JEREMIA 41

₁E rile ka kgwedi ya bosupa ga tla ene Isemaele, morwa Nethanya, morwa Elisama, e le mongwe wa losika lwa kgosi le wa ditona tsa yona; a tla kwa go Ketalea, morwa Ahikame, kwa Mitsepha, a na le banna ba le some; ba ja bogobe gona ba le mmogo kwa Mitsepha. ₂Ke fa Isemaele a nanoga le banna ba le some ba ba nang nae, ba rema Ketalea, morwa Ahikame, morwa Safane, ka tšhaka; mme ene Isemaele a mmolaya, a swa, yo kgosi ya Babele e mo laodisitseng lefatshe. ₃Le gona Isemaele a bolaya Bajuta botlhe ba ba neng ba na le Ketalea gona mo Mitsepha, le Bakalatea ba ba fitlhetsweng teng, ba e leng batlhabani.

₄Jaanong ka letsatsi la bobedi, Ketalea a sena go bolawa, go ise go itse ope, ₅ga tla banna ba le 80, ba tswa kwa Šegeme le kwa Silo le kwa Samaria, ba beotswe ditedu, ba gagotse diaparo, ba iphatsitse, ba tshotse ditshupelo tsa dijo le maswalo ka diatla go di isa kwa Ntlong ya Morena. ₆Isemaele, morwa Nethanya, a tswa mo Mitsepha, a ba kgatlhantsha, a tsamaya a ntse a lela. Ya re a kgatlhana nabo, a ba raya a re: “Tlaang kwa go Ketalea, morwa Ahikame.” ₇Mme ya re ba sena go fitlha mo gare ga motse, Isemaele, morwa Nethanya, a ba bolaya, a ba latlhela mo sedibeng; ga dira ene le banna ba ba nang nae.

₈Mo go bone go ne go le banna ba le some; bone ba raya Isemaele ba re: “Se re bolae! Gonne re na le mahumo a a fitlhilweng kwa masimong. Ke mabele le garase le lookwane le mafura a dinotshe.” Ke fa a ba lesa, a sa ba bolae le ba ga bone. ₉Sediba seo Isemaele o latlhetseng ditoto tsa banna ba a ba bolaileng mo go sona mmogo le setoto sa ga Ketalea, ke sona se se epilweng ke kgosi Asa, fa a lwa le Baesa, kgosi ya Iseraele. Ke sona se Isemaele, morwa Nethanya, a neng a se tlatsa direpa. ₁₀Jaanong Isemaele a thopa masalela aotlhe a morafe a a neng a le kwa Mitsepha, e le bomorwadia kgosi le batho botlhe ba ba sadisitsweng kwa Mitsepha, e bong bone ba Nebusaratane, mookamedi wa bafemedi ba kgosi, a neng a ba laodisitse Ketalea, morwa Ahikame; bone bao Isemaele, morwa Nethanya, a ba isa mo botshwarong, a tloga ka bone gore a fetele kwa Baamoneng. ₁₁Mme e rile Johanane, morwa Karea, le balaodi botlhe ba batlhabani ba ba nang nae, ba utlwela tse di bosula tsotlhe tse Isemaele, morwa Nethanya, a di dirileng, ₁₂ba tsaya banna botlhe, ba ya go lwa le Isemaele, morwa Nethanya, ba mo fitlhela a le kwa letsheng le legolo le le mo Gibeone. ₁₃Jaanong ya re batho botlhe ba ba neng ba na le Isemaele, ba bona Johanane, morwa Karea, le balaodi botlhe ba batlhabani ba ba nang nae, ba itumela. ₁₄Bone batho botlhe ba Isemaele a neng a ba thopile kwa Mitsepha, ba retologa, ba boa, ba ya kwa go Johanane, morwa Karea. ₁₅Mme Isemaele, morwa Nethanya, a falola mo go Johanane, a na le banna ba ba robedi, a ya kwa Baamoneng.

₁₆Ke fa Johanane, morwa Karea, le balaodi botlhe ba batlhabani ba ba nang nae ba tsaya masalela otlhe a batho ba Isemaele, morwa Nethanya, a ba thopileng kwa Mitsepha, a sena go bolaya Ketalea, morwa Ahikame, e bong banna le batlhabani le basadi le bana le badiredi ba kgosi ba a ba busitseng kwa Gibeone. ₁₇Ba tloga teng, ba ya go nna kwa Geruthe-Kimehame, ke felo fa go gaufi le Betleheme; ba re ba ya kwa Egepeto, ₁₈e le go tshaba Bakalatea, gonne ba ba boifa, ka Isemaele, morwa Nethanya, a bolaile Ketalea, morwa Ahikame, yo kgosi ya Babele e mo laodisitseng lefatshe.