2 SAMUELE 23

₁Mafoko a bofelo a ga Dafita ke a; go bua Dafita morwa Isai, go bua monna yo o beilweng kwa godimo ke Motlodiwa wa Modimo wa ga Jakobe moopedi yo o ratwang wa difela tsa Iseraele, a re:

₈Maina a bagale ba ga Dafita ke a: Išebaale wa Hagemoni, tlhogo ya ba bararo; o kile a kgadikanya lerumo la gagwe godimo ga ba le 800 ba ba bolailweng ka nako e le nngwe. ₉Yo o tlhomaganang nae mo bagaleng ba bararo fa go Dafita e ne e le Eleasare morwa Doto morwa Ahohi. E rile ba kgoba Bafelesita ba ba neng ba phuthegile teng go tlhabana, mme banna ba Iseraele ba tshaba, ₁₀ene a ema a bolaya Bafelesita ga tsamaya seatla sa gagwe sa ba sa lapa, mme seatla sa gagwe sa kgomarela mo tšhakeng, mo Morena o bileng a dira phenyo e kgolo ka letsatsi leo. Banna ba ba neng ba mo hularetse ba boa go thukhutha fela.

₁₁A tlhomagannwa ke Sama morwa Agee wa Harari. Bafelesita ba kile ba phuthegela kwa Legi; teng go ne go le tshimo e e tletseng lotlhodi. Mme ya re banna ba tshaba Bafelesita, ₁₂ene a ikemisa mo gare ga tshimo eo, a e amoga Bafelesita, a ba bolaya. Morena a dira phenyo e kgolo ka mokgwa oo.

₁₃Ba bararo ba ditlhogo di le 30 tsa bagale ba kile ba theoga ba fitlha kwa go Dafita ka nako ya kotulo kwa logageng lwa Adulame. Lesomo la Bafelesita le ne le thibeletse mo molapong wa Refaime. ₁₄Ka nako eo Dafita o ne a le kwa thabeng e e femetsweng, mme setlhopha sa batlhabani ba Bafelesita se le kwa Betleheme. ₁₅Foo Dafita o ne a kgalegile a re: “Ke mang yo o tla nnosang metsi a a tswang go gelelwa kwa mokweleng o o fa kgorong ya Betleheme?” ₁₆Ke fa bagale ba bararo bao ba sutlhelela bothibelelo jwa Bafelesita, ba gelela metsi mo mokweleng o o fa kgorong ya Betleheme, ba a tsaya, ba a isa kwa go Dafita. Mme a gana go a nwa, a a tsholelela Morena ₁₇a re: “A go nne kgakala le nna, Morena, go ka dira selo se. A nka nwa madi a banna ba ba ileng ba tsenya maphelo a bone mo kotsing?” Mme a gana go a nwa. Bagale ba bararo bao ba dirile jalo.

₁₈Abisai monnaa Joabe morwa Seruya, e ne e le tlhogo ya ba bararo. O kile a kgadikanya lerumo la gagwe godimo ga ba ba 300 ba o neng a ba bolaya, mme o ne a tumile mo go ba bararo bao. ₁₉O ne a tlotlegile bogolo go ba bararo bao, a tswa molaodi wa bone, mme a bo a sa lekane le ba bararo ba pele.

₂₀Benaya morwa Joyata morwa monna wa senatla wa ditiro tse dikgolo wa kwa Kapsheele ene a bolaya bagale ba babedi ba Moabe. Gape ke ene yo o kileng a fologa a bolaela tau mo mokweleng ka letsatsi la semathana. ₂₁E bile ke ene yo o neng a bolaya monna yo montle wa Moegepeto. Moegepeto yoo o ne a tshwere lerumo ka seatla, mme ene a mo wela ka thobane fela, a phamola lerumo mo seatleng sa Moegepeto, a mmolaya ka lerumo la gagwe. ₂₂Ke tse di dirilweng ke Benaya morwa Joyata. Mme a tuma mo bagaleng ba bararo. ₂₃O ne a tlotlegile bogolo go ba ba 30, mme a bo a sa lekane le ba bararo. Mme Dafita a mmaya go nna molaodi wa bafemedi ba gagwe.

₂₄Asahele monnaa Joabe e ne e le mongwe wa ba ba 30 le Elehanane morwa Doto wa Betleheme ₂₅le Sama wa Harote le Eleka wa Harote ₂₆le Helese wa Phelete le Ira morwa Ikese wa Thekoa ₂₇le Abiesere wa Anathothe le Mebunai wa Huša ₂₈le Salemone wa Ahohi le Maharai wa Netofa ₂₉le Helebe morwa Baana wa Netofa le Ithai morwa Ribai wa Gibea wa Babenyamene ₃₀le Benaya wa Phirathone le Hitai wa Nagale-Gaaše ₃₁le Abi-Alebone wa Areba le Asemawethe wa Barehume ₃₂le Eliaba wa Saalebone le Jašene wa Kuni le Jonathane morwa ₃₃Sama wa Harari le Ahiame morwa Sarare wa Harari ₃₄le Elifelete morwa Ahasebai wa Maaga le Eliame morwa Ahithofele wa Gilo ₃₅le Hesero wa Karemele le Phaarai wa Arabe ₃₆le Igale morwa Nathane wa Soba le Bani wa Gate ₃₇le Seleke wa Moamone le Naharai wa Beerothe motshola-dibolai wa ga Joabe morwa Seruya ₃₈le Ira wa Moithere le Garebe wa Moithere ₃₉le Uria wa Mohethe. Botlhe ba ne ba le 37.