1Ke sethunya sa tshuse ya Sharone, ke sethunya sa boka sa mekgatšha.
Sa Monna
2Jaaka sethunya sa boka se ntse
mo makaikaing,
moratwa wa me
o ntse jalo mo barweetsaneng.
Sa Mosadi
3Jaaka setlhare sa moapole se ntse
mo ditlhareng tsa sekgwa,
moratwa wa me
o ntse jalo mo baneng
ba basimane.
Ka dula mo moriting wa gagwe
ka boitumelo jo bogolo,
mme loungo lwa gagwe lwa utlwala
monate mo ganong la me.
4O ne a nkisa mo ntlong ya meletlo,
mme sekhukhu sa gagwe godimo
ga me e ne e le lorato.
5Nkilola ka ditshwabi tsa mofine,
nthudisa ka boapole;
gonne ke lwadiswa ke lorato.
6Letsogo la gagwe la molema
le ntshameditse,
letsogo la gagwe le legolo
le a ntlamparela.
7Lona bomorwadia Jerusalema,
ke a lo ikanisa ka ditshephe,
le ka dikwalata tsa naga, ka re:
Lo se ka lwa tlhotlheletsa,
le fa e le go tsosa lorato, go tle
go tsamaye go kgatlhege
lona pele.
SEFELA SA BOBEDI
Sa Mosadi
8A lentswe la moratwa wa me!
Bonang, o e tla,
a tlola mo dithabeng,
a kalapa mo dithabaneng.
9Moratwa wa me
o ntse jaaka tshephe
kgotsa kukamana;
bonang, o eme ka fa morago
ga lorako lwa rona,
o okomela teng ka difenseter,
o iponatsa ka diphatlhana
tsa ditswalo.
10Moratwa wa me o ne a bua,
a nthaya a re:
Sa Monna
“Tsoga moratwa wa me,
montlenyana wa me,
mme o tle re tsamae.
11Gonne bona, mariga a fetile,
pula e khutlile, e ile;
12dithunya di bonala mo lefatsheng;
motlha wa melodi ya dinonyane
o fitlhile, le kodu ya lephoi
e utlwala mo fatsheng la rona.
13Mofeige o budusa dikungwa tsa one
tse ditala,
le mafine a thuntse,
u utlwatsa lonko lwa one.
Nanoga moratwa wa me,
montlenyana wa me,
o tle re tsamaye.
14Ao, Letseba la me,
o mo dipharong tsa mafika,
o mo moriting wa felo fa go
mokodumetsa;
a ke bone sefatlhogo sa gago,
a ke utlwe lentswe la gago;
gonne lentswe la gago le monate,
le sefatlhogo sa gago se sentle.
15Re tshwareleng diphokoje,
e bong diphokojane tse di senyang
masimo a mafine;
gonne masimo a rona a mafine a
thuntse.”
Sa Mosadi
16Moratwa wa me ke wa me,
le nna ke wa gagwe;
o hudisa letsomane la gagwe
mo dithunyeng tsa masoma.
17Go tsamaya letsatsi le fefa,
le meriti e tloga,
o boe, moratwa wa me,
mme o nne jaaka tshephe,
kgotsa kukamana mo dithabeng
tsa Bethere.
