Pesalema 68

₁A Modimo o nanoge;

a baba ba one ba faladiwe;

le ba ba o ilang

ba tshabe fa pele ga one.

₂Jaaka mosi o tle o figitlhediwe,

ba figitlhetse jalo;

jaaka makgaga a tle a tlhapologe

fa pele ga molelo,

a baikepi ba nyelele jalo

ka sebonalo sa Modimo.

₃Mme a basiami ba itumele;

ba kgane ka boitumelo

fa pele ga Modimo;

ee, a ba itumele ka boipelo.

₄Opelelang Modimo,

opelelang leina la one dipako;

o o ralalang dipoa tsa naga

o pagame,

lo o direle tsela ya mheru;

leina la one ke JAH;

lo bo lo kgane ka boitumelo

fa pele ga one.

₅Modimo ke rramasiela,

le moatlholedi wa basadi ba

batlholagadi mo boagong jwa one

jo bo boitshepo.

₆Ba ba lore,

Modimo o tle o ba dire motse;

bagolegwi o ba ntshetse go

kokotlegela; mme batsuolodi bone,

ba agile mo lefatsheng la lokgere.

₇Modimo, e rile o bolola

fa pele ga batho ba gago,

e rile o ralala naga ka kgagamalo,

Sela;

₈lefatshe la roroma,

magodimo le one a rotha

ka sebonalo sa Modimo;

le e leng Sinai yole, a roroma

ka sebonalo sa Modimo,

Modimo wa Iseraele.

₉Wena, Modimo,

wa nesa pula e kgolo,

wa rakalatsa ba boswa jwa gago

jale ka ba ne ba ngodiegile.

₁₀Phuthego ya gago ya aga gone;

wena Modimo, wa etleeletsa

bahumanegi ka se se tswang

mo molemong wa gago.

₁₁“Jehofa o tle a ntshe lefoko,

basadi ba ba itsiseng batho mafoko

ba nne bontsi jo bogolo.

₁₂Dikgosi tsa dintwa di tshabe;

di tshabe, mme mosadi yo o salang

mo gae a abe thopo.

₁₃Le fa lo lala mo marakaneng

a dinku, go bo go ntse

jaaka diphuka tsa lephoi

tse di apesitsweng selefera,

le dintlha tsa tsone ka gouta

e tshetlha.

₁₄E rile Mothatayotlhe a gasanya

dikgosi gone,

ga nna jaaka fa kapoko e na

mo Salemone.

₁₅A thaba ya Modimo,

thaba ya Bašane!

A thaba e e godileng

thaba ya Bašane!

₁₆Lona dithaba tse di godileng,

lo dilolelang thaba e Modimo

o e eleditseng

gore e nne boago jwa one?

Ee, Jehofa o tlaa aga mo go yone

ka bosakhutleng.

₁₇Dikara tsa Modimo

di le dikete di le masome mabedi,

e bong dikete

tse di tlhatlaganyeng le dikete;

Morena o mo go tsone, jaaka

mo Sinai, mo felong ga boitshepo.

₁₈O tlhatlogetse kwa godimo,

o gogile botshwaro jwa gago

bo tshwerwe;

o amogetse dineo mo bathong,

ee, le mo go bone ba e leng

batsuolodi, gore Jehofa Modimo

a tle a age nabo.

₁₉A go bakwe Morena

yo o rwalang merwalo ya rona

ka malatsi, e bong Modimo

o e leng poloka ya rona. Sela.

₂₀Mo go rona

Modimo ke Modimo wa dikgololo;

mme diphalodiso mo losong

ke tse e leng tsa Morena,

Modimo wa rona.

₂₁Modimo o tlaa arola

tlhogo ya baba ba one,

e bong segata se se moriri

sa yo o sa ntseng a tswelela

mo melatong ya gagwe.

₂₂Morena o rile;

Ke tlaa ba ke ba tlisa gape

go tswa kwa Bašane,

ke tlaa ba tlisa gape

go tswa matenyeng a lewatle;

₂₃gore o tle o ine lonao lwa gago

mo mading,

gore diteme tsa dintšha tsa gago

di bone seabe sa tsone

se se tswang babeng ba gago.”

₂₄Ba bonye ditsamao tsa gago

Modimo, e bong ditsamao

tsa Modimo wa me,

Kgosi ya me,

di tsena mo felong ga boitshepo.

₂₅Baopedi ba ne ba etelela pele,

ba ba letsang diletso

ba ba sala morago,

ba tsentswe gare ke barweetsana

ba ba letsang meropana.

₂₆Bakang Modimo mo diphuthegong,

e bong Morena, lona ba lo leng

ba motswedi wa Iseraele.

₂₇Yole ke Benjamine yo mmotlana,

mmusi wa bone,

dikgosana tsa Juta

di na le lekoko la tsone,

dikgosana tsa Sebulune,

dikgosana tsa Nafetali.

₂₈Modimo wa gago

o laotse thata ya gago;

Modimo, a ko o thatafatse sone

se o se re diretseng.

₂₉Ka ntlha ya tempele ya gago

e e kwa Jerusalema, dikgosi di tlaa

tlisa dineo kwa go wena.

₃₀Kgalemela sebatana sa lotlhaka,

bontsi jwa dipoo,

di na le dinamane tsa ditšhaba;

ba ne ba tle ba ineele

ka dipapetlana tsa diselefera;

o faladitse ditšhaba

tse di natefelwang ke ntwa.

₃₁Dikgosana di tlaa tswa kwa Egepeto;

lefatshe la Ethopia le tlaa akofa

le otlololela Modimo mabogo a lone.

₃₂Opelelang Modimo,

lona magosi a lefatshe;

a ko lo opeleleng Morena dipako,

Sela;

₃₃e bong ene yo o pagameng

magodimo a magodimo,

a a sa leng a leo bogologolo;

utlwang, o ntsha lentswe la one,

mme e be e le lentswe

le le thata thata.

₃₄A lo ko lo re:

Thata ke ya Modimo;

tlotlomalo ya one e okame Iseraele,

thata ya one e kwa magodimong.

₃₅Modimo o a boitshega o le mo

mafelong a gago a a boitshepo;

Modimo wa Iseraele one, o naya

batho ba one thata le nonofo.

A go bakwe Modimo.