2 SAMUELE 6

₁Dafita a ba a phutha botlhe gape ba ba tlhaotsweng mo go Iseraele ba le 30 000. ₂Jaanong Dafita a nanoga, a ya kwa Baale wa Juta mmogo le batho botlhe ba ba nang nae go tsaya Letlole la Modimo teng le le bidiwang ka leina la Morena wa masomosomo yo o ntseng fa godimo ga boKerubime. ₃Ba tsaya Letlole la Modimo ka koloi e ntšhwa, le tswa mo ntlong ya ga Abinatabe e e mo thoteng. Usa le Ayo bomorwa Abinatabe ba ne ba kgweetsa koloi e ntšhwa. ₄Ya re ba e tlosa fa lapeng la ga Abinatabe le le mo thoteng e tshotse Letlole la Modimo, Ayo a etelela Letlole pele, mme Usa a tsamaya fa thoko ga lone. ₅Dafita le Baiseraele botlhe ba bina fa pele ga Morena ka diletso tsa mefutafuta tsa dikgong tsa Siperese, e bong ka dirankure le ka diharepa le ka meropana le ka ditshipinyana le ka matlhao.

₆Ya re ba fitlha kwa seboaneng sa ga Nagone. Usa a ntshetsa letsogo kwa Letloleng la Modimo, a le tshegetsa, ka dipholo di ne di rata go le diga. ₇Ke fa Morena a tukela Usa bogale; Modimo wa mo itaya teng ka ntlha ya phoso, mo a bileng a swela teng fa Letloleng la Modimo. ₈Ke fa Dafita a tlalelwa, ka Morena a gagotse Usa; felo foo ga bidiwa Kgagolo-ya-ga-Usa go fitlha letsatsing leno.

₉Dafita a boifa Morena ka letsatsi leo a re: “Letlole la Morena le ka tla jang kwa go nna?” ₁₀Ka moo Dafita a se ka a rata go isa Letlole la Morena kwa go ene kwa motseng wa ga Dafita, mme a le isa kwa ntlong ya ga Obete-Etomo wa kwa Gathe. ₁₁Letlole la Morena la nna dikgwedi di le tharo mo ntlong ya ga Obete-Etomo wa Mogathe, mme Morena a tshegofatsa Obete-Etomo le lelapa lotlhe la gagwe.

₁₂Jaanong ga begelwa kgosi Dafita ga twe, Morena o tshegofaditse lelapa la ga Obete-Etomo le tsotlhe tse o nang natso ka ntlha ya Letlole la Modimo. Ke fa Dafita a ya, a ntsha Letlole la Modimo mo ntlong ya ga Obete-Etomo, a le isa kwa motseng wa ga Dafita ka boitumelo. ₁₃Mme ya re ba ba sikereng Letlole la Morena ba sena go tsamaya dikgato di le thataro, Dafita a dira setlhabelo sa kgomo le sa namane e e nonneng. ₁₄Dafita a eta a bina ka thata yotlhe fa pele ga Morena, a itlamile ka khiba ya boperesiti ya letseta. ₁₅Dafita le Baiseraele botlhe ba isa Letlole la Morena ka meduduetso le modumo wa dinaka. ₁₆Mme ya re Letlole la Morena le tsena mo motseng wa ga Dafita, Migale morwadia Saule a okomela ka fenstere; jaanong ya re a bona kgosi Dafita a tlolaka a bina fa pele ga Morena, a mo nyatsa mo pelong ya gagwe. ₁₇Ya re ba sena go tsenya Letlole la Morena le go le baya mo felong ga lone mo teng ga tente e Dafita a e le tlhometseng, Dafita a direla Morena ditlhabelo tsa phiso le tsa tebogo. ₁₈Ya re Dafita a sena go fetsa go tlisa ditlhabelo tsa phiso le tsa tebogo, a tshegofatsa morafe ka leina la Morena wa masomosomo. ₁₉A ba a abela bontsi jotlhe jwa morafe wa Iseraele, banna le basadi, mongwe le mongwe senkgwana se le sengwe le kabelo ya nama le senkgwana sa maswabi a moweine se le sengwe. Jaanong morafe otlhe wa ya kwa gae, mongwe le mongwe kwa lapeng la gagwe. ₂₀Ya re Dafita a boa go dumedisa ba lapa la gagwe, Migale morwadia Saule a tswa go kgatlhantsha Dafita a re: “Kgosi ya Iseraele e ne e itlotla jang kajeno, fa e ikapola mo matlhong a malata a batlhanka ba yona jaaka go ikapola fela batho ba ba difatlha.” ₂₁Mme Dafita a raya Migale a re: “Ke tla tlolaka fa pele ga Morena yo o ntlhaotseng mo boemong jwa ga rraago le jwa botlhe ba lelapa la gagwe ka go ntira moeteledipele wa morafe wa Morena wa Iseraele. Ke tla bina fa pele ga Morena. ₂₂Ke tla ba ke ikokobetsa gape bogolo go moo, ke ikaya yo mmotlana, mme mo malateng a o a umakileng ke tla tlotlega.” ₂₃Mme morwadia Saule, e bong Migale, a se ka a fiwa ngwana ope go ya letsatsing la loso lwa gagwe.