2 DIKGOSI 17

₁Hosea morwa Ela o na a simolola go busa Iseraele kwa Samaria ka ngwaga wa 12 wa puso ya ga Ahase kgosi ya Juta; a busa dinyaga di le robongwe. ₂O ne a dira tse di bosula mo matlhong a Morena, fela e seng jaaka dikgosi tsa Iseraele tse di neng di le teng pele ga gagwe. ₃Mme Salemanesere kgosi ya Asiria ya mmololela, mme Hosea a nna motlhanka wa yona, a e ntshetsa lekgetho. ₄Mme e rile kgosi ya Asiria e bona moferefere mo go Hosea, ka a ne a romile barongwi kwa go So, kgosi ya Egepeto, mme a sa tlhole a ntshetsa kgosi ya Asiria lekgetho jaaka a ne a dira ka ngwaga le ngwaga, kgosi ya Asiria ya mo tshwara ya mo tlhatlhela mo ntlong ya kgolegelo, ya mmofelela teng.

₅Kgosi ya Asiria ya ba ya bolola ya ralala lefatshe lotlhe, ya bololela motse wa Samaria, ya o dikanyetsa ka ntwa dinyaga di le tharo. ₆Ka ngwaga wa robongwe wa puso ya ga Hosea kgosi ya Asiria ya thopa Samaria, ya isa Baiseraele mo botshwarong kwa Asiria, ya ba baya kwa Hala le fa Habore noka ya Gosane le mo metseng ya Media.

₇Ga dirafala jalo, gonne Baiseraele ba ne ba leofetse Morena, Modimo wa bone, o o neng o ba ntshitse kwa lefatsheng la Egepeto mo taolong ya ga Farao kgosi ya Egepeto, mme ba boifa medimo e sele. ₈Baiseraele ba sepela ka fa mekgweng ya ditšhaba tse Morena o neng a di lelekile fa pele ga bone le ka fa mekgweng ya dikgosi tsa Iseraele e di neng di na nayo. ₉Baiseraele ba dira dilo sephiring tse di ronang Morena, Modimo wa bone; ba ikagela dithota tsa tlhabelo mo metseng yotlhe ya bone, le fa e le motsana wa lonaka lwa balebedi fela gongwe e le motse o o femetsweng. ₁₀Ba itlhomela majwe a a motloutlo le medimako ya Ašera mo thabaneng nngwe le nngwe e e godimo le fa tlase ga setlhare sengwe le sengwe se setala. ₁₁Ba tshuba maswalo teng mo dithoteng tsotlhe tsa tlhabelo jaaka baheitane, ba Morena o neng a ba lelekile fa pele ga bone; ba dira dilo tse di bosula, e le go gakatsa Morena. ₁₂Ba direla medimo e e maila e Morena o neng a ba laetse ka ga yona a re: “Lo se ka lwa dira selo se!”

₁₃Mme Morena o ne a tlhagisa Baiseraele le Bajuta ka baporofeti botlhe le ka baboni botlhe a re: “Boang lo tlogele ditsela tsa lona tse di bosula, lo tshegetse ditaolo tsa me le melao ya me ka fa molaong otlhe o ke o laetseng borraeno o ke o rometseng kwa go lona ka baporofeti, batlhanka ba me.” ₁₄Fela ba se ka ba utlwa, mme ba gagamatsa dithamo tsa bone jaaka dithamo tsa borraabo ba ba neng ba sa dumele mo Moreneng, Modimo wa bone. ₁₅Ba nyatsa melao ya gagwe le kgolagano ya gagwe e o neng a e dirile le borraabo le ditshupo tsa gagwe tse o ba tlhagisitseng ka tsona; ba latela medimo e e seng ya sepe, ba be ba fetoga ba e seng ba sepe; ba latela baheitane ba ba mo tikologong ya bone ba Morena o neng a ba laetse ka ga bone gore ba se ka ba ba etsa. ₁₆Mme ba tlogela ditaolo tsotlhe tsa Morena, Modimo wa bone, ba itirela dinamane tse pedi tse di bopilweng, ba dira setshwantsho sa Ašera, ba obamela lesomo lotlhe la legodimo, ba direla Baale. ₁₇Bomorwaa-bone le bomorwadia-bone ba ba ralatsa molelo, ba dira tsa boitseanape le tsa botlhodi, ba ineela go dira tse di bosula mo matlhong a Morena go mo gakatsa. ₁₈Ka moo Morena a tukela Baiseraele bogale thata, a ba tlosa fa pele ga sefatlhego sa gagwe; ga se ka ga sala ope fa e se lotso lwa Juta lo le losi fela.

₁₉Le Bajuta ba se ka ba tshegetsa ditaolo tsa Morena, Modimo wa bone, mme ba sepela ka fa mekgweng e Baiseraele ba e dirileng. ₂₀Ka moo Morena a latlha losika lotlhe lwa Baiseraele, a ba kokobetsa, a ba neela mo diatleng tsa bathukhuthi ga tsamaya a ba leleka fa pele ga gagwe.

₂₁Gonne Morena o ne a gagotse Baiseraele mo ntlong ya ga Dafita, mme ba dira Jerobeame morwa Nebate kgosi, mme a faposa Baiseraele mo Moreneng, a ba leofisa boleo jo bogolo. ₂₂Baiseraele ba ne ba sepela mo maleong otlhe a ga Jerobeame a o neng a a dira, ba se ka ba a tlogela, ₂₃ga tsamaya Morena a tlosa Baiseraele fa pele ga sefatlhego sa gagwe jaaka a ne a bôpa ka batlhanka botlhe ba gagwe e bong baporofeti. Baiseraele ba ne ba ntshiwa jalo mo nageng ya bone, ba isiwa botshwarong kwa Asiria, ba nna teng go fitlha letsatsing leno.

₂₄Kgosi ya Asiria ya tlisa batho ba Babele le ba Khutha le ba Awa le ba Hamathe le ba Sefarwaime, ya ba baya mo metseng ya Samaria boemong jwa Baiseraele, mme ba rua Samaria, ba nna mo metseng ya teng. ₂₅Mme e rile ba simolola go nna teng, ba bo ba sa itse Morena; ke fa Morena a romela ditau kwa go bone, tsa nna tsa bolaya bangwe ba bone. ₂₆Kgosi ya Asiria ya bolelelwa ga twe: “Ba ditšhaba ba o ba hudusitseng, wa ba baya mo metseng ya Samaria, ga ba itse tse di tshwanetseng Modimo wa lefatshe lele; ka moo o rometse ditau kwa go bone. Bona, di a ba bolaya, ka ba sa itse tse di tshwanetseng Modimo wa lefatshe lele.” ₂₇Ke fa kgosi ya Asiria e laela e re: “Isang mongwe wa baperesiti teng, ba lo ba tlositseng gona gore a ye a nne teng, a ba rute tse di tshwanetseng Modimo wa lefatshe lele.” ₂₈Mongwe wa baperesiti ba ba neng ba tlositswe mo Samaria a tla jalo, a nna kwa Bethele, a nna a ba ruta ka fa ba tshwanetseng go boifa Morena ka teng.

₂₉Mme setšhaba sengwe le sengwe sa itirela modimo wa sona, sa o baya mo ditempeleng tsa dithota tsa tlhabelo tse Basamaria ba neng ba di dirile, setšhaba sengwe le sengwe mo metseng ya sona e se neng se agile mo go yona: ₃₀Banna ba Babele ba dira setshwantsho sa Sukothe-Benothe, banna ba Khutha ba dira sa Neregale, banna ba Hamathe ba dira sa Ašima, ₃₁ba Awa ba dira sa Nibehase le sa Tharethake, ba Sefarwaime ba fisetsa Ateramelege le Anamelege medimo ya Sefarwaime bana ba bone ka molelo. ₃₂Ba bile ba boifa Morena, ba ipeela baperesiti ba dithota tsa tlhabelo ba ba tswang mo go bone botlhe; bao ba ba direla mo ditempeleng tsa dithota tsa tlhabelo. ₃₃Ba ne ba boifa Morena, ba bile ba direla medimo ya ga bone ka fa mokgweng wa ditšhaba tse ba neng ba hudusitswe mo go tsona.

₃₄Go fitlha letsatsing leno ba dira ka fa mekgweng ya pele. Ga ba boife Morena ka botlalo; le gona ga ba dire ka fa melaong ya bone le ka fa mokgweng wa bone ka botlalo; le e seng ka fa molaong le ka fa ditaolong tse Morena o neng a di laela bomorwa Jakobe yo a neng a mo taya leina la Iseraele. ₃₅Kana Morena o kile a dira kgolagano nabo, a ba laela a re: “Se boifeng medimo e sele le e seng go e obamela le e seng go e direla le e seng go e tlhabela. ₃₆Mme lo boife Morena yo o lo ntshitseng kwa lefatsheng la Egepeto ka thata e kgolo le ka letsogo le le otlologileng, lo mo obamele lo mo tlhabele. ₃₇Lo tshegetse melaetsa le ditshwanelo le molao le taolo tse o di lo kwaletseng go dira ka tsona ka metlha yotlhe, mme se boifeng medimo e sele. ₃₈Le gona lo se ka lwa lebala kgolagano e ke e dirileng le lona, mme lo se boife medimo e sele. ₃₉Mme lo boife Morena, Modimo wa lona; ene o tla lo golola mo diatleng tsa baba botlhe ba lona.” ₄₀Fela ba se ka ba utlwa, mme ba nna ba dira ka fa mokgweng wa bone wa pele.

₄₁Ditšhaba tseo tsa nna tsa boifa Morena, tsa ba tsa nna tsa direla medimo ya diseto ya ga bone. Le bana ba bone le bana ba bana ba bone ba dira le kajeno jaaka go dirile borraabo.