2 DITIRAFALO 4

₁Le gona a dira aletare ya kgotlho, boleele jwa yona e le mabogo a le 20 le bophara jwa yona e le mabogo a le 20, bogodimo jwa yona e le mabogo a le some. ₂A ba a dira lewatle le le bopilweng la kgotlho; go le kgabaganya go tswa losing go ya losing e ne e le mabogo a le some; le le tshekeletsa; boteng jwa lone e le mabogo a le matlhano, mme mogala wa mabogo a le 30 o le kopanya tikologong. ₃Ditshwantsho tsa diphare di ne di le dikologa ka fa tlase ga losi tikologong yotlhe; di ne di le some mo letsogong le le lengwe, di dikologa lewatle tikologong, e le methalo e mebedi ya diphare, di bopilwe mmogo le lewatle, fa le bopiwa. ₄Le ne le pegilwe mo dikgomong di le 12, di le tharo di lebile kwa bokone, tse tharo kwa bophirimatsatsi, tse tharo kwa borwa, tse tharo kwa botlhabatsatsi, mme lewatle le le mo godimo ga tsona, marago otlhe a le ka fa tlase ga lone. ₅Bokima jwa lobota lwa lone e ne e le bophara jwa seatla; losi lwa lone lo ne lo bopegile jaaka losi lwa nkgo jaaka sethunya se se thuntseng. Le ne le tladiwa ke dinkgo di le 3 000. ₆A ba a dira megopo ya tlhatswetso e le some, a baya e metlhano ntlheng ya le le jang, e metlhano ntlheng ya la molema gore go tlhatswiwe mo go yona. Ba tsokotsa dilo tsa ditlhabelo tsa phiso mo go yona. Mme lewatle e ne e le la baperesiti go tlhapa mo go lone.

₇A ba a dira ditlhomo tsa dipone tsa gouta di le some ka fa molaong wa tsona, a di baya mo Felong-ga-Boitshepo, tse tlhano mo ntlheng ya le le jang, tse tlhano mo ntlheng ya la molema. ₈A ba a dira ditafole di le some, a di baya mo Felong-ga-Boitshepo, tse tlhano mo ntlheng ya le le jang, tse tlhano mo ntlheng ya la molema; a ba a dira dijana tsa go kgatsha di le lekgolo tsa gouta.

₉A ba a dira lelapa la baperesiti le lelapa le legolo le ditswalo tsa lelapa; dipati tsa tsona a di manega kgotlho. ₁₀Lewatle lone a le baya kwa sekhutlong sa Tempele mo botshekeng jwa borwa le botlhabatsatsi.

₁₁Hurame a ba a dira dipitsa le diolola-molora le dijana tsa go kgatsha. Hurame a ba a fetsa go dira tiro e a e direlang kgosi Salomo kwa Ntlong ya Modimo: ₁₂E bong maotwana a mabedi le dikgolokwe tsa ditlhogo tse di mo godimo ga maotwana a mabedi le ditharaanyo tse pedi tsa go kgabisa dikgolokwe tse pedi tsa ditlhogo tse di mo godimo ga maotwana ₁₃le digaranata di le 400 tsa ditharaanyo tse pedi, e le dikeetane tse pedi tsa digaranata tsa tharaanyo nngwe le nngwe go kgabisa dikgolokwe tse pedi tsa ditlhogo tse di mo godimo ga maotwana ₁₄le dikolotsana tsa tlhatswetso di le some le megopo e le some mo go tsona ₁₅le lewatle le le lengwe le dikgomo di le 12 ka fa tlase ga lone ₁₆le dipitsa le diolola-molora le diroophata le didiri tsotlhe tsa teng. Tsotlhe tseo Hurame-Abi a di direla kgosi Salomo go nna tsa Ntlo ya Morena, e le tsa kgotlho e e gotlhilweng.

₁₇Kgosi ya laela Hurame go di bopa kwa lebaleng la Joretane ka dibopelo tsa mmu wa letsopa fa gare ga Sukothe le Sereta. ₁₈Salomo a dira didiri tsotlhe tseo, e le tse dintsintsi; gonne bokete jwa kgotlho ya tsona bo ne bo se na selekanyo.

₁₉Salomo a dira didiri tsotlhe tsa Ntlo ya Modimo, e bong aletare ya gouta le ditafole tsa dinkgwe tsa tshupo; ₂₀le ditlhomo tsa dipone le dipone tsa tsona tsa gouta e e sa pekwang go di tshuba ka fa molaong ka fa ntle ga Felo fa go kwa Tengteng; ₂₁le dithunya le dipone le dipoma tsa tsona tsa gouta; tsotlhe e le tsa gouta e e sa pekwang; ₂₂le dithipa le dijana tsa go kgatsha le megopo le diolola-molora tsa gouta e e sa pekwang. Fa e le mojako wa Tempele, ditswalo tsa ona tsa ka fa teng tsa Felo-ga-Boitshepo-jwa-Maitshepo le ditswalo tsa Felo-ga-Boitshepo e ne e le tsa gouta.