Pesalema 77

₁Ke tlaa goela kwa Modimong

ka lentswe la me;

e bong Modimo,

ka lentswe la me,

mme o tlaa ntshekegela tsebe.

₂E rile mo letsatsing la tlalelo ya me

ka batla Morena;

seatla sa me se ne se otlologile

mo bosigong,

mme se se ka sa gonega;

mowa wa me wa gana go gomotsega.

₃Ke gakologelwa Modimo,

mme ke tlhobaele; ke itoke,

mme mowa wa me o ribegediwe.

Sela.

₄O tshwarisitse matlho a me

go lebela fela;

ke tlaletswe thata,

ke bile ke retelelwa ke go bua.

₅Ke akantse dipaka tsa bogologolo,

dinyaga tsa metlha ya bogologolo

tala.

₆Ke ikgakolola sefela sa me

mo bosigong;

ke buabue le pelo ya me mme

mowa wa me o putle thata.

₇“A Morena o tlaa latlhela ruri?

A ga a ketla a tlhola a rapelesega

gope?

₈A boutlwelobotlhoko jwa gagwe

bo etse ruri ka bosakhutleng?

A ke go re

polelo ya tsholofetso ya gagwe

e tlhaelela ruri ka bosaengkae?

₉A Modimo o lebetse go nna pelonomi?

A o tswaletse mautlwelobotlhoko

a one

a manamagadi ka bogale?” Sela.

₁₀Mme ke rile:

“Mo ke seemere sa me;

ke tlaa gakologelwa

dinyaga tsa seatla se segolo

sa Mogodimodimo.”

₁₁Ke tlaa nna ke umaka

ditiro tsa ga Jehofa;

gonne ke tlaa gakologelwa

dikgakgamatso tsa bogologolo.

₁₂Le gone ke tlaa akanya

tiro ya gago yotlhe,

ke kanka ka ga tse o di dirang.

₁₃Tsela ya gago Modimo,

e mo felong ga boitshepo,

e mang yo e leng Modimo o mogolo

jaaka wena Modimo?

₁₄Wena o Modimo

o o dirang dikgakgamatso;

o itsisitse ditšhaba thata ya gago.

₁₅O golotse batho ba gago

ka letsogo la gago;

bomorwa Jakobe le Josefe. Sela.

₁₆Metsi a ne a go bona, Modimo;

metsi a ne a go bona, a boifa;

matengteng le one a roroma.

₁₇Maru a na a tsholola metsi;

magodimo a ntsha tumo;

metswi ya gago le yone

ya gasama.

₁₈Kodu ya tumo ya gago ya maru

ya nna mo setsuatsueng;

dikgadima tsa bonesa lefatshe;

lefatshe la roroma la reketla.

₁₉Tsela ya gago

e ne e le mo lewatleng,

le ditselana tsa gago

mo metsing a magolo;

metlhala ya gago e ne e sa itsiwe.

₂₀O ne wa goga batho ba gago

jaaka letsomane,

ka seatla sa ga Moše le Arone.