SEKARIA 4

₁Moengele yo o buang le nna a tla gape, a ntsosa jaaka monna yo o tsosiwang a robetse. ₂Mme a nthaya a re: “O bonang?” Mme ka re: “Ke lebile, mme bonang, setlhomo sa lobone e le sa gouta sotlhe fela, se na le nkgwana ya sone mo godimo ga sone; le dilampa tsa sone di supa di le mo go sone; lampa nngwe le nngwe e na le ditlhaka tse di logapa di supa, tse di kwa godimo ga sone; ₃le ditlhare di le pedi tsa matlhware fa go sone, sengwe ka fa tsogong le legolo ga nkgwana, se sengwe ka fa ntlheng ya la molema ga yone.” ₄Mme ka fetola moengele yo o buang le nna, ka re: “Dilo tse ke eng, morena wa me?”

₅Foo moengele yo o buang le nna a mphetola, a re: “A ga o itse go re dilo tse ke eng?” Mme ka re: “Nnyaa morena wa me.” ₆Foo a mphetola a re: “Le ke lone lefoko la ga Jehofa kwa go Serubabele, a re: ‘Ga se ka thata, le fa e le ka nonofo, fa e se ka mowa wa me,’ go bua Jehofa wa masomosomo. ₇O mang, wena thaba e kgolo? O tlaa fetoga o nna lobala fa pele ga Serubabele; mme o tlaa ntsha lentswe la tlhogo ka go thela lošalaba lwa go re: ‘Matlhogonolo, matlhogonolo a nne mo go wena.’ ”

₈Gape lefoko la ga Jehofa la tla mo go nna, la re: ₉“Diatla tsa ga Serubabele di theile motheo wa ntlo e; diatla tsa gagwe di tlaa ba di e wetsa; mme o tlaa itse fa Jehofa wa masomosomo a nthomile kwa go bone. ₁₀Gonne e mang yo o nyaditseng motlha wa dilo tse dipotlana? Gonne ba tlaa itumela, ba tlaa bona selekanyo se se thokgamisang mo seatleng sa ga Serubabele, e bong tse di supa tse, tse e leng matlho a ga Jehofa; a ya kwa le kwa mo lefatsheng lotlhe.”

₁₁Foo ka mo fetola ka re: “Ditlhare tse pedi tse tsa matlhware ke eng, tse di ka fa ntlheng ya letsogo le legolo ga setlhomo sa lobone, le ka fa ntlheng ya la molema ga sone?” ₁₂Ka mo fetola lwa bobedi, ka re: “Ke eng dikala tse, tse pedi tsa motlhware tse di bapileng le ditlhaka tse di logapa tsa gouta, tse di ntshang lookwane lo lo gouta mo teng ga tsone ka tsosi?”

₁₃Mme a mphetola a re: “A ga o itse gore dilo tse ke eng?” Mme ka re: “Nnyaa morena wa me.”

₁₄Foo a re: “Tse ke bomorwa lookwane ba babedi, ba ba emeng fa go Morena wa lefatshe lotlhe.”