SEFELA SA DIFELA 4

₁Bona, o montle moratwa wa me;

bona o montle;

matlho a gago a ntse jaaka matseba

ka fa teng ga sesiro sa gago;

moriri wa gago o ntse jaaka

letsomane la dipodi le le robetseng

fa mohapheng wa thaba ya Gileate.

₂Meno a gago a ntse jaaka letsomane

la dinku tse dinamagadi

tse di beotsweng seša,

tse di tlhatlogileng mo tlhapisong;

tse nngwe le nngwe ya tsone

e nang le bana ba mafatlha,

le tse go se nang epe mo go tsone

e e swetsweng.

₃Dipounama tsa gago di ntse

jaaka tlhale e e ntseng e re, tlere!

Molomo wa gago le one o montle;

dipupu tsa gago tsa matlho

di ntse jaaka kgapetla ya garanate

ka fa teng ga sesiro sa gago.

₄Thamo ya gago e ntse jaaka

kago e e godileng ya ga Dafite,

e e agetsweng polokelo ya dibolao,

e go pegilweng menakane

e le sekete mo go yone,

dithebe tsotlhe tsa banna

ba ba dinatla.

₅Mabele a gago a mabedi

a ntse jaaka ditshetswana di le pedi,

tsa mafatlha tse di hulang

mo dithunyeng tsa masoma.

₆Ke tlaa ikela kwa thabeng ya mera,

le kwa thabaneng ya lebano

go tsamaya letsatsi le fela,

le meriti e fofela koo.

₇O montle gotlhe fela

moratwa wa me;

ga go na setshubaba mo go wena.

₈Tswa le nna mo Lebanone;

mogatsaka,

o tswe le nna mo Lebanone;

leba o le kwa tlhoreng ga Amana,

o le kwa tlhoreng ga Senire

le Heremone,

o le kwa dikutleng tsa ditau,

o le mo dithabeng tsa dinkwe.

₉O tsubutse pelo ya me,

kgaitsadiaka, mogatsaka;

o tsubutse pelo ya me

ka leitlho le le lengwe fela la gago,

ka mpolokwane o le mongwe fela

wa thamo ya gago.

₁₀Lorato lwa gago lo lontle jang,

kgaitsadiaka, mogatsaka!

Lorato lwa gago lo molemo jang

bogolo go bojalwa jwa mofine!

Le lonko lwa ditlolo tsa gago

bogolo go dinkgisa monate

tsotlhe fela!

₁₁Dipounama tsa gago,

mogatsaka,

di rotha jaaka lomepe lwa dinotshe,

dinotshe le maši

di fa tlase ga loleme lwa gago;

lonko lwa diaparo tsa gago

lo ntse jaaka lonko lwa Lebanone.

₁₂Kgaitsadiake, mogatsake

ke tshimo e e tswaletsweng,

ke sediba se se tswaletsweng,

ke motswedi o o kanetsweng.

₁₃Matlhogela a gago

ke tshimo ya digaranate,

e e nang le maungo a a tlhokegang;

motlhatswameno le ditlhatshana

tsa nareto;

₁₄nareto le saferone,

kalamuse le kinamone,

di na le ditlhare tsotlhe tsa lebano;

mera le aloe, di na le dinkgisa

monate tsotlhe tse di itsegeng.

₁₅O motswedi wa masimo,

sediba se se metsi a a tshedileng,

le dinokana tse di elelang

di tswa Lebanone.

₁₆Tsoga, wena phefo ya botsheka;

o tle, wena borwa;

fokela tshimo ya me, gore

dinkgisa monate tsa yone di aname.

A moratwa wa me a tle

mo tshimong ya gagwe,

mme a je maungo a gagwe

a a tlhokegang.