2 DIKGOSI 8

₁Elisa o ne a laetse mosadi yo a kileng a phedisa morwawe a re: “Nanoga, wena le ba lapa la gago, o ye go jaka kwa o ka jakang teng. Gonne Morena o tsisa tlala.” E bile ya tla mo lefatsheng dinyaga di supa. ₂Mosadi a nanoga, a dira ka fa lefokong la monna wa Modimo, a huduga le ba lapa la gagwe, a jaka kwa lefatsheng la Bafelesita dinyaga di supa.

₃Mme e rile dinyaga di supa di sena go feta, mosadi a boa kwa lefatsheng la Bafelesita; a feta a ya go ipega kwa kgosing ka ntlha ya ntlo ya gagwe le ka ntlha ya tshimo ya gagwe. ₄Mme kgosi ya bo e bua le Kehasi modiredi wa monna wa Modimo ya re: “A ko o mpolelele ditiro tse dikgolo tsotlhe tse Elisa o di dirileng.” ₅Jaanong ya re a bolelela kgosi jaaka a kile a tsosa moswi, ga tlhaga ene mosadi yo a kileng a tsosa morwawe, a ipega mo kgosing ka ntlha ya ntlo ya gagwe le ka ntlha ya tshimo ya gagwe. Ke fa Kehasi a re: “Kgosi, mong wa me, mosadi yole ke ene yo; le morwawe ke ene yo, yo Elisa o kileng a mo tsosa.” ₆Kgosi ya botsa mosadi, mme a e bolelela. Kgosi ya ba ya mo neela modiredi mongwe wa lapa la yona ya re: “Mmusetse tsotlhe tse o neng a na natso le tsotlhe tse tshimo e di ntshitseng go tloga letsatsing le o neng a tlogela lefatshe ka lone go fitlha jaanong.”

₇Letsatsi le lengwe Elisa a ya kwa Damaseko, mme Benehatate kgosi ya Siria a bo a lwala. Ke fa a begelwa go twe: “Monna wa Modimo o gorogile mono.” ₈Jaanong kgosi ya laela Hasaele ya re: “Tsaya mpho, o ye go kgatlhantsha monna wa Modimo, o be o botse Morena ka ene gore a ke tla fola mo bolwetseng jo?” ₉Mme Hasaele a ya go mo kgatlhantsha, a tshotse mpho ya dilo tse dintle tsa mefutafuta tsa Damaseko, e le morwalo wa dikammele di le 40. A fitlha a ema fa pele ga gagwe a re: “Morwao Benehatate kgosi ya Siria o nthomile kwano go wena a re: ‘A ke tla fola mo bolwetseng jo?’ ”

₁₀Elisa a mo araba a re: “Yaa o mo ree o re: ‘O tla fola bolwetse.’ Mme Morena o ntshupeditse gore o tla swa e se ka bolwetse.” ₁₁Monna wa Modimo a emisa sefatlhego sa gagwe, a rerega mo go fetang tekanyo, a ba a lela. ₁₂Mme Hasaele a botsa a re: “Mong wa me o lelelang?” A fetola a re: “Ke a lela, gonne ke itse tse di bosula tse o tla di direlang Baiseraele. Metse e e femetsweng ya bone o tla e latlhela mo molelong, o bolaya makau a bone ka tšhaka, o tšhwetlakanya bana ba bone, o phunya ba baimana ba bone dimpa.”

₁₃Hasaele a ba a re: “Kana motlhanka wa gago yo e leng ntšwa ke eng, mo a ka dirang dilo tse di kana tse?” Elisa a araba a re: “Morena o go mpontshitse o le kgosi ya Siria.”

₁₄A ba a tloga kwa go Elisa, mme ya re a fitlha kwa go mongwagwe, ene a mmotsa a re: “Elisa o go reile a reng?” A araba a re: “O ntheile a re: ‘O tla fola bolwetse.’ ” ₁₅Mme kamoso a tsaya kobo, a e ina mo metsing, a e ala mo sefatlhegong sa gagwe mo a bileng a swa, mme Hasaele a nna kgosi mo boemong jwa gagwe.

₁₆Jorame morwa Josafate kgosi ya Juta o ne a simolola go busa ka ngwaga wa botlhano wa puso ya ga Jorame morwa Ahabe kgosi ya Iseraele. ₁₇E rile a simolola go busa, a bo a le dinyaga di le 32; a busa dinyaga di pedi kwa Jerusalema. ₁₈A sepela mo tseleng ya dikgosi tsa Iseraele jaaka go dirile ba lapa la ga Ahabe; gonne morwadia Ahabe e ne e le mosadi wa gagwe, mme a dira tse di bosula mo matlhong a Morena. ₁₉Mme Morena a bo a sa rate go senya Juta ka ntlha ya ga Dafita motlhanka wa gagwe, jaaka a ne a mo solofeditse go naya ene le bomorwawe lobone ka metlha yotlhe.

₂₀Ka malatsi a gagwe Baetomo ba ikepa ba tswa mo taolong ya Juta, ba ipeela kgosi. ₂₁Ke fa Jorame a bolola, a ya kwa Saire a na le dikoloi tsotlhe tsa ntwa. Mme a nanoga bosigo, a sutlha Baetomo ba ba mo tsentseng gare, ene le balaodi ba dikoloi tsa ntwa, mme batlhabani ba tshabela kwa gae. ₂₂Baetomo ba ikepa jalo, ba tswa mo pusong ya Juta go fitlha letsatsing la kajeno. Ba Lebena le bone ba ikepa ka sona sebaka seo.

₂₃Ditirafalo tse dingwe tsa ga Jorame le tsotlhe tse o neng a di dira, kana di kwadilwe mo lokwalong lwa ditirafalo tsa sebaka sa dikgosi tsa Juta. ₂₄Mme Jorame a robala le borraagwe, a fitlhwa fa go bone mo motseng wa ga Dafita, mme Ahasia morwawe a nna kgosi mo boemong jwa gagwe.

₂₅Ahasia morwa Jorame kgosi ya Juta a simolola go busa ka ngwaga wa some pedi wa puso ya ga Jorame morwa Ahabe kgosi ya Iseraele. ₂₆Ya re Ahasia a simolola go busa, a bo a le dinyaga di le 22; a busa ngwaga o le mongwe fela kwa Jerusalema; leina la ga mmaagwe e le Athalea morwadia Ahabe morwa Omeri kgosi ya Iseraele. ₂₇A sepela mo tseleng ya lelapa la ga Ahabe, a dira tse di bosula mo matlhong a Morena jaaka ba lapa la ga Ahabe; gonne rraagwe e ne e le mokgonyane wa lelapa la ga Ahabe.

₂₈O kile a ya le Jorame morwa Ahabe go tlhabana le Hasaele kgosi ya Siria kwa Ramothe wa Gileate, mme Basiria ba khutla Jorame. ₂₉Ke fa kgosi Jorame a boa gore a alafiwe dintho kwa Iserele tse Basiria ba di mo ntshitseng kwa Ramothe, fa a tlhabana le Hasaele kgosi ya Siria. Mme Ahasia morwa Jorame kgosi ya Juta a ya go lekola Jorame morwa Ahabe kwa Iserele, ka a ne a lwala.