Pesalema 75

₁Re go ntshetsa malebogo

Modimo; re a leboga,

gonne leina la gago le le gaufi;

batho ba bolela ditiro tsa gago

tse di gakgamatsang.

₂Ke tlaa re ke bona

lobaka lo lo tlhomilweng,

ke atlhole ka thokgamo.

₃Lefatshe le tlhapologile

le banni botlhe ba lone;

ke emisitse maotwana a lone. Sela.

₄Ke reile baikokomatsi ka re:

“Se direng ka boikokomatso;”

le baikepi ka re:

“Se tsholetseng lonaka.

₅Se tsholeletseng lonaka lwa lona

kwa godimo;

se bueng ka thamo

e e tlhamaletseng.”

₆Gonne go tsholetsega

ga go tswe kwa botlhabatsatsi

le fa e le kwa bophirimatsatsi,

le fa e le kwa borwa.

₇Moatlhodi ke Modimo;

o isa mongwe tlase,

mme o tsholetse yo mongwe.

₈Gonne mo seatleng sa ga Jehofa

go na le phafana, mme

bojalwa jwa mofine bo a huhula;

e tletse mo go tlhakantsweng;

mme o tshela ga yone eo;

ruri magorogoro a yone

baikepi botlhe ba lefatshe

ba tlaa a gopisa ba a nwa.

₉Mme nna ke tlaa nna ke bolela

ka bosakhutleng;

ke tlaa nna ke opelela

Modimo wa ga Jakobe dipako.

₁₀Dinaka tsotlhe tsa baikepi le tsone

ke tlaa di kgaola;

mme dinaka tsa basiami

di tlaa tsholediwa.