1 DIKGOSI 15

₁Abiame o ne a simolola go busa Juta ka ngwaga wa some robedi wa puso ya ga Jerobeame morwa Nebate. ₂A busa dinyaga di le tharo kwa Jerusalema; leina la ga mmaagwe e ne e le Maaga morwadia Abisalome. ₃A sepela mo maleong otlhe a ga rraagwe a o a dirileng pele ga gagwe; pelo ya gagwe e ne e sa goge le Morena, Modimo wa gagwe, ka botlalo jaaka pelo ya ga Dafita rraagwe. ₄Gonne Morena, Modimo wa gagwe, o ne wa mo naya lobone mo Jerusalema ka ntlha ya ga Dafita fela ka go tlhoma morwawe bogosing sehularong sa gagwe le ka go boloka Jerusalema. ₅Ka gonne Dafita o ne a dirile tse di siameng mo matlhong a Morena, mme a se ka a fapoga mo go sepe sa tse a di mo laetseng ka malatsi otlhe a bophelo jwa gagwe, fa e se ka go leofela Uria wa Mohethe fela. ₆Go ne go le ntwa fa gare ga Abiame le Jerobeame ka malatsi otlhe a bophelo jwa gagwe. ₇Mme ditirafalo tse dingwe tsa ga Abiame le tsotlhe tse o neng a di dira kana di kwadilwe mo lokwalong lwa ditirafalo tsa sebaka sa dikgosi tsa Juta. Mme go ne go le ntwa fa gare ga Abiame le Jerobeame.

₈Mme Abiame a robala le borraagwe, a fitlhwa mo motseng wa ga Dafita, mme Asa morwawe a nna kgosi mo boemong jwa gagwe.

₉Asa kgosi ya Juta a simolola go busa ka ngwaga wa soma mabedi wa puso ya ga Jerobeame kgosi ya Iseraele. ₁₀A busa dinyaga di le 41 kwa Jerusalema. Leina la ga koko-a-gwe e ne e le Maaga morwadia Abisalome. ₁₁Asa a dira tse di siameng mo matlhong a Morena jaaka Dafita rraagwe. ₁₂A leleka banna ba ba direlang medimo ka boaka mo lefatsheng, a ba a tlosa ditshwantsho tsotlhe tsa medimo ya maila tse borraagwe ba di dirileng. ₁₃Le gona a ntsha koko-a-gwe, e bong Maaga mo maemong a bommakgosi, ka a dirile setshwantsho se se maswe sa Ašera. Asa a rema setshwantsho se se maswe seo sa gagwe, a se fisa mo molapong wa Kiterone. ₁₄Legale dithota tsa tlhabelo tsa se ka tsa tlosiwa; fela pelo ya ga Asa e ne ya nna le Morena ka botlalo ka malatsi otlhe a gagwe. ₁₅Le gona a tsenya dineo tse di boitshepo tsa ga rraagwe le dineo tse di boitshepo tsa gagwe mo Ntlong ya Morena, e bong selefera le gouta le dilwana tsa mefutafuta.

₁₆Mme go ne go le ntwa fa gare ga Asa le Baesa kgosi ya Iseraele ka malatsi aotlhe a bone. ₁₇Baesa kgosi ya Iseraele e kile ya bololela Juta; ya ba ya agelela Rama gore e thibele batho go ka tsena gongwe go tswa kwa go Asa kgosi ya Juta. ₁₈Ke fa Asa a tsaya selefera yotlhe le gouta e e setseng mo mahumong a Ntlo ya Morena le a ntlo ya kgosi, a di neela batlhanka ba gagwe diatleng, mme a ba roma kwa go Benehatate morwa Taberimone morwa Hesione kgosi ya Siria e e neng e agile kwa Damaseko, a re: ₁₉“Go na le kgolagano gare ga me le wena le gare ga rre le rraago. Ke go romela neo ya selefera le gouta ke eo. Yaa o senye kgolagano ya gago le Baesa kgosi ya Iseraele gore e ntlogele.”

₂₀Benehatate a utlwana le kgosi Asa, a roma balaodi ba mephato ya gagwe go ya go tlhasela metse ya Iseraele; a senya motse wa Iyone le wa Dane le wa Abele-Bethe-Maaga le Khinerothe yotlhe le lefatshe lotlhe la Nafetale. ₂₁Mme ya re Baesa a utlwa jalo, a khutla go agelela Rama, a boela kwa Thiresa.

₂₂Ke fa kgosi Asa a kua Bajuta botlhe, a sa tlogele ope, mme ba tlosa mafika a Rama le dikgong tsa teng tse Baesa o neng a ageletse ka tsona, mme kgosi Asa a agelela Geba wa Benyamene le Mitsepha ka tsona.

₂₃Ditirafalo tsotlhe tse dingwe tsa ga Asa le ditiro tsotlhe tsa gagwe tsa bopelokgale le tsotlhe tse o neng a di dira le metse e o neng a e aga kana di kwadilwe mo lokwalong lwa ditirafalo tsa sebaka sa dikgosi tsa Juta. Fela e rile a sena go tsofala, a nna le bolwetse jwa maoto. ₂₄Mme Asa a robala le borraagwe, a fitlhwa fa go bone mo motseng wa ga Dafita rraagwe, mme Josafate morwawe a nna kgosi mo boemong jwa gagwe.

₂₅Natabe morwa Jerobeame a simolola go busa Baiseraele ka ngwaga wa bobedi wa puso ya ga Asa kgosi ya Juta; a busa Baiseraele dinyaga di le pedi. ₂₆A dira tse di bosula mo matlhong a Morena, a sepela mo tseleng ya ga rraagwe le mo boleong jwa gagwe jo o neng a leofisa Baiseraele ka jona.

₂₇Mme Baesa morwa Ahia wa lotso lwa ga Isašare a mo tsosetsa moferefere, a mmolaela kwa Gibethone motseng wa Bafelesita; gonne Natabe le Baiseraele botlhe ba ne ba dikanyetsa Gibethone ka ntwa. ₂₈Baesa a mmolaya ka ngwaga wa boraro wa puso ya ga Asa kgosi ya Juta, a ba a nna kgosi mo boemong jwa gagwe. ₂₉Mme ya re a ntse a busa, a bolaya botlhe ba lelapa la ga Jerobeame, a se ka a sadisa ope wa ga Jerobeame ga tsamaya a ba nyeletsa ka fa lefokong la Morena le a le buileng ka motlhanka wa gagwe Ahia wa Silo ₃₀ka ntlha ya dibe tsa ga Jerobeame tse o neng a di dirile, a leofisa Baiseraele ka tsona le ka ntlha ya thumolo ya gagwe e o neng a galefisa Morena, Modimo wa Iseraele, ka yona.

₃₁Mme ditirafalo tse dingwe tsa ga Natabe le tsotlhe tse o neng a di dira kana di kwadilwe mo lokwalong lwa ditirafalo tsa sebaka sa dikgosi tsa Iseraele. ₃₂Go ne go le ntwa fa gare ga Asa le Baesa kgosi ya Iseraele ka malatsi otlhe a bone.

₃₃Baesa morwa Ahia o ne a simolola go busa Baiseraele botlhe kwa Thiresa ka ngwaga wa boraro wa puso ya ga Asa kgosi ya Juta, a busa dinyaga di le 24; ₃₄a dira tse di bosula mo matlhong a Morena, a sepela mo tseleng ya ga Jerobeame le mo boleong jwa gagwe jo o neng a leofisa Baiseraele ka jona.