BAROMA 2

₁Ke gone ka re, ga o na seipato motho ke wena, le fa o le mang yo o sekisang; gonne mo o sekisang yo mongwe ka gone, o a bo o itshekisa ka gone gonne wena yo o sekisang, o a bo o ntse o dira tsone dilo tseo fela. ₂Re a itse fa tshekiso ya Modimo mo go ba ba dirang dilo tse di ntseng jalo e le ka fa boammaaruring. ₃Motho ke wena yo o sekisang ba ba dirang dilo tse di ntseng jalo, tse le wena o di dirang, a o itlhoma gore o tlaa falola mo tshekisong ya Modimo? ₄Kgotsa a o nyatsa letlotlo la molemo, le la boiphapaanyo, le la bopelotelele jwa one, o sa itse fa molemo wa Modimo o go gogela kwa boikwatlhaong? ₅O re o le logwadi, o le pelo e e sa ikwatlhayeng, o ipeela bogale mo letsatsing la bogale le la tshenolo ya tshekiso e e siameng ya Modimo, ₆o o tlaa nayang mongwe le mongwe ka fa ditirong tsa gagwe: ₇Ke gore, ba ba batlang kgalalelo, le tlotlo, le bosaboleng, ba le pelotelele mo go direng molemo, o ba neye botshelo jo bo sa khutleng. ₈Mo go ba ba ratang kgang, ba sa ineele mo boammaaruring, mme ba ineela mo tshiamololong, go tlaa nna bogale, ₉le tšhakgalo, le pitlagano, le tlalelo e e mahehe, e bong mo mothong mongwe le mongwe yo o dirang bosula; mo Mojuteng pele, le gone mo Mogerikeng. ₁₀A go nne kgalalelo le tlotlo mo mothong mongwe le mongwe yo o dirang molemo; mo Mojuteng pele, le gone mo Mogerikeng; ₁₁gonne mo Modimong ga go na go tlhokomela bomangmang jwa batho.

₁₂Gonne botlhe ba ba leofileng ba se na molao, le gone ba tlaa swa ba se na molao; mme botlhe ba ba leofileng ba le fa tlase ga molao, ba tlaa atlholwa ka molao. ₁₃Gonne bautlwi ba molao e be e se bone ba ba siameng fa pele ga Modimo, mme ba ba dirang molao ba tlaa siamisiwa. ₁₄Gonne e re fa Baditšhaba ba ba se nang molao ba dira dilo tsa molao ka temalo ya tlholego, bone bao, e re ka ba se na molao, go bo go le molao bone ka bosi; ₁₅ka ba supa tiro ya molao o o kwadilweng mo dipelong tsa bone; segakolodi sa bone le sone se supa nao, le megopolo ya bone, mo teng ga bone e ba neye molato, kgotsa e ba golole; ₁₆e bong mo tsatsing le Modimo o tlaa atlholang masaitsiweng a batho ka lone, ka Jesu Keresete, ka fa thutong ya me.

₁₇Fa o reilwe leina la Mojuta, mme o ikaega molao, mme o belafala ka Modimo, ₁₈o itse go rata ga one, mme o leboga dilo tse di molemo, ka o rutilwe mo molaong; ₁₉o itlhomamisa fa le wena o le mogogi wa difofu, fa o le lesedi la ba ba mo lefifing, ₂₀le mokaedi wa dieleele, le moruti wa banyana, yo o reng ka o na le molao, o bo o na le setshwano sa kitso le sa boammaaruri; ₂₁ka re, wena yo o rutang yo mongwe, a o bile ga o ithute? Wena yo o rerang gore motho a se ka a utswa, a o bile o a utswa? ₂₂Wena yo o reng motho a se ka a dira boaka, a o bile o dira boaka? Wena yo o ferosiwang sebete ke medimo ya disetwa a o bile o thopa ditempele? ₂₃Wena yo o belafalang ka molao, a o bile o tlotlolola Modimo ka go tlola molao ga gago? ₂₄“Gonne leina la Modimo le tlhapadiwa ke Baditšhaba ka ntlha ya lona,” fela jaaka go kwadilwe.

₂₅Gonne le gale go rupa go na le thuso, fa o le modiri wa molao; mme fa o le motlodi wa molao, go rupa ga gago go fetogile bokgola. ₂₆Ke gone, fa yo o sa rupang a tshegetsa ditiro tsa molao, a bokgola jwa gagwe ga bo ketla bo kaiwa go rupa? ₂₇Bokgola jo bo leng jwa tlholego, fa bo dirafatsa molao, a ga bo ketla bo go sekisa, wena yo o reng le fa o na le lokwalo o bile o rupile, o bo o ntse o le motlodi wa molao fela? ₂₈Gonne yo o leng Mojuta ka bokafantle fela, e be e se ene; le go rupa mo go leng ka fa ntle, e bong mo nameng fela, e be e se gone. ₂₉Mojuta tota ke yo e leng ene mo teng; le go rupa ke ga pelo, mo go emeng mo moweng, e seng mo ditlhakeng tsa lokwalo; yo ke ene paki ya gagwe e sa tsweng mo bathong, mme e tswa mo Modimong.