HESEKIELE 40

₁E rile ka ngwaga wa 25 wa botshwaro jwa rona – e le ngwaga wa 14 go tloga ka go thopiwa ga motse – ka kgwedi ya ntlha, ka letsatsi la lesome, seatla sa Morena sa nna mo go nna, a nkisa teng; ₂a nkisa kwa lefatsheng la Iseraele ke le mo diponong tsa Modimo, a mpaya mo thabeng e kgolo thata. Mo go yona e kete go ne go agilwe motse mo ntlheng ya borwa. ₃Ya re a sena go mphitlhisa gona, ka bona monna yo ponalo ya gagwe e keteng ke ya kgotlho, a tshotse mogala le lotlhaka lo lo lekanyang, a eme mo kgorong.

₄Monna yoo a nthaya a re: “Morwa-motho, tse ke tla di go bontshang, di bone ka matlho, di utlwe ka ditsebe, ò di ele tlhoko tsotlhe. Gonne ò tliseditswe kwano gore ò di bontshiwe. Tsotlhe tse ò di bonang, di itsise Baiseraele.”

₅Jaanong ka bona ka kwa ntle ga Ntlo ya Modimo go le lobota mo tikologong yotlhe. Lotlhaka lo lo lekanyang, lo monna yole a lo tshotseng ka seatla, boleele jwa lone e ne e le mabogo a marataro – letsogo le okeleditswe bophara jwa seatla. Jaanong a lekanya boatlhamo jwa kago eo ya lobota, bo lekana le lotlhaka, le bogodimo bo lekana le lotlhaka. ₆A fitlha kwa kgorong e e lebileng kwa botlhabatsatsi, a tlhatloga ka mapalamo a yona, a lekanya serepodi sa kgoro, boatlhamo bo lekana le lotlhaka, le serepodi se sengwe, boatlhamo bo lekana le lotlhaka; ₇le ntlwana nngwe le nngwe ya badisa, boleele bo lekana le lotlhaka, le boatlhamo bo lekana le lotlhaka; le leotwana la lobota le le mo gare ga matlwana le le mabogo a matlhano; le serepodi sa kgoro se se fa thoko ga leobo la kgoro le le lebileng kwa Ntlong se lekana le lotlhaka. ₈A ba a lekanya leobo la kgoro le le lebileng kwa Ntlong le lekana le lotlhaka; ₉a lekanya leobo la kgoro, ya nna mabogo a a robedi, le maotwana a lone ya nna mabogo a mabedi. Mme leobo la kgoro le ne le le ka fa teng ga lobota. ₁₀Matlwana a kgoro e e lebileng kwa botlhabatsatsi a ne a le mararo ka ntlha e; a na le selekanyo se le sengwe fela ka boraro jwa ona; le maotwana a lobota a na le selekanyo se le sengwe fela ka ntlha e le ka ntlha e.

₁₁Morago ga moo a lekanya boatlhamo jwa botseno jwa kgoro, ya nna mabogo a le some, le boleele jwa kgoro ya nna mabogo a le 13. ₁₂Fa pele ga matlwana go ne go le sebaka sa letsogo ka ntlha e, le sebaka sa letsogo ka ntlha e; ntlwana e le mabogo a marataro ka ntlha e, le mabogo a marataro ka ntlha e. ₁₃A ba a lekanya boatlhamo jwa kgoro, a simolola fa thulelong ya ntlwana ka ntlha e go ya kwa thulelong ya ntlwana e nngwe ka ntlha e, ya nna mabogo a le 25. Mejako e lebaganye. ₁₄A ba a lekanya leobo, le le mabogo a le 20, e bong leobo la kgoro ya lelapa mo tikologong yotlhe. ₁₅Go tloga ka fa ntle ga kgoro go ya le leobo go fitlha fa le felelang teng e ne e le mabogo a le 50. ₁₆Kgoro e ne e na le difenstere mo tikologong tse di thibilweng ka dithupa; di ne di le mo matlwaneng le mo maotwaneng, di lebile kwa teng ga lelapa; le leobo le ne le na le difenstere jalo mo tikologong, le tsona di lebile kwa teng ga lelapa. Mo maotwaneng go ne go tshwantshitswe mekolane.

₁₇A ba a nkisa mo lapeng la ka fa ntle, ka fitlhela lelapa leo le diretswe matlwana, le adilwe matlapa a a mebalabala mo tikologong yotlhe; matlwana a ne a le 30 fa matlapa a adilweng teng. ₁₈Boalo jwa matlapa bo ne bo le fa ditlhakoreng tsa dikgoro, bo lekana le boleele jwa dikago tsa dikgoro, e bong boalo jwa matlapa jo bo kwa tlase.

₁₉A ba a lekanya boatlhamo jwa lelapa go tloga ka fa ntle ga kgoro e e kwa tlase go fitlha ka fa ntle ga lelapa la ka fa teng, ya nna mabogo a le lekgolo kwa botlhabatsatsi le kwa bokone.

₂₀A ba a lekanya boleele jwa kgoro ya lelapa la ka fa ntle e e lebileng kwa bokone le boatlhamo jwa yona. ₂₁Matlwana a yona a badisa a ne a le mararo ka fa le mararo ka fa. Selekanyo sa maotwana a yona le sa leobo la yona se tshwana le sa kgoro ya ntlha: Boleele jwa yona e le mabogo a le 50, boatlhamo jwa yona e le mabogo a le 25. ₂₂Difenstere tsa yona le leobo la yona le mekolane ya yona di ne di lekana le tsa kgoro e e lebileng kwa botlhabatsatsi. Go ne go tsenwa mo go yona ka mapalamo a supa. Leobo la yona le ne le le ka fa teng ga yona. ₂₃Lelapa la ka fa teng le ne le na le kgoro e e lebaganyeng le kgoro e e lebileng kwa bokone fela jaaka kgoro e e lebileng kwa botlhabatsatsi. A ba a lekanya go tswa kgorong go ya kgorong, e le mabogo a le lekgolo.

₂₄A ba a nkisa ntlheng ya borwa, ka fitlhela kgoro teng e e lebileng kwa borwa. A lekanya matlwana a yona le maotwana a yona le leobo la yona, di lekana fela le tsele. ₂₅Le gona e ne e na le difenstere fela jaaka leobo la yona mo tikologong yotlhe tse di tshwanang le difenstere tsele. Boleele e ne e le mabogo a le 50, boatlhamo e le mabogo a le 25. ₂₆Go tsenwa mo go yona ka mapalamo a supa; leobo la yona le le ka fa teng ga yona. Le gona e ne e na le mekolane mo maotwaneng a yona, mongwe ka fa le o mongwe ka fa. ₂₇Lelapa la ka fa teng le lone le ne le na le kgoro e e lebileng kwa borwa. Jaanong a lekanya go tswa kgorong go ya kgorong tse di lebileng kwa borwa, e le mabogo a le lekgolo.

₂₈Jaanong a nkisa kwa lapeng la ka fa teng ka kgoro ya borwa, a ba a lekanya kgoro eo ya borwa, a fitlhela e lekana le tsele. ₂₉Matlwana a badisa a yona le maotwana a yona le leobo la yona di ne di lekana le tsele. Le gona e ne e na le difenstere fela jaaka leobo mo tikologong yotlhe. Boleele e le mabogo a le 50, boatlhamo e le mabogo a le 25. ₃₀Go ne go le maobo mo tikologong yotlhe; boleele e le mabogo a le 25, boatlhamo e le mabogo a matlhano. ₃₁Mme leobo la yona le ne le lebile kwa lapeng la ka fa ntle. Mekolane e ne e le mo maotwaneng a yona. Go tsenwa mo go yona ka mapalamo a a robedi.

₃₂A ba a nkisa kwa ntlheng ya botlhabatsatsi ya lelapa la ka fa teng, a lekanya kgoro eo, a fitlhela e lekana le tsele. ₃₃Matlwana a yona le maotwana a yona le leobo la yona di ne di tshwana le tsele. E ne e na le difenstere fela jaaka leobo la yona mo tikologong yotlhe; boleele e le mabogo a le 50, boatlhamo e le mabogo a le 25. ₃₄Leobo la yona le ne le lebile kwa lapeng la ka fa ntle. Mekolane e ne e le mo maotwaneng a yona ka fa le ka fa. Go tsenwa mo go yona ka mapalamo a a robedi.

₃₅A ba a nkisa kwa kgorong ya bokone, a e lekanya, a fitlhela e lekana le tsele. ₃₆Matlwana a yona le maotwana a yona le leobo la yona di ne di lekana le tsele. E ne e na le difenstere mo tikologong yotlhe; boleele e le mabogo a le 50, boatlhamo e le mabogo a le 25. ₃₇Leobo la yona le ne le lebile kwa lapeng la ka fa ntle. Mekolane e ne e le mo maotwaneng a yona, mo ditlhakoreng tsa yona. Go tsenwa mo go yona ka mapalamo a a robedi.

₃₈Go ne go le ntlwana e e nang le setswalo sa yona fa maotwaneng a dikgoro. Ke fa ba neng ba tlhatswa ditlhabelo teng tse di fisiwang. ₃₉Mo leobong la kgoro go ne go le dipati tsa mojelo di le pedi ka fa, le di le pedi ka fa, tse mo go tsona go tlhabelwang ditlhabelo tse di fisiwang le ditlhabelo tsa boleo le ditlhabelo tsa molato. ₄₀Le ka fa ntle ga lotlhakore lwa leobo, mo ntlheng ya bokone fa go tsenwang teng mo kgorong go ne go le dipati di le pedi; le fa lotlhakoreng lo longwe lwa leobo la kgoro go le dipati di le pedi. ₄₁Go ne go le dipati di le nne mo ntlheng nngwe ya mojako wa kgoro, le dipati di le nne gape mo ntlheng e nngwe, e le dipati tse di le robedi le mmogo, tse ba neng ba tlhabela mo go tsona. ₄₂Le gona go ne go le dipati di le nne tsa setlhabelo se se fisiwang, e le tsa majwe a a betlilweng; boleele bo lekana le letsogo le bontlhanngwe jwa lone; boatlhamo bo lekana le letsogo le bontlhanngwe jwa lone; bogodimo bo lekana le letsogo. Didiri tse ba neng ba tlhaba setlhabelo se se fisiwang le setlhabelo se se jewang ka tsona, ba di baya mo go tsona. ₄₃Dipati di ne di na le ditshegetso tse di kana ka bophara jwa seatla, di sekametse kwa teng mo tikologong yotlhe. Nama ya ditlhabelo e ne e le mo godimo ga dipati.

₄₄A ba a nkisa kwa lapeng la ka fa teng, ka fitlhela go le matlwana a le mabedi mo lapeng la ka fa teng: Ntlwana nngwe e le fa lotlhakoreng lwa kgoro ya bokone, e lebile kwa borwa; e nngwe e le fa lotlhakoreng lwa kgoro ya borwa, e lebile kwa bokone. ₄₅Ke fa a nthaya a re: “Ntlwana e, e e lebileng kwa borwa ke ya baperesiti ba ba tlhokomelang tirelo ya Ntlo. ₄₆Mme ntlwana e e lebileng kwa bokone ke ya baperesiti ba ba tlhokomelang aletare. Ke bone bomorwa Satoke fela mo go bomorwa Lefi ba ba ka atamelang Morena go mo direla.”

₄₇Jaanong a lekanya lelapa la ka fa teng, boleele e le mabogo a le lekgolo, le boatlhamo e le mabogo a le lekgolo. Ditlhakore tse nne di ne di lekalekana. Aletare e ne e le fa pele ga Ntlo. ₄₈A ba a nkisa kwa mathuding a Ntlo, a lekanya maotwana a ona, bokima e le mabogo a matlhano ka fa, le mabogo a matlhano ka fa. Boatlhamo jwa mojako e le mabogo a le 14; jwa dipota tsa ditlhakore tsa mojako e le mabogo a le mararo ka fa le mabogo a le mararo ka fa. ₄₉Boleele jwa mathudi e ne e le mabogo a le 20, boatlhamo e le mabogo a le 12. Go palangwa kwa go ona ka mapalamo a le some. Jaanong fa thoko ga maotwana go ne go le maotwana a magolo a mokgabo, lengwe ka fa, le lengwe ka fa.