Pesalema 78

₁Lona batho ba me,

beelang molao wa me tsebe;

sekegelang mafoko a molomo wa me

tsebe.

₂Ke tlaa tswa molomo

ka setshwantsho;

ke tlaa wela dipolelo

tse di lotobo tsa bogologolo,

₃tse re di utlwileng, ra di itse,

tse borraetsho ba di re boleletseng.

₄Ga re ketla re di lobela bana

ba bone,

ka re tlaa bolelela losika lo lo tlang

dipako tsa ga Jehofa,

le thata ya gagwe,

le ditiro tsa gagwe tse di

gakgamatsang tse o di dirileng.

₅Gonne o ne a tlhoma tshupo

mo go Jakobe,

a baya molao mo go Iseraele,

o o o laoletseng borraetsho

gore ba tle ba itsise bana ba bone

dilo tse;

₆gore losika lo lo tlang lo di itse,

e bong bana ba ba tlaa tsalwang;

ba ba tlaa tlogang

ba ba ba di bolelela bana ba bone;

₇gore ba tlhome

tsholofelo ya bone mo Modimong,

ba se ka ba lebala

ditiro tsa Modimo,

mme ba boloke ditaolo tsa one;

₈gore ba se nne jaaka borraabo,

ba e neng e le losika lo lo

tlhogo e thata, le lwa borukhutlhi;

e le losika lo lo sa tlhomang

pelo ya lone ka tshiamo,

lo mowa wa lone

o sa emang sentle le Modimo.

₉Bana ba ga Eferaime,

e rile ba tlhometse dibolao

ba bile ba sikere mara,

ba menoga ba tshaba

mo letsatsing la tlhabano.

₁₀Ga ba a ka ba boloka

kgolagano ya Modimo,

ba gana go tsamaya

mo molaong wa one;

₁₁ba lebala ditiro tsa one,

le ditiro tse di gakgamatsang

tse o neng o di ba bontshitse.

₁₂Ke dilo tse di tseanyang,

tse o di dirileng

mo ponong ya borraabone,

mo lefatsheng la Egepeto,

le mo nageng ya Soane.

₁₃O ne wa fatoganya lewatle,

wa ba kgabagantsha;

wa emisa metsi

a nna jaaka mokoa fela.

₁₄Le gone motshegare

wa nna wa ba goga ka leru,

le bosigo jotlhe ka lesedi la molelo.

₁₅Wa fatola mafika mo nageng fela,

wa ba nosa thata

jaaka mo madibeng a a boteng.

₁₆O ne wa phunya metlhodi le yone

mo lefikeng,

wa eledisa metsi jaaka dinoka.

₁₇Le fa go ntse jalo

ba tswelela pele fela go o leofela,

go tsuololela Mogodimodimo

mo loboeng lwa naga.

₁₈Ba leka Modimo

mo pelong tsa bone,

ka go lopela keletso ya bone dijo.

₁₉Ee, ba ne ba nyatsa Modimo,

ba re:

“A Modimo o ka baakanya lomati

lwa bojelo mo nageng?”

₂₀Ba re:

“Bona, o ne wa itaya lefika,

metsi a ba a phothometsega

le meelelo ya penologa;

a bogobe le jone a o ka bo ntsha?

A o tlaa etleeletsa batho ba one

nama?”

₂₁Ke gone ka foo Jehofa a utlwa,

mme a nna bogale thata;

molelo wa tshubelwa Jakobe,

bogale le jone jwa tsogela Iseraele;

₂₂ka gobo

ba se ka ba dumela Modimo,

le fa e le go ikanya poloka ya one.

₂₃Le fa go ntse jalo

wa laola maru kwa godimo,

wa bula dithoba tsa legodimo;

₂₄mme wa ba nesetsa mana go a ja,

wa ba naya mabele a legodimo.

₂₅Motho a ja bogobe jwa bathata;

wa ba gorosetsa dijo tsa go kgorwa.

₂₆Wa fokisa phefo ya botlhabatsatsi

mo loaping;

wa tsamaisa phefo ya borwa

ka thata ya one.

₂₇Nama le yone

wa e ba nesetsa jaaka lorole,

le dinonyane tse di diphuka

jaaka mošawa wa lewatle.

₂₈Wa e usetsa fa gare ga bothibelelo

jwa bone,

mo tikologong ya manno a bone.

₂₉Jalo ba ja, mme ba kgora thata;

wa ba naya se ba se eleditseng.

₃₀E rile ba ise ba tenwe

ke keletso ya bone,

nama e sa ntse e le mo maganong

a bone,

₃₁bogale jwa Modimo

jwa ba tsogela,

jwa bolaya ba ba nonneng bogolo

mo go bone,

ja ba jwa thubanyetsa makau

a Iseraele fa fatshe.

₃₂Le fa go dirile jaana,

ba fela ba leofela pele fela,

ba sa dumele ditiro tse di

gakgamatsang tsa one.

₃₃Ka ntlha ya moo wa sweletsa

malatsi a bone ka lefela,

le dinyaga tsa bone ka therego.

₃₄Ya re fa o ba bolaya,

ya dira gone ba botsang ka ga one;

mme ba bowe ba batle Modimo

go sa le gale.

₃₅Ba gakologelwe

fa Modimo e le lefika la bone;

le go re Modimo wa Mogodimodimo

ke Morekolodi wa bone.

₃₆Ba o tsoatsoa ka molomo wa bone,

ba o akela ka loleme lwa bone.

₃₇Gonne pelo ya bone

e ne e sa siamela one;

le gone ba ne ba sa ikanyega mo

kgolaganong ya one.

₃₈Mme one, ka o tletse pelotlhomogi,

wa itshwarela boikepo jwa bone,

wa se ka wa ba senya;

ee, wa faposa bogale jwa one gantsi,

mme wa se ka wa tsosa tšhakgalo

yotlhe ya one.

₃₉Wa ba gakologelwa

fa ba le nama fela;

ba le phefo e e fetang,

mme e se ke e be e boye.

₄₀Ba ne ba o tsuololela gantsintsi jang

mo nageng! Ba o hutsafatsa

mo difoleng tsa naga!

₄₁Ba ba ba menoga gape,

ba leka Modimo,

ba rumola Moitshepi wa Iseraele.

₄₂Ga ba a ka ba gakologelwa seatla sa

one, le fa e le letsatsi

le o ba golotseng mo moganetsing

ka lone.

₄₃Ka fa o tlhomileng ditshupo

tsa one mo Egepeto ka gone,

le dikgakgamatso

mo nageng ya Soane;

₄₄wa fetola dinoka tsa bone madi,

le dinokana tsa bone,

ba ba ba retelelwa ke go nwa.

₄₅Wa ba tsosetsa metshitshi ya

dintshi, tsa ba ja;

le digwagwa tsa ba senya.

₄₆Le loato lwa dilo tsa bone

wa lo neela diboko;

le tsa letsapa la bone

wa di neela tsie.

₄₇Wa senya mafine a bone ka sefako,

le ditlhare tsa bone

tsa masekamore ka kgogotshwane.

₄₈Dikgomo tsa bone le tsone

wa di neela sefako,

le matsomane a bone wa a neela

tladi ya tlapana e e molelo.

₄₉Wa ba piriganyetsa

go tuka ga bogale jwa one,

tšhakgalo, le kgalefo le tlalelo,

e le lesomo la barongwa ba bosula.

₅₀Wa phunyetsa bogale jwa one tsela;

wa se ka wa rekegela mowa wa bone

mo losong,

wa neela kgogodi botshelo jwa bone;

₅₁wa gaila bana ba batsalwapele

botlhe ba Egepeto,

tshimologo ya thata ya bone

mo megopeng ya ga Hame;

₅₂mme batho ba e leng ba one,

bone wa ba gogela ntle

jaaka dinku,

wa ba wa ba tsamaisa

mo nageng jaaka letsomane fela.

₅₃Wa ba goga ka polokego,

go tla ba se ka ba boifa;

baba ba bone,

lewatle la ba ribegetsa.

₅₄Wa ba fitlhisa mo molelwaneng

wa felo ga one ga boitshepo,

mo thabeng eno, e seatla sa one se

segolo se e rekileng.

₅₅Merafe le yone wa e leleka

fa pele ga bone,

wa e aba ka thapo go nna boswa,

mme wa tsenya ditso tsa Iseraele,

tsa nna mo megopeng ya yone.

₅₆Le fa go ntse jalo Modimo

Mogodimodimo ba o leka,

ba o tsuololela fela, mme

ba se ka ba boloka ditao tsa one;

₅₇mme ba boela kwa morago,

ba dira ka mooko jaaka borraabo;

ba fapoga

jaaka bora jo bo kgopameng.

₅₈Gonne ba ne ba o tlhotlheletsa

bogaleng

ka mafelo a bone a a tlotlometseng,

ba o tsenya lefufa ka ditshwantsho

tse di setilweng tsa bone.

₅₉E rile Modimo o utlwa

wa nna bogale thata,

wa fedisiwa pelo fela ke Iseraele;

₆₀wa ba wa tla wa tlogela

motlaagana wa Shilo,

mogope o o o tlhomileng

mo bathong;

₆₁thata ya one

wa e tsenya mo botshwarweng,

le kgalalelo ya one wa e tsenya

mo seatleng sa moganetsi.

₆₂Batho ba one wa ba neela tšhaka;

le gone wa nna bogale thata

le boswa jwa one.

₆₃Molelo wa laila makau a bone;

barweetsana ba bone le bone

ba se ka ba dirana le pina ya nyalo.

₆₄Baperesiti ba bone ba wa ka tšhaka,

mme batlholagadi ba bone

ba se ka ba dira selelo sepe.

₆₅Foo Morena a tsoga jaaka

mongwe yo o tswang borokong,

jaaka monna yo o thata

fa a goisiwa ke bojalwa jwa mofine.

₆₆A phailela baganetsi ba gagwe

kwa morago;

a ba dira sekgobo sa metlha yotlhe.

₆₇Gape a gana mogope wa ga Josefe,

a se ka a itshenkela

lotso lwa ga Eferaime;

₆₈a itshenkela lotso lwa ga Juta,

e bong thaba ya Sione e o e ratang.

₆₉A aga felo ga gagwe ga boitshepo

jaaka ditlhora tsa dithaba fela;

jaaka lone lefatshe le o le

emiseditseng ruri ka bosakhutleng.

₇₀Le gone a itshenkela

Dafite motlhanka wa gagwe;

a mo tsaya

a le mo marakaneng a dinku;

₇₁a mo tlosa mo go saleng

dinku tse di amusang morago;

a tla go otla Jakobe,

batho ba gagwe,

le Iseraele boswa jwa gagwe.

₇₂Jalo a ba otla

ka fa thokgamong ya pelo ya gagwe,

a ba tsamaisa ka botswerere

jwa diatla tsa gagwe.