2 DIKGOSI 21

₁E rile Manase a simolola go busa, a bo a le dinyaga di le 15; a busa dinyaga di le 55 kwa Jerusalema. Leina la ga mmaagwe e ne e le Hefesiba. ₂A dira tse di bosula mo matlhong a Morena tse di tshwanang le makgapha a baheitane ba Morena o neng a ba lelekile fa pele ga Baiseraele. ₃A tsosa dithota tsa tlhabelo tse Hesekia rraagwe o neng a di sentse; a agela Baale dialetare, a dira Ašera jaaka go dirile Ahabe kgosi ya Iseraele; a ba a obamela lesomo lotlhe la legodimo a le direla. ₄Le gona a aga dialetare tse di ntseng jalo mo Ntlong ya Morena e Morena o neng a buile ka ga yona a re: “Ke tla baya leina la me mo Jerusalema.” ₅O bile a agela lesomo lotlhe la legodimo dialetare mo malapeng a mabedi a Ntlo ya Morena. ₆A ralatsa morwawe molelo, a dira tsa mereo ya boloi le tsa botlhodi, a tlhoma ba ba buang le baswi le baitseanape a dira tse dintsi tse di bosula mo matlhong a Morena, a mo gakatsa. ₇Le gona a baya setshwantsho sa ga Ašera se o neng a se dirile mo Ntlong e Morena o neng a buile ka ga yona le Dafita le Salomo morwawe a re: “Mo Ntlong e le mo Jerusalema yo ke mo tlhophileng mo ditsong tsotlhe tsa Iseraele ke fa ke tla bayang leina la me teng ka bosakhutleng. ₈Le gona ga nkitla ke tlhola ke kgarakgatsha dinao tsa Baiseraele gore ba tswe mo lefatsheng le ke le neileng borraabo. Ke raya fela fa ba tlhokomela go dira tsotlhe tse ke di ba laetseng, e bong ka fa molaong otlhe o Moše motlhanka wa me o neng a o ba laela.” ₉Mme ba se ka ba utlwa, mme Manase a ba timetsa gore ba dire bosula bogolo go baheitane, ba Morena o neng a ba nyeleditse fa pele ga Baiseraele.

₁₀Ke fa Morena a bua ka baporofeti batlhanka ba gagwe a re: ₁₁“E re ka Manase kgosi ya Juta e dirile makgapha ao, ya dira bosula jo bo fetang tsotlhe tse di kileng tsa dirwa ke Baamori ba ba neng ba le teng pele ga yona ya leofisa le Bajuta ka medimo e e maila ya yona: ₁₂Ke ka moo Morena, Modimo wa Iseraele, o buang jaana o a re: ‘Bonang, ke tla tlisetsa Jerusalema le Juta tatlhego e mongwe le mongwe yo o e utlwelang, ditsebe tse pedi tsa gagwe di tla sumang ka yona. ₁₃Ke tla gagamatsa mogala o o lekanyang wa Samaria mo godimo ga Jerusalema le serophiso sa lelapa la ga Ahabe, ke phimola Jerusalema jaaka go phimolwa mogopo, ke mo phimola le go mo ribegetsa. ₁₄Ke tla latlha masalela a boswa jwa me, ke a neela mo diatleng tsa baba ba ona gore e nne thopo le thukhutho tsa baba botlhe ba ona, ₁₅ka ba dirile tse di bosula mo matlhong a me, ba nna ba nkgalefisa go tloga ka letsatsi le borraabo ba neng ba huduga kwa Egepeto ka lone go fitlha letsatsing leno.’ ”

₁₆Le gona Manase o ne a tsholola madi a mantsintsi a a se nang molato, a ba a a tlatsa Jerusalema mo ntlheng tsotlhe kwa ntle ga boleo jwa gagwe jo o neng a leofisa Bajuta ka jona gore ba dire tse di bosula mo matlhong a Morena.

₁₇Ditirafalo tse dingwe tsa ga Manase le tsotlhe tse o neng a di dira le boleo jwa gagwe jo o neng a bo dira kana di kwadilwe mo lokwalong lwa ditirafalo tsa sebaka sa dikgosi tsa Juta. ₁₈Mme Manase a robala le borraagwe, a fitlhwa mo segotlong sa gagwe, mo segotlong sa ga Usa, mme Amone morwawe a nna kgosi mo boemong jwa gagwe.

₁₉Amone o ne a le dinyaga di le 22 fa a nna kgosi; a busa dinyaga di le pedi kwa Jerusalema. Leina la ga mmaagwe e ne e le Mesulemethe morwadia Haruse wa Joteba. ₂₀A dira tse di bosula mo matlhong a Morena jaaka go dirile Manase rraagwe. ₂₁A sepela gotlhe mo tseleng e rraagwe o neng a sepela mo go yona; a direla medimo e e maila e rraagwe o neng a e direla, a e obamela. ₂₂A tlogela Morena, Modimo wa borraagwe; a se ka a sepela mo tseleng ya Morena.

₂₃Mme batlhanka ba ga Amone ba mo tsosetsa leferetlho, ba mmolaela mo ntlong ya gagwe. ₂₄Mme batho ba kwa nageng ba bolaya botlhe ba ba neng ba tsoseditse kgosi Amone leferetlho; ba dira Josia morwawe kgosi mo boemong jwa gagwe.

₂₅Ditirafalo tse dingwe tsa ga Amone le tse o neng a di dira kana di kwadilwe mo lokwalong lwa ditirafalo tsa sebaka sa dikgosi tsa Juta. ₂₆O ne a fitlhwa mo lebitleng la gagwe mo segotlong sa ga Usa, mme Josia morwawe a nna kgosi mo boemong jwa gagwe.