EKESODU 12

₁Morena a ba a raya Moše le Arone mo lefatsheng la Egepeto a re: ₂“A kgwedi eno e nne tshimologo ya dikgwedi mo go lona; a e nne ya ntlha ya dikgwedi tsa ngwaga mo go lona. ₃Bolelelang phuthego yotlhe ya Baiseraele lo re: A mong wa lapa mongwe le mongwe a tsee kwanyana ka la lesome la kgwedi e. Kwana e nne nngwe fela mo lapeng. ₄Mme fa ba lapa lengwe ba sa lekane go ka fetsa kwanyana yotlhe, foo a a e tsee mmogo le yo o bapileng nae yo o gaufi le ntlo ya gagwe ka fa palong ya batho; lo batlele kwanyana batho ba ba lekanyeng go ka e fetsa. ₅Kwanyana a e nne e tonanyana e e itekanetseng ya ngwaga o le mongwe, lo e tsee mo dinkung gongwe mo dipoding. ₆E tlhatlheleng go be go fitlhe letsatsi la 14 la kgwedi eno; foo bontsi jotlhe jwa phuthego ya Baiseraele ba e tlhabe mantsiboa ka lotlatlana. ₇A ba tsee madi a yona, ba a tshase mo dintlheng tsoo pedi tsa mojako le mo mophakaregong mo matlong a ba e jelang mo go ona. ₈Nama ya yona a ba e je bosigo joo e besitswe mo molelong; ba e je le dinkgwe tse di sa bedisiwang le merogo e e galakang. ₉Lo se ka lwa e ja e le tala; le gona a e se ka ya apewa ka metsi, mme a e besiwe ka molelo, le tlhogo le memomo le mateng a yona mmogo. ₁₀Lo se ka lwa sadisa sepe sa yona go ya mosong. Fa go setse sengwe sa yona, sa selwa, lo se fise ka molelo. ₁₁E jeng jaana: Lo e je lo itlamile matheka, lo rwele ditlhako mo dinaong tsa lona, lo tshotse dithobane tsa lona ka mabogo; lo e je ka potlako. Ke yona Tlolaganyo ya Morena.

₁₂“Gonne ke tla photlaphotla lefatshe la Egepeto bosigo joo, ke bolaya maitibolo otlhe a batho le a diruiwa mo lefatsheng la Egepeto. Ke tla dirafatsa katlholo le petso jalo mo medimong yotlhe ya Egepeto, nna Morena. ₁₃Mme madi ao e tla nna sesupo sa lona mo matlong a lo leng mo go ona. Fa ke bona madi ao, ke tla lo feta gore kwatlhao e e bolayang e se ka ya lo wela, fa ke itaya lefatshe la Egepeto. ₁₄Letsatsi leo a e nne la segopotso mo go lona, lo le tshegetse, e nne moletlo wa Morena; lo le tshegetse jalo mo ditsong tsotlhe tsa lona, e nne molao o o sa khutleng.

₁₅“Lo je dinkgwe tse di sa bedisiwang malatsi a supa. Lo tlose letlhabego mo matlong a lona ka letsatsi la ntlha. Gonne mongwe le mongwe yo o jang dinkgwe tse di bedisitsweng go tloga letsatsing la ntlha go ya tsatsing la bosupa o tshwanetse go nyelediwa mo go Iseraele. ₁₆Ka letsatsi la ntlha lo kgobokane go nna phuthego e e boitshepo, le ka letsatsi la bosupa lo dire jalo. A go se ka ga dirwa tiro epe ka malatsi ao. Fela se se jewang, ke sona fela lo ka se baakanyang.

₁₇“Tshegetsang moletlo wa dinkgwe tse di sa bedisiwang; gonne ka lone letsatsi leo ke ntshitse mephato ya lona mo lefatsheng la Egepeto. Letsatsi leo lo le tshegetse mo ditsong tsotlhe tsa lona, e nne molao o o sa khutleng. ₁₈Lo je dinkgwe tse di sa bedisiwang ka mantsiboa a letsatsi la 14 la kgwedi ya ntlha go ya mantsiboeng a letsatsi la 21 la kgwedi yona eo. ₁₉A go se ka ga fitlhelwa letlhabego mo matlong a lona ka malatsi a supang. Gonne mongwe le mongwe yo o tla jang dinkgwe tse di bedisitsweng ka ona o tshwanetse go nyelediwa mo phuthegong ya Iseraele, le fa e le moeng gongwe wa mo gae. ₂₀Lo se ka lwa ja sepe se se bedisitsweng. Lo je dinkgwe tse di sa bedisiwang fela gongwe le gongwe fa lo nnang teng.”

₂₁Ke fa Moše a bitsa banna bagolo botlhe ba Iseraele, a ba raya a re: “Yaang lo tlhaolele lelapa lengwe le lengwe la lona kwanyana e le nngwe, lo tlhabe kwanyana ya Tlolaganyo. ₂₂Gape tsayang ngatana ya mosiama, lo e ine mo mading a a mo mogopong, lo tshase mophakarego le dintlha tsoo pedi tsa mojako ka madi a a mo mogopong, mme a go se ka ga tswa motho ope wa lona ka mojako wa ntlo ya gagwe go fitlha mosong. ₂₃Gonne Morena o tla photlaphotla lefatshe go bolaya Baegepeto, mme e tla re fa a bona madi a a mo mophakaregong le mo dintlheng tsoo pedi tsa mojako, a fete mojako oo, a se ke a dumelele mosenyi go ka tsena mo matlong a lona go lo bolaya. ₂₄Tlhokomelang taelo e, a e nne molao o o sa khutleng mo go lona le mo baneng ba lona. ₂₅Mme e re lo sena go fitlha mo lefatsheng le Morena o tla le lo nayang, jaaka a lo solofeditse, lo tshegetse tirelo e. ₂₆Mme e ne e re fa bana ba lona ba lo botsa ba re: ‘Tirelo e ya lona ke ya eng?’ ₂₇lo re: ‘Ke setlhabelo sa Tlolaganyo ya Morena yo o kileng a feta matlo a Baiseraele kwa Egepeto motlhang a bolayang Baegepeto, mme a rekegela matlo a rona.’ ” Ke fa batho ba inama, ba obamela Morena. ₂₈Baiseraele ba ya ba dira jalo; ba dira ka fa Morena a laetseng Moše le Arone ka teng.

₂₉Jaanong ya re gare ga bosigo Morena a bolaya maitibolo otlhe mo lefatsheng la Egepeto, a simolola ka ngwana wa ntlha wa ga Farao yo o tla nnang mo sedulong sa gagwe sa bogosi, a fetsa ka ngwana wa ntlha wa mogolegwi yo o mo ntlong ya kgolegelo le maitibolo otlhe a diruiwa. ₃₀Ke fa Farao a tsoga bosigo, ene le batlhanka botlhe ba gagwe le Baegepeto botlhe; ga nna selelo se segolo mo Egepeto; gonne go ne go se ntlo epe e go seng moswi mo go yona. ₃₁Mme a bitsa Moše le Arone bosigo, a ba raya a re: “Nanogang lo tswe mo morafeng wa me, lona le Baiseraele. Yaang lo direle Morena jaaka lo kopile. ₃₂Le gona lo ye le dinku tsa lona le dikgomo tsa lona, jaaka lo buile. Le nna, lo ye lo nkopele tshegofatso.”

₃₃Mme Baegepeto ba potlakisa morafe gore ba o ntshe mo lefatsheng ka pele; gonne ba re: “Re ka swa rotlhe.” ₃₄Baiseraele ba tsaya bupe jo bo dubilweng jo bo iseng bo bedisiwe, bo le mo megopong e e dubelang, ba e sikara mo magetleng, e phuthetswe ka dikobo tsa bone. ₃₅Le gona Baiseraele ba ne ba dirile, jaaka Moše a ba laetse: Ba lopile Baegepeto dilo tsa selefera le tsa gouta le diaparo. ₃₆Mme Morena a naya batho tsalano mo Baegepetong, ba newa se ba se kopang. Ba thukhutha Baegepeto jalo.

₃₇Baiseraele ba huduga jalo kwa Ramasese, ba ya kwa Sukothe; e ne e ka nna banna ba le 600 000 ba ba sepelang ka dinao, go sa balwe bana. ₃₈Le makgoba a mantsi a bolola nabo le dinku le dikgomo le diruiwa tse dintsi thata. ₃₉Jaanong ba besa dinkgwe tse di sa bedisiwang ka bupe jole jo bo dubilweng jo ba duleng najo kwa Egepeto; gonne bo ne bo sa bedisiwa, ka ba lelekwa mo Egepeto, ba sa kgone go diega. Le gona ba ne ba sa itirela mefago.

₄₀Mme sebaka se Baiseraele ba neng ba le kwa Egepeto ka sona ke dinyaga di le 430. ₄₁Ya re dinyaga tseo tse di 430 di sena go feta, mephato yotlhe ya Morena ya tswa mo lefatsheng la Egepeto ka lone letsatsi leo. ₄₂E ne e le bosigo jwa go letela Morena gore a ba ntshe mo lefatsheng la Egepeto. Ke jona bosigo jwa Morena jo e leng jwa moletlo wa Baiseraele botlhe go ya ditshikatshikeng tsotlhe tsa bone.

₄₃Le gona Morena a raya Moše le Arone a re: “Molao wa Tlolaganyo ke o: A e se ka ya jewa ke ope wa setšhaba se sele! ₄₄Mme molala mongwe le mongwe, fa o sena go mo rupisa, o ka e ja. ₄₅Fela moagi wa moeng le yo o direlang tuelo bone ba se ka ba e ja. ₄₆A e jelwe mo ntlong e le nngwe. O se ka wa ntshetsa sepe sa nama ya yona kwa ntle ga ntlo. Lo se ka lwa roba lesapo lepe la yona. ₄₇A phuthego yotlhe ya Iseraele e dire jalo. ₄₈Jaanong fa moeng yo o go agetseng a rata go direla Morena Tlolaganyo, a banna botlhe le basimane ba lelapa la gagwe ba rupisiwe; morago ga moo a a atamele go e dira; a tshwane fela le wa mo gae. A e se ka ya jewa ke ope yo o sa rupang. ₄₉Molao wa ngwana wa mo gae le wa yo o lo agetseng a e nne o le mongwe fela.” ₅₀Baiseraele botlhe ba dira jalo; ba dira ka fa Morena a laetseng Moše le Arone ka teng. ₅₁Morena o ne a ntsha Baiseraele jalo mo lefatsheng la Egepeto ka thulaganyo ya mephato ya bone ka lone letsatsi leo.