BAROMA 5

₁Ke gone, e re ka re siamisitswe ka tumelo, a re nneng le kagiso mo Modimong ka Morena wa rona Jesu Keresete; ₂yo re bileng re bonye ka ene go tsena ka tumelo mo tshegofatsong e re emeng mo go yone; a re itumeleng mo tsholofelong ya kgalalelo ya Modimo. ₃E seng gone gosi, mme a re itumeleng le mo dipitlaganong tsa rona; ka re itse fa pitlagano e tle e tsose pelotelele; ₄mme pelotelele e tsose boiteko; mme boiteko bo tsose tsholofelo; ₅mme tsholofelo ga e tlhabise ditlhong; gonne lorato lwa Modimo lo thelegetse mo pelong tsa rona ka Mowa o o Boitshepo o re o neilweng.

₆Gonne e rile re sa ntse re le bokoa, Keresete a swela baikepi mo lobakeng lo e leng lone. ₇Gonne go a belaesega gore a jaana motho mongwe o ka swela mosiami; mme motlha ope, fa e le motho yo o molemo, mongwe o ka ipatelela go mo swela. ₈Modimo one, o re tlhomamiseditse lorato lwa one, ka e rile re sa ntse re le baleofi, Keresete a re swela. ₉Fa e le foo, bogolo thata re tlaa gololwa mo bogaleng jwa Modimo ka ene, ka jaana re siamisitswe ka madi a gagwe. ₁₀Gonne fa e rile re sa ntse re le baba ra letlanngwa le Modimo ka loso lwa Morwa wa one, bogolo thata re tlaa bolokwa ka botshelo jwa gagwe, ka re setse re letlantswe; ₁₁ga se gone gotlhe; le gone re itumela mo Modimong ka Morena wa rona Jesu Keresete, yo gompieno re setseng re bonye tetlanyo ka ene.

₁₂Ke gone, jaaka boleo bo tsenye mo lefatsheng ka motho a le mongwe fela, le loso ka boleo; mme jalo loso lwa fetela mo bathong botlhe, ka botlhe ba leofile; ₁₃gonne boleo bo ne bo le gone mo lefatsheng, lwa ba lwa fitlhelwa ke molao; mme boleo ga bo balelwe motho fa molao o seyo. ₁₄Le fa go ntse jalo, loso lo ne lwa laola go tswa mo lobakeng lwa ga Atame, lwa tla go fitlha mo go lwa ga Moše, lwa laola mo go ba ba se kang ba leofa ka fa mokgweng wa tlolo ya ga Atame, yo e neng e le ene setshwantsho sa yo o tlaa tlogang a tla, ₁₅mme jaaka tlolo e ne e ntse, ga se go re neo ya mpho fela le yone e ntse jalo. Gonne fa ba ba leng bantsi ba sule ka tlolo ya yo mongwe fela, bogolo thata bopelonomi jwa lorato lwa Modimo bo totetse ba ba leng bantsi, le neo e e tlang ka tshegofatso ya yo mongwe fela, e bong Jesu Keresete. ₁₆Jaana go dirafetse ka mongwe yo o leofileng, ga se go re neo le yone e ntse jalo; gonne katlholo e e isang tshekisong e dule mo tlolong e le nngwe fela, mme neo ya mpho e e isang mo tshiamisong, e dirafaletse ditlolo di le dintsi. ₁₇Gonne e ka re fa loso lo laotse ka yo mongwe fela, ka ntlha ya tlolo ya yo mongwe fela yoo; bogolo thata ba ba amogelang letlotlo la tshegofatso le la neo ya tshiamo, ba tlaa busa mo botshelong ka yo mongwe fela, e bong Jesu Keresete.

₁₈Jalo fela, jaaka katlholo e tlisitse tshekiso mo bathong botlhe ka tlolo e le nngwe fela; go ntse fela jalo, neo ya mpho e tlisitse tshiamiso ya botshelo mo bathong botlhe, ka tiro e le nngwe fela ya tshiamo. ₁₉Gonne jaaka ba ba leng bantsi ba dirilwe baleofi ka go tlhoka go utlwa ga motho yo mongwe fela, go ntse jalo ba ba leng bantsi ba tlaa dirwa tshiamo ka go utlwa ga motho yo mongwe fela.

₂₀Le gone gape molao o tsenye gore tlolo e tote; mme kwa tlolo e totileng teng, tshegofatso ya tota bogolo thatathata teng; ₂₁e le gore, jaaka boleo bo busitse mo losong, le yone tshegofatso e tle e buse ka tshiamo go isa botshelong jo bo sa khutleng, ka Jesu Keresete Morena wa rona.