Boeleele le boikepo jwa motho
Masekile wa ga Dafite. Pina ya moopedi yo mogolo; e laeletswe Mahalatha.
1Seeleele mo pelong ya sone se
rile: “Ga go na Modimo.”
Ba bodile,
ba dirile boikepo jo bo maswe thata;
ga go na ope yo o dirang molemo.
2Modimo o ne wa okomela bana ba
batho o le kwa legodimong,
gore o tle o bone bo go na le
bangwe ba ba tlhaloganyang,
ba senka Modimo.
3Botlhe fela ba boetse kwa morago;
ba atlafetse mmogo;
ga go na ope yo o dirang molemo,
nnyaa, le fa e le yo mongwe fela.
4Ba ba dirang boikepo
a ga ba na kitso?
Ba ba jang batho ba me
ba ba swetsa jaaka ekete
ba ja bogobe,
mme ba bo ba sa bitse Modimo.
5Golo foo ba nna mo poifong
e kgolo kwa poifo e ne e seyo gone;
gonne Modimo o faladitse marapo
a yo o thibelelang go tlhabana nao;
o ba tlhabisitse ditlhong,
gonne Modimo o ba ganne.
6Ao! A bo poloko ya Iseraele
e ka bo e tsile e tswa Sione!
E tlaa re motlhang Modimo
o bosang botshwaro jwa batho
ba one, foo Jakobe o tlaa itumela,
le Iseraele o tlaa ipela.
