Pesalema 66

₁Dudueletsa Modimo,

ka modumo wa boitumelo,

wena lefatshe lotlhe:

₂Opelela godimo

kgalalelo ya leina la one;

galaletsa pako ya one.

₃Raya Modimo o re:

“Ana ditiro tsa gago

di boitshega jang!

Baba ba gago ba tlaa ineela

mo go wena ka ntlha ya

bogolo jwa thata ya gago.

₄Lefatshe lotlhe le tlaa go obamela,

le tlaa go opelela;

ba tlaa opelela leina la gago.” Sela.

₅Tlang, lo bone ditiro tsa Modimo;

o a boitshega mo go direng ga one

mo baneng ba batho.

₆Lewatle o kile wa le fetola

lefatshe le le omeletseng;

ba ralala noka ka dinao;

gone foo, ra itumela mo go one.

₇O busa ka nonofo ya one

ka bosakhutleng;

matlho a one a tlhokometse merafe;

a batsuolodi ba se ikgodise. Sela.

₈A ko lo bakeng Modimo wa rona,

lona ditšhaba,

lo utlwatse lentswe la pako ya one;

₉o o tshegeleditseng mowa wa rona

mo botshelong, o bo o sa leseletse

dinao tsa rona go tshikinyega.

₁₀Gonne wena Modimo o re lekile;

o re lekile

jaaka selefera se tle se lekwe.

₁₁O ne wa re tlisa mo lotloeng;

wa baya mokgweleo o o botlhoko

mo dinokeng tsa rona.

₁₂Ba ba pagameng o ba re tlodisitse

godimo ga ditlhogo tsa rona;

ra ralala molelo le metsi;

wa re ntshetsa

kwa felong fa go letlotlo.

₁₃Ke tlaa tsena mo ntlong ya gago

ka ditshupelo tsa phiso,

ke tlaa go lefela maikano a me,

₁₄a dipounama tsa me di a boletseng,

le a molomo wa me o a buileng,

jale ka ke le mo pitlaganong.

₁₅Ke tlaa go isetsa ditshupelo tsa phiso,

tsa tse di nonneng,

di na le maswalo a diphelefu;

ke tlaa isa dikgomo

di na le dipodi tshupelo. Sela.

₁₆Ntlong lo utlweng,

lona lotlhe ba lo boifang Modimo,

mme ke tlaa kakanya

se o se diretseng mowa wa me.

₁₇Ke ne ka tlhaeletsa

kwa go one ka molomo wa me,

wa ba wa bakwa thata

ka loleme lwa me.

₁₈Fa nkabo ke ne ka tsaya boikepo tsia

mo pelong ya me,

Jehofa o ne a tlaa se ke a reetse.

₁₉Ruri Modimo o utlwile; o tsere

lentswe la morapelo wa me tsia.

₂₀A go bakwe Modimo

o o se kang wa faposa

morapelo wa me,

le fa e le boutlwelobotlhoko jwa one

go bo faposa mo go nna.