JESAYA 29

₁A tatlhego wee ya Ariele, Ariele, e bong motse o Dafita o neng a nna mo go ona! A dinyaga di nne di fete le meletlo e latelane! ₂Morago ga moo ke tla pitlaganya Ariele gore a tlale selelo le phegelo; ee, a nne leiso la Modimo tota mo go nna. ₃Ke tla go dikanyetsa ka ntwa, ke go pitlaganya ka ditlhodi tsa batlhabani mo ntlheng tsotlhe, ke aga dikago tsa tlhaselo mo tikologong ya gago. ₄Foo o tla kokobediwa, o bua o le mo mmung; mafoko a gago a tla utlwala kwa tlase a tswa mo leroleng; lentswe la gago le tla tswa mo fatsheng jaaka mowa wa moswi, puo ya gago e tla tswa mo leroleng ka lentswe le le kwa tlase fela.

₅Mme bontsi jwa baba ba gago bo tla nna jaaka lerole le le boleta; bontsi jwa barena ba ba setlhogo bo tla nna jaaka moko o o gogolwang. Go tla dirafala jalo ka tshoganyetso. ₆O tla lekolwa ke Morena wa masomosomo ka tumo ya maru le ka thoromo ya lefatshe le ka loratla lo logolo le ka ledimo le ka phefo le ka kgabo ya molelo o o nyeletsang. ₇Mme bontsi jwa ditšhaba tsotlhe tse di bolotseng go tlhabana le Ariele le botlhe ba ba lwang le ene le dikago tsa phemelo tsa gagwe, ba ba mo pitlaganyang, ba tla nna fela jaaka toro le pono ya bosigo. ₈Bontsi jwa ditšhaba tsotlhe tse di bolotseng go tlhabana le thaba ya Sione ba tla tshwana le yo o tshwerweng ke tlala, yo o lorang a ja, mme e re a thanya, a fitlhela a sa kgora; ba tshwana le yo o bolawang ke lenyora, yo o lorang a nwa, mme e re a thanya, a ikutlwa a sa lapile, a sa kgalegile.

₉Tsibogang lo gakgamale! Iphatlheng lo foufale! Ba tagilwe, mme e seng ka weine; ba a thekesela, mme e seng ka bojalwa. ₁₀Gonne Morena o lo goromeleditse mowa wa thulametso, a lo bipa matlho, e leng baporofeti; a lo khurumetsa ditlhogo, e bong baboni. ₁₁Mme lo tshotse pono ya dilo tsotlhe jaaka mafoko a lokwalo lo lo kannweng, lo ba lo neelang yo o itseng go buisa ba re: “A ko o lo buise!” Mme a re: “Ga ke kgone, gonne lo kannwe.” ₁₂Mme fa lokwalo lo neelwa yo o sa itseng go buisa gore a tle a lo buise, o tla re: “Ga ke itse go buisa.”

₁₃Morena o buile a re: “E re ka batho ba, ba nkatamela ka melomo, ba ntlotla ka diteme fela, mme dipelo tsa bone di le kgakala le nna, le go mpoifa ga bone e le molao o ba o rutilweng ke batho fela: ₁₄Bonang, ka ntlha ya moo ke tla tswelela pele go direla morafe o ka mokgwa o o gakgamatsang gore ba gakgamale, ba tlhoke puo, mme botlhale jwa matlhale a bone bo nyelele, le tlhaloganyo ya batlhaloganyi ba bone e fitlhege.”

₁₅A tatlhego wee ya ba ba fitlhang maikaelelo a bone kwa botennye fa pele ga Morena gore ditiro tsa bone di dirafale mo lefifing, ba ba reng: “Ke mang yo o re bonang? Ke mang yo o re itseng?” ₁₆Kana lo masilo jang! A mmopi o ka kaiwa e le letsopa? A setlhodiwa se ka bua ka ga motlhodi wa sona sa re: “Ga a a ntlhola!” A nkgo e ka bua ka ga mmopi wa yona e a re: “Ga a itse sepe”?

₁₇A ga ke re, Lebanone o tla fetoga tshimo ya ditlhare tse di ungwang; mme tshimo ya ditlhare tse di ungwang e tla kaiwa sekgwa fela, nakonyana e sena go feta?

₁₈Ka sebaka seo disusu di tla utlwa mafoko a lokwalo; matlho a difofu a tla bona, di dule mo bontshong le mo lefifing. ₁₉Babogisegi ba tla itumela gape mo Moreneng; batho ba ba humanegileng ba tla dudueletsa Moitshepi wa Iseraele. ₂₀Gonne ga go tlhole go le morena yo o pelompe; mosotli o nyeletse; botlhe ba ba logang maano a boikepo ba bolailwe, ₂₁e bong ba ba patikang batho mo tshekong, ba lalela yo o emelang tshiamo mo lekgotleng, ba diga mosiami ka pateletso.

₂₂Ka ntlha ya moo Morena yo o rekolotseng Aborahame o buile le ba ntlo ya ga Jakobe jaana a re: “Jakobe ga a nke a tlhola a swaba; sefatlhego sa gagwe ga se nke se tlhola se tlhajwa ke ditlhong. ₂₃Gonne fa bana ba ga Jakobe ba bona tiro e diatla tsa me di e dirileng mo go bone, ba tla itshepisa leina la me, ba itshepisa Moitshepi wa ga Jakobe, ba boifa Modimo wa Iseraele. ₂₄Ba ba timeletsweng ke tlhaloganyo ba tla bona kitso; bangongoregi ba tla amogela thuto.”