Pesalema 43

₁A ko o nkatlhole Modimo,

o emele go seka ga me

mo morafeng o o sa reng Modimo

sepe;

a ko o nkgolole mo monneng wa

tsietso le yo o se nang tshiamo.

₂Gonne ke wena Modimo

wa thata ya me; o ntatlhetseng?

Ke ka ntlha yang ke tsamaya

ke hutsafetse ka patiko ya mmaba?

₃A ko o rome lesedi la gago

le boammaaruri jwa gago;

a di nkgoge;

di ntlise kwa thabaneng ya gago

e e boitshepo

le kwa metlaaganeng ya gago.

₄Ke gone ke tlaa yang

kwa sebesong sa Modimo,

kwa Modimong,

o o leng boitumelo jwa me

jo bo feteletseng;

le ka harepe ke tlaa go baka

Modimo, Modimo wa me.

₅O inametseng wena mowa wa me?

Mme o tlhodiegetseng

mo teng ga me?

Solofela fela mo Modimong;

gonne ke tlaa nama ke tla ke o baka,

one o e leng thuso ya sefatlhogo

sa me le Modimo wa me.