

ga e folotse.

₁₁Ba ntshetsa basimane ba bone

kwa ntle jaaka dinku;

bana ba bone ba a tlolaka.

₁₂Ba opelela moropana

le mangope;

ba itumelela go lela ga ditlhaka.

₁₃Ba phela monate

ka malatsi aotlhe;

ba fologela mo felong ga baswi

ba le kagisong.

₁₄Mme kana ba reile Modimo

ba re:

‘Tloga mo go rona!

Ga re kgatlhwe

ke go itse ditsela tsa gago.’

₁₅Ba re: ‘Mong-wa-thata-yotlhe

ke eng, fa go twe, re mo direle?

Go ka re thusa eng,

fa re mo rapela?’

₁₆Bonang, tlhogonolo ya bone

a ga e mo diatleng tsa bone?

Kakanyo ya baikepi

e kgakala le ona Modimo.

₁₇A ga ke re, lobone lwa baikepi

ga lo atise go tima

le tatlhego ga e ba wele gantsi?

Ga ke re,

Modimo ga o tsotelele go ba abela

dikotlo ka bogale jwa ona?

₁₈Ke ga kae ba tleng ba tshwane

le dirite mo phefong,

ba be ba tshwane le moko

o o tsewang ke ledimo?

₁₉Lona lo a re:

‘Modimo o bolokela

bana ba moikepi

tatlhego ya gagwe!’

Nnyaya! A o otle ene ka fa go mo

lebanyeng gore a utlwe botlhoko!

₂₀A moikepi a bone

tatlhego ya gagwe ka matlho!

A a nwe bogale

jwa Mong-wa-thata-yotlhe!

₂₁Gonne ke eng sa lapa la gagwe

se se ka mo tshwenyang,

fa a sena go swa,

fa palo ya dikgwedi tsa gagwe

e sena go fela?

₂₂A motho o ka ruta Modimo

kitso,

ona o o sekisang

ba ba kwa godimo?

₂₃Mongwe o swa

a ntse a le tlhogonolo tota,

a na le kagiso fa gotlhe

a sa tshwenyegele sepe.

₂₄Dikgamelo tsa gagwe

di tletse lebese;

marapo a gagwe a tiile moko.

₂₅Mme yo mongwe a swe

a le pelo-e-botlhoko,

a ise a je tsa letlhogonolo.

₂₆Ba robale mmogo leroleng,

mme diboko di ba khurumetse.

₂₇Bonang,

ke itse dikakanyo tsa lona

le maano a lo a ntogelang,

a lo nteofelang ka ona.

₂₈Fa lo re: ‘Lelapa la morena

yo o ikgantshang le kae?

Ntlo e kae e baikepi

ba neng ba nna mo go yona?’

₂₉A ga lo a botsa bafeti ba tsela?

Kana dikao tsa bone

ga lo di ganetse!

₃₀Ba re: ‘Yo o bosula

o rekegelwa

ka letsatsi la tatlhego;

o phologa ka letsatsi la bogale.’

₃₁Ke mang yo o kgalemelang

tsamao ya gagwe

a lebaganye nae?

Ke mang yo o mo otlhaelang

tse a di dirileng?

₃₂Le gona o isiwa mabitleng,

mme phupu ya gagwe

ba a e disa.

₃₃Makwete a lebitla

a monate mo go ene;

batho botlhe ba mo sala morago,

le ba ba mo eteletseng pele

ga ba na palo.

₃₄Jaanong lo ka nkgomotsa jang

ka dilo tsa lefela?

Mo dikarabong tsa lona

go setse bolotsana fela.”