Pesalema 37

₁O se ka wa itshwenya

ka ga badirabosula;

le gone o se ka wa nna pelotshetlha

ka ga ba ba dirang tshiamololo.

₂Gonne ba tlaa akofa ba segwa

jaaka bojang, ba tlaa swaba

jaaka morogo o motala.

₃Ikanye Jehofa, o bo o dire molemo;

aga mo lefatsheng

o latelele boikanngo.

₄Le gone o inatefise mo go Jehofa;

mme o tlaa go naya dikeletso

tsa pelo ya gago.

₅Pitikela tsela ya gago mo go Jehofa;

o bo o mo ikanye

mme, o tlaa go dirafatsa.

₆O tlaa dira gore tshiamo ya gago

e tswe jaaka lesedi,

le katlholo ya gago

jaaka motshegare.

₇Itapolose mo go Jehofa,

o mo lebelele ka pelotelele;

o se ka wa itshwenya

ka ga yo o segofalang

mo tseleng ya gagwe;

ka ntlha ya monna

yo o dirafatsang maano a a bosula.

₈Bakela bogale, o lese kgakalo;

o se ka wa itshwenya,

ka go itshwenya

go tle go ise kwa bosuleng.

₉Gonne badirabosula

ba tlaa kgaolwa;

mme ba ba lebeletseng mo go Jehofa

ba tlaa rua lefatshe.

₁₀Gonne e tlaa re kwa pelenyana,

moikepi a bo a sa tlhole a le gone.

Ee, o tlaa sekaseka felo ga gagwe

ka tlhoafalo,

mme ene o tlaa ba a seyo.

₁₁Bapelonomi ba tlaa rua lefatshe;

ba tlaa inatefisa

mo letlotlong la kagiso.

₁₂Moikepi o logela mosiami maano,

mme o mo šenele meno.

₁₃Morena o tlaa mo tshega,

ka a bona fa letsatsi la gagwe

le atamela.

₁₄Baikepi ba somotse tšhaka,

ba bile ba obile bora jwa bone;

go tla ba diga bahumanegi

le batlhoki le go bolaya

ba ba mokgwa o o lolameng.

₁₅Tšhaka ya bone e tlaa tsena

mo pelong tsa bone ka bosi,

mara a bone le one a tlaa rojwa.

₁₆Bonnye jo mosiami o nang najo

bo molemo bogolo go matlotlo

a baikepi ba le bantsi.

₁₇Gonne mabogo a baikepi

a tlaa rojwa;

mme Jehofa o tshegeditse basiami.

₁₈Jehofa o itse malatsi a baitekanedi;

boswa jwa bone

bo tlaa nna ka bosakhutleng.

₁₉Ga ba ketla ba tlhajwa ke ditlhong

mo motlheng wa bosula;

mo metlheng ya moswele

ba tlaa kgora.

₂₀Baikepi ba tlaa nyelela;

baba ba ga Jehofa

ba tlaa nna jaaka monono

wa mafulo a dikgomo;

ba tlaa fela;

ba tlaa fela ba kua mosi fela.

₂₁Moikepi o tle a adime,

mme a se ke a buse;

mme mosiami o dira ka pelotshweu,

a neye fela.

₂₂Gonne ba ba segofadiwang ke ene,

ba tlaa rua lefatshe;

mme ba ba hutsiwang ke ene,

ba tlaa kgaolwa.

₂₃Ditsamao tsa motho

di tlhomamisiwa ke Jehofa;

mme o natefelwa ke tsela ya gagwe.

₂₄Le fa a wa,

ga a ketla a batanyetsegela ruri;

ka gobo Jehofa o mo tshegeditse

ka seatla sa gagwe.

₂₅Nkile ka ne ke le lekau

mme jaana ke tsofetse;

le fa go ntse jalo

ga ke ise nke ke bone mosiami

a latlhilwe, le fa e le bana

ba gagwe ba legalegela dijo.

₂₆Ka letsatsi lotlhe

o tlhola a dira ka pelotshweu,

a adime, mme losika lwa gagwe

lo segofale.

₂₇Tlogela bosula, o dire molemo;

mme o nne ka bosaengkae.

₂₈Gonne Jehofa o rata katlholo;

ga a latlhe baitshepi ba gagwe;

ba tlamelwa ka bosenabokhutlo;

losika lwa baikepi lo tlaa kgaolwa.

₂₉Basiami ba tlaa rua lefatshe,

ba tlaa aga mo go lone

ka bosakhutleng.

₃₀Molomo wa mosiami o bua

ka ga botlhale,

le loleme lwa gagwe

lo bua se se siamisang.

₃₁Molao wa Modimo wa gagwe

o mo pelong ya gagwe;

ga go dikgato dipe tsa gagwe

tse di tlaa relelang.

₃₂Moikepi o ikwaetse mosiami,

o batla go mmolaya.

₃₃Jehofa ga a ketla a mo lesa

mo seatleng sa gagwe,

le fa e le go mo sekisa

mogang o atlholwang.

₃₄Lebelela mo go Jehofa,

o bo o tshware tsela ya gagwe,

mme o tlaa go goletsa

go tla o rua lefatshe;

e tlaa re mogang baikepi ba

kgaolwang, o tlaa go bona.

₃₅Ke bonye moikepi

a na le thata e kgolo,

a inamisa jaaka setlhare se setala

se le mo mmung wa sone

wa tlholego.

₃₆Mongwe a feta,

mme bonang, o ne a seyo;

ee, ka mo senka,

mme o ne a se kake a bonwa.

₃₇Lepa moitekanedi,

o lebe mothokgami;

gonne bokhutlo jwa motho yoo

ke kagiso.

₃₈Ka ga batlodi,

ba tlaa senngwa mmogo;

bokhutlo jwa baikepi

ba tlaa kgaolwa.

₃₉Poloko ya basiami

e tswa mo go Jehofa;

ke ene kago ya bone e e thata

ya phemelo

mo motlheng wa khuduego.

₄₀Jehofa o a ba thusa,

o a ba falodisa;

o ba falodisa mo baikeping,

a ba boloke,

ka gobo ba tshabetse mo go ene.