JESAYA 12

“Morena, ke a go leboga!

Gonne o ne o le bogale

mo go nna,

mme bogale jwa gago bo boile,

o bile wa nkgomotsa.

₂Bonang,

Modimo ke pholoso ya me.

Ke tla o ikanya, ke sa boife sepe.

Gonne Modimo Morena

ke thata ya me le sefela sa me,

o bile o diregile pholoso ya me.”

₃Lo tla gelela metsi ka boitumelo

mo metsweding ya pholoso.

₄Ka letsatsi leo lo tla bua lo re:

“Lebogang Morena,

bitsang leina la gagwe,

itsiseng ditiro tsa gagwe

mo merafeng,

utlwatsang gore leina la gagwe

ke le legolo.

₅Opelelang Morena,

gonne o dirile dilo tsa bonatla;

a go itsiwe jalo

mo lefatsheng lotlhe!

₆Ipeleng lo duduetse,

lona baagi ba Sione!

Gonne Moitshepi wa Iseraele

o mogolo mo gare ga lona.”