Pesalema 6

₁Jehofa, o se ka wa nkgalemela

ka bogale jwa gago,

le gone o se ka wa nkwatlhaya

ka bogale jwa gago jo bo tukang.

₂Nkutlwela botlhoko Jehofa;

gonne ke swabile fela;

Jehofa, o mphodise,

gonne marapo a me a remegile.

₃Mowa wa me le one

o tshwenyegile thata;

mme wena, Jehofa,

e tlaa nna goleele go le kaye?

₄Boela mo go nna Jehofa,

o golole mowa wa me:

o mpoloke ka ntlha ya

bopelonomi jwa gago jwa lorato.

₅Gonne mo losong

ga o na go gakologelwa;

mo Bobipong yo o tlaa go lebogang

e tlaa nna mang?

₆Ke lapile ka go duma ga me;

ka masigo otlhe

ke kolobetsa bolao jwa me;

ke kolobetsa phate ya me

ka dikeledi tsa me.

₇Leitlho la me le a fela

ka ntlha ya bohutsana;

le a onala

ka ntlha ya baganetsi botlhe ba me.

₈Ntlogelang lona lotlhe

badiri ba boikepo;

gonne Jehofa o utlwile

lentswe la go lela ga me.

₉Jehofa o utlwile mekokotlelo ya me;

Jehofa o tlaa amogela morapelo wa me.

₁₀Baba ba me botlhe

ba tlaa tlhajwa ke ditlhong

ba tshwenyega thata;

ba tlaa boela kwa morago,

ba tlaa tlhajwa ke ditlhong

ka tshoganetso fela.