TSHENOLO 22

₁A mpontsha noka ya metsi a botshelo, e galalela jaaka legakwa, e tswa mo setulong sa bogosi sa Modimo le sa ga Kwana, ₂e le mo gare ga mmila wa motse. Moseja ono ga noka, le moseja ole, ga bo go le setlhare sa botshelo, se se ungwang maungo a mehuta e le 12, se ungwa ka kgwedi nngwe le nngwe; makakaba a setlhare e ne e le a a fodisang merafe. ₃Ga go ketla go tlhola go nna phutso gope; setulo sa bogosi sa Modimo le sa Kwana se tlaa nna mo go one; le batlhanka ba one ba tlaa o direla. ₄Ba tlaa bona sefatlhogo sa one; le leina la one le tlaa nna mo diphatleng tsa bone. ₅Ga go ketla go tlhola go nna bosigo gope; ga ba batle lesedi la lampa, le fa e le lesedi la letsatsi; gonne Morena Modimo o tlaa ba naya lesedi; mme ba tlaa busa ka bosakhutleng le ka bosaengkae.

₆Mme a nthaya a re: “Mafoko a, a boikanngo le boammaaruri; Morena, Modimo wa mewa ya baperofeti, o romile moengele wa gagwe, a tla go bontsha batlhanka ba gagwe dilo tse di tlaa akofang di dirafala.”

₇“Bonang, ke tloga ke tla ka bonako. Go sego yo o bolokang mafoko a polelo ya lokwalo lo.”

₈Nna Johane, ke nna ke utlwileng, ka bona dilo tse. Mme e rile ke utlwa ke bona, ka wela fa fatshe ka re ke obamela fa dinaong tsa moengele yo o mpontshitseng dilo tse. ₉Mme a nthaya a re: “O se ka wa ba wa dira jalo; ke motlhanka ka wena, le ka baperofeti ba gaeno, le ka ba ba bolokileng mafoko a lokwalo lo; obamela Modimo.” ₁₀A nthaya a re: “O se ka wa kanela mafoko a polelo ya lokwalo lo, gonne lobaka lo setse lo le gaufi. ₁₁Yo o leng tshiamololo, a a nne a dire tshiamololo; yo o leng leswe, a a nne a leswefadiwe; yo o leng tshiamo, a a nne a dire tshiamo, le yo o leng boitshepo a a nne a dirwe boitshepo fela jalo.”

₁₂“Bonang, ke tloga ke tlaa ka bonako; tuelo ya me ke na nayo, gore ke duele motho mongwe le mongwe ka fa tiro ya gagwe e ntseng ka teng. ₁₃Ke nna Alefa le Omega, wa ntlha le wa bofelo, tshimologo le bokhutlo.

₁₄“Go sego ba ba tlhatswang dikobo tsa bone, gore ba nne le tshiamelo ya go tla mo setlhareng sa botshelo, le go tsena ka dikgoro mo motseng. ₁₅Kwa ntle go dintša, le baloi, le bagokafadi, le babolai, le badiredi ba medimo ya disetwa, le mongwe le mongwe yo o ratang a ba a dira maaka.

₁₆“Nna Jesu ke romile moengele wa me, go tla go lo tlhomamisetsa dilo tse gore e nne tsa diphuthego. Ke nna modi wa ga Dafite, le lotsalo lwa gagwe, naledi e e phatsimang ya moso.”

₁₇Mowa le monyadwi ba re: “Tlaa!” Le yo o utlwang, a a ka a re: “Tlaa!” Le yo o nyorilweng a a tle; yo o ratang a a tseye metsi a botshelo, a a tseye fela a se na theko.

₁₈Ke tlhomamisetsa motho mongwe le mongwe yo o utlwang mafoko a polelelopele ya lokwalo lo, ka re: Fa motho mongwe a ka a oketsa, Modimo o tlaa mo okeletsa ka dipetso tse di kwadilweng mo lokwalong lo. ₁₉Mme fa motho mongwe a ka fokotsa mafoko a lokwalo lo lwa polelelopele, Modimo o tlaa tlosa kabelo ya gagwe mo setlhareng sa botshelo, le mo motseng o o boitshepo, e bong mo dilong tse di kwadilweng mo lokwalong lo.

₂₀Yo o tlhomamisang dilo tse a re: “Ee, ke tloga ke tla ka bonako.”

A go nne jalo: Tlaa, Morena Jesu.

₂₁Tshegofatso ya Morena Jesu a e nne le baitshepi. Amen.