BAATLHODI 8

₁Ke fa banna ba Baeferaime ba mo sekisa ba re: “O ne o direlang jalo, fa o sa re bitse maloba fa o ya go tlhabana le Bamidiane?” Ba mo omanya thata jalo.

₂Mme ene a ba fetola a re: “Ke dirile tiro efe e e kana ka ya lona? A ga ke re, maronopo a Baeferaime a gaisa phulo ya moweine ya Baabiesere? ₃Kana dikgosi tsa Bamidiane, Orebe le Seebe, Modimo o di neetse mo diatleng tsa lona. Nna ke kgonne go dira tiro efe e e tshwanang le ya lona?” Ya re a bua mafoko ao, ba rebega logala, ba se ka ba tlhola ba mo omanya.

₄Jaanong Giteone a fitlha kwa nokeng ya Joretane, a e tshela, ene le banna ba ba 300 ba ba nang nae, ba lapile ka go latelela baba ₅mme a kopa banna ba Sukothe a re: “A lo ke lo fe banna ba ba ntshetseng morago dinkgwe, gonne ba lapile. Kana ke latelela Seba le Salemuna, dikgosi tsa Midiane.”

₆Ke fa bagolo ba Sukothe ba botsa ba re: “A mabole a ga Seba le Salemuna o setse o a bofile, fa o re, re fe mephato ya gago dijo?”

₇Giteone a re: “Go siame. E tla re Morena a neela Seba le Salemuna mo diatleng tsa me, ke phothe mebele ya lona ka mitlwa ya sekaka le ka dikala tsa mengana.” ₈A tloga teng a fetela kwa Phenuele, le bone a ba kopa. Mme banna ba Phenuele ba mo araba jaaka banna ba Sukothe. ₉Mme a raya banna ba Phenuele le bone a re: “E tla re ke boa ka kagiso, ke fete ke dige kago e ya phemelo.”

₁₀Seba le Salemuna ba ne ba le kwa Karekore, ba na le mephato ya bone, e ka nna banna ba le 15 000; bone e le botlhe ba ba setseng ba mephato yotlhe ya ba kwa botlhabatsatsi. Gonne ba ba bolailweng e ne e le banna ba le 120 000 ba ba neng ba tshwere tšhaka. ₁₁Jaanong Giteone a bolola ka tsela ya baagi ba ditente, a potile metse ya Noba le Jogebeha mo ntlheng ya botlhabatsatsi, a fenya mephato eo, e sa ntse e itebetse. ₁₂Seba le Salemuna ba tshaba, mme a ba latelela, a tshwara dikgosi tse pedi tsa Bamidiane, e bong Seba le Salemuna, a tshosa mephato yotlhe, a e phatlalatsa.

₁₃Jaanong e rile Giteone morwa Joase a boa mo tlhabanong ka phata ya motse wa Herese, ₁₄a tshwara lekau la kwa Sukothe, a le botsolotsa; la mo kwalela maina a dikgosana tsa Sukothe le a bagolo ba teng, e le banna ba le 77. ₁₅Ya re a fitlha kwa banneng ba Sukothe a re: “Bonang, Seba le Salemuna ke ba, ba lo nkgobileng ka ga bone lwa re: ‘A mabole a ga Seba le Salemuna o setse o a bofile fa o re, re fe banna ba gago ba ba lapileng dijo!’ ” ₁₆Ke fa a tsaya bagolo ba motse le mitlwa ya sekaka le dikala tsa mengana, a swabaila banna ba Sukothe ka tsona. ₁₇Le gona a diga kago ya phemelo ya Phenuele, a bolaya banna ba motse oo.

₁₈Jaanong a botsa Seba le Salemuna a re: “Banna ba lo ba bolaetseng kwa thabeng ya Thabore ba ne ba ntse jang?” Ba re: “Ba ne ba tshwana nao; mongwe le mongwe a lebega jaaka ngwana wa kgosi.”

₁₉Giteone a re: “E ne e le bonkgonne ba ga mme. Ka bophelo jwa Morena, fa lo ka bo lo ba lesitse go phela, nka bo ke sa lo bolae.” ₂₀A ba a raya Jethere morwawe yo mogolo a re: “Nanoga o ba bolae!” Mme lekau la se ka la somola tšhaka ya lone, gonne le boifa ka le sa le lešwa.

₂₁Mme Seba le Salemuna ba re: “Nanoga ka wesi o re wele; gonne thata ya monna e lekana le sebopego sa gagwe.” Ke fa Giteone a nanoga, a bolaya Seba le Salemuna, a tsaya dingwedinyana tse di mo melaleng ya dikammele tsa bone.

₂₂Jaanong banna ba Iseraele ba raya Giteone ba re: “Re buse, wena le morwao le morwa morwao; gonne o re golotse mo diatleng tsa Bamidiane.”

₂₃Mme Giteone a ba raya a re: “Ga nkitla ke lo busa, le morwaake ga a kitla a lo busa. Lo tla busiwa ke Morena.” ₂₄Giteone a boela a ba raya a re: “Ke rata go kopa sengwe mo go lona: A mongwe le mongwe a mphe lenyena le a le thopileng.” A bua jalo ka gonne Bamidiane ba ne ba na le manyena a gouta, ka e le Baisemaele.

₂₅Ba araba ba re: “Re tla a go naya ka boitumelo.” Ba ala kobo, mme mongwe le mongwe a latlhela lenyena le a le thopileng mo go yona. ₂₆Bokete jwa manyena a gouta a o neng a a kopile e ne e le dišekele tsa gouta di le 1 700, go sa balwe jwa dingwedinyana le jwa mekgabo ya ditsebe le jwa diaparo tse dikhibidu tsa bofifadu tse di neng di aperwe ke dikgosi tsa Bamidiane; go bile go sa balwe le jwa dibaga tse di neng di le mo melaleng ya dikammele. ₂₇Jaanong Giteone a dira khiba ya boperesiti ka tsona, a e lepeletsa mo Ofera motseng wa ga gabo, mme Baiseraele botlhe ba dira boaka teng ka go e obamela jaaka modimo wa seseto; ya nna serai jalo mo go Giteone le mo go ba lapa la gagwe.

₂₈Bamidiane ba ne ba kokobediwa jalo fa pele ga Baiseraele, ba se ka ba tlhola ba tsosa ditlhogo tsa bone. Lefatshe la nna mo kagisong dinyaga di le 40 ka malatsi a bophelo jwa ga Giteone.

₂₉Morago ga ntwa Jerubaale, e bong Giteone morwa Joase a ya a nna mo ntlong ya gagwe. ₃₀Giteone o ne a na le bomorwa ba le 70 ba ba tsetsweng ke ene, ka a ne a na le basadi ba bantsi. ₃₁Nyatsi ya gagwe e e neng e le mo Šegeme le yona ya mo tsholela ngwana wa mosimane, a tewa leina la Abimelege. ₃₂Giteone morwa Joase o ne a swa, a tsofetse; a fitlhwa mo lebitleng la ga Joase rraagwe kwa Ofera wa Baabiesere.

₃₃Mme ya re fela Giteone a sena go swa, Baiseraele ba boela kwa morago, ba dira boaka ka go latela boBaale, ba ipeela Baale-wa-kgolagano go nna modimo wa bone. ₃₄Baiseraele ba tlhokomologa Morena, Modimo wa bone, yo o neng a ba pholositse mo diatleng tsa baba botlhe ba bone mo tikologong. ₃₅Le gona ba se ka ba direla ba lapa la ga Jerubaale yo e leng Giteone ditiro tsa tebogo ka ntlha ya tse di molemo tsotlhe tse o di diretseng Baiseraele.